Яңа паркта бәйрәм

Яңа паркта бәйрәм
Парк һәм скверлар көнен быел бездә дә яңа ачылган Җиңү паркында чын бәйрәм буларак билгеләп үттеләр. Күңелгә ятышлы матур, җылы, якты бәйрәм булды ул. Кеше дә күп килгән.
– Бик кызыксам да, стадионга төшмәдем. Ерак. Аяклар йөрергә теләми. Монда килдем. Рәхмәт оештыручыларга, күңелле булды. Башка бәйрәмнәр дә биредә үтсә, берсеннән дә калырга исәп юк, – диде өлкән яшьтәге бер апа.
– Парк та искиткеч булган. Күптән кирәк иде инде Арчага, – дип сүзгә кушылды күршесе.
Чыннан да, парк – горурланырлык. Артык зур булмаса да, бар да сыйган һәм бар да үз урынында. Тирә-юне яшеллеккә күмелгән. Тротуарлардан матурлыкка сокланып (кичен яктырткычлар яктылыгында ул икенче төрле сихри матурлыкка күмелә) эчкә үтәсең. Хәрби техникалар, ял итү өчен беседкалар, сугышта һәлак булганнарга куелган обелиск паркны тагын да тулыландыра.
– Бу паркны төзүгә республика президент программасы буенча хөкүмәтебез акча бирде, үзебезнең оешма, предприятиеләребез булышты. Биредә әле фонтан, тир, яңа өйләнешүчеләр өчен мәхәббәт күперчеге булачак. Башкарган эшләребезнең барысы да халык өчен. Игелеге булсын, парк һәрчак шулай гөрләп торсын, – диде бәйрәмне ачып җибәргәндә район җитәкчесе Илшат Нуриев һәм парк төзүче “Конвентстройинжиниринг” ширкәте генераль директоры Илһам Хисамиевка, участок җитәкчесе Рәшит Абдулвәлиевка Рәхмәт хатлары тапшырды, зур өлеш кертүче барлык оешмаларга рәхмәтен белдерде.
Аннан ул сәхнәне Арча Мәдәният йорты хезмәткәрләренә, үзешчәннәргә тапшырды. “Рус җыры”, “Ләйсән”, “Яшь йөрәкләр”, “Арча таңнары”, “Мирэль” вокаль ансамбльләре, “Ар-и-эль”, “Аллегро”, “Сөембикә” бию төркемнәре, җыр- чылар чыгышлары тамашачы алкышларына лаек булды, флэшмоб берәүне дә битараф калдырмады.
Читтән генә әлеге хозурлыкны күзәтеп торган Арча үзәк мәчете имам–хатибы Илгизәр Касыймовка мөрәҗәгать итеп, аның фикерләре белән кызыксынам.
– Чиста, матур. Миңа ошады. Балалар уйнасын, яшьләр күңел ачсын, өлкәннәр ял итсен, – диде ул.
Бәйрәм сәхнәсенә arskmedia.com сайтында барган “Җәйге ялның күңелле мизгелләре” бәйгесе җиңүчеләре дә күтәрелде. Газетабызның баш мөхәррире Исрафил Насыйбуллин беренче урынны алган Зәринә Саттарова, икенче урынны яулаган Алсинә Сәфиева, өченче булган Илүзә Шәймуллинага бүләкләр тапшырды.
– Мондый бәйгеләр даими үткәрелеп торачак. Катнашыгыз, җиңегез, безнең белән бергә булыгыз, – диде Исрафил Рәхмәтуллович тамашачыларга мөрәҗәгать итеп. – Иң зур яшелчәләргә бәйге игълан иттек. Аның шарты белән сез сайтыбыз- да таныша аласыз.
Ул көнне паркта Лилия Фазылова җитәкчелегендә район үзәк китапханәсе “Әдәби мәйдан” да оештырган иде. Шигърият һәм әдәбият сөючеләр яңа китаплар, үзебезнең шагыйрьләребез иҗатлары белән таныштылар, шигырьләр укыдылар һәм тыңладылар.
Шунда гына балалар мәйданчыгы да гөрләде. “Өмет чыганагы” балаларны тернәкләндерү үзәге хезмәткәрләре әкият геройлары булып киенеп, балаларның күңелләрен күрделәр, уйнаттылар. Яшьләр эшләре, спорт һәм туризм бүлеге спортны якын иткән балалар өчен ярыш формасында хәрәкәтчән уеннар үткәрде. Арча мәктәпләре, уку йортлары тәкъдим иткән Бөек Ватан сугышы күренешләре дә берәүне дә битараф калдырмады.
Шунда гәпләшеп басып торган күкрәкләре тулы орден-медальле ике хәрби белән танышам. Әфган сугышы ветераннары Рәфыйк Җамалиев белән Виктор Азизов булып чыктылар.
– Нинди генә булмасын, сугыш сугыш инде ул. Дәһшәтле, канкойгыч, кырыс, – диде Рәфыйк Җамалиев. – Шул мәхшәрне кичкән кеше буларак, көннән-көн ямьләнә барган Арчабызда Җиңү паркы ачылуга без аеруча сөенәбез.
Гөлсинә Зәкиева