Балалар да, өлкәннәр дә шатлана

Балалар да, өлкәннәр дә шатлана
Кичә Арчада республика президент программалары кысаларында балалар бакчасы һәм Җиңү паркы ачылды.
Татарстан Республикасы Дәүләт Советы Рәисе Фәрит Мөхәммәтшин 3 сентябрьдә Арча районында булды. Аны муниципаль район җитәкчесе Илшат Нуриев каршы алды һәм озатып йөрде.
Мөхтәрәм кунак Арча шәһәрендәге 11 номерлы балалар бакчасын ачу тантанасында катнашты. Әлеге бинада заманында башлангыч мәктәп урнашкан иде, аннан ул төрле хезмәтләр карамагына күчте. Ниһаять, менә ул үзгәреп, матурланып яңадан балалар карамагына бирелде.
— Республикабыз җитәкчелеге ярдәме белән безнең районда балалар бакчалары проблемасы уңай хәл ителеп килә, — диде район җитәкчесе Илшат Нуриев үзенең чыгышында. — Менә бу бакча да шуның бер мисалы булып тора, без моңа бик рәхмәтле.
Фәрит Мөхәммәтшин ата–аналарны, тәрбия- челәрне, балаларны әлеге сөенечле вакыйга белән котлады.
— Игелекле бина булсын, сезнең шатлыклы йөзләрегезне күрү безнең өчен дә бәхет ул, — диде.
Хөрмәтле кунаклар тантанага буш кул белән килмәгәннәр. Илшат Нуриев балалар бакчасына — 50, Фәрит Мөхәммәтшин 100 мең сумлык сертификатлар тапшырды.
Республика Дәүләт Советы Рәисе балалар бакчасы белән танышу барышында башкарылган эшләрнең сыйфатына уңай бәя бирде, бакча территориясендәге уен мәйданчыкларын ошатты.
Ул шулай ук район үзәк хастаханәсенең ныклап төзекләндерелгән өлешен карады. Аннан соң Җиңүнең 70 еллыгы хөрмәтенә төзелгән үзәк паркны ачу тантанасында катнашты. Биредә олы кунакны сугыш һәм тыл, хәрби хезмәт ветераннары каршы алды. Фәрит Мөхәммәтшин алар янында тукталып хәлләрен сорашты. Ул Арча педагогика көллияте каршындагы “Прометей” клубы әгъзалары сугыш үткән Новгород өлкәсеннән табып алып кайткан экспонатларны кызыксынып карады, клуб җитәкчесе Илһам Низаметдинов белән сөйләште.
Күп санлы кунаклар, сугыш еллары авырлык- ларын үз җилкәләрендә күтәргән ветераннар да, бу турыда китаплардан укып, кинолардан күреп кенә белгән яшьләр дә, әлеге паркта булучы һәркем дулкынлану минутлары кичерми калмагандыр. Биредә бар да сугыш еллары рухы белән сугарылган, бу парк һәрвакыт Җиңүнең җиңел генә бирелмәгәнлеген, аның кадерен белергә кирәклеген исенә төшереп торыр.
— Арча шәһәренә мондый парк бик кирәк иде, — диде район җитәкчесе Илшат Нуриев. — Ул арчалыларның яраткан ял урынына әверелер, анда төрле чаралар үткәрелеп торачак, без анда күчмә кинотеатр да урнаштырыр- га уйлыйбыз.
— Биредә кеше һәрвакыт менә шулай күп булсын иде, дигән теләктә калам, — диде Фәрит Мөхәммәтшин. — Бик матур парк төзегәнсез, аның Җиңүнең 70 еллыгы уңаеннан төзелүе дә символик мәгъ- нәгә ия.
Хөрмәтле кунак Арчаның үзгәртеп корылган 3нче номерлы гомумбелем мәктәбендә дә булды.
Соңыннан ул район активы белән очрашты. Очрашуны район җитәкчесе Илшат Нуриев ачты.
— Республика президент программалары безнең районда да уңышлы тормышка ашырыла, — диде ул. — Халыкның кәефе әйбәт, арчалылар үзләренә карата күрсәтелгән кайгыртучанлыкка яңа уңышлар белән җавап бирерләр.
Фәрит Мөхәммәтшин үзенең чыгышында Арчаның күзгә күренеп үзгәрүен билгеләп үтте.
— Республика да үзгәрә, — диде ул. — Рус, татар, мари һәм башка милләтләрнең үзара дуслыгы, бердәмлеге үсешебезнең төп нигезе булып тора. Республика алып барган сәясәт үзен аклый, милләтләр, диннәр арасындагы татулык — иң мөһиме.
Республика җитәкчеләре һәрвакыт халык арасында, бер сулышта. Безнең тотрыклы яшәү, кыенлыкларны җиңү өчен бөтен мөмкинлекләребез бар. Шәхси ярдәмче хуҗалыкларны үстерү буенча республикада эш инде күптәннән алып барыла, киләчәктә дә ярдәм булачак. Авылда яшәп ничек инде сыер, тавык асрамыйсың? Сату культурасын үстерергә кирәк. Казан базарларында Израильдә үскән кишер саталар. Арча бәрәңгесен, кишерен юып, сатып алучыны кызыктырырлык итеп сатуга чыгарып булмыймени?
Фәрит Мөхәммәтшин республиканың үсеш перспективаларына да тукталды, 13 сентябрьдә булачак сайлауларда актив катнашырга чакыр- ды.
Арчада үткән тантаналарда Россия Федерациясе Дәүләт Думасы депутаты Марат Бариев, Татарстан Дәүләт Советы депутатлары Ринат Закиров, Рауль Рәхмәтуллин, Россия Пенсия фондының Татарстан Республикасы буенча идарәсе җитәкчесе Марсель Имамов катнашты.
Ильяс Фәттахов