Киләчәк өчен тавыш бирик

Киләчәк өчен тавыш бирик
“Мин сайлауларга ни өчен барам?” сораштыруларны дәвам итәбез.
Арчадан Фәрит Салихов:
– Ничек бармыйсың инде сайлауларга, ул безнең гражданлык бурычыбыз, лабаса. Алга таба тормышыбызның нинди юнәлеш алуы без сайлаган кешеләрдән тора. Мин үзем тормышымнан канәгать. Кечкенә генә бизнесым бар. Тормыш иптәшем белән өч малай тәрбияләп үстердек. Кечесе Казанда югары уку йортында бюджет бүлегендә белем ала. Олылары икешәр югары уку йорты тәмамлады. Икесе дә Арчада эшмәкәрлек белән шөгыльләнә. Өй салып чыктылар. Менә әле уртанчы улыбызның икенче бәбиләре туды. Кыскасы, ялкау булмаган, эшлим дигән кешегә эш бар.
Яңа президент програмалары булачагына ышанам. Заманында авыр хезмәт юлы үткән, 5–6 мең сум пенсия алучыларга нинди дә булса дәүләт ярдәме булсын, пенсияләрен арттырсыннар иде, дип телим. Бәя арттыруларны туктатырга, коррупциягә юл куймаска, эшмәкәрлек эшен башлап җибәрүчеләрне беренче елларны салымнан азат итәргә кирәк. Яңа президент программалары әнә шуларны да күздә тотып эшләнер, дип ышанам.
Өч бала әнисе Гөлфия Никитина:
– Сайлауларга һичшиксез барачакмын. Ничек Арчага күчеп кайттык әле! Балаларым да шуңа сөенеп бетә алмый. Әни монда матур, диләр. Арчада балалар үсеше өчен мөмкинлекләр зур. Сәнгать мәктәбе, спорт комплексы, бассейн, Боз сарае, Укучылар сарае – күңелеңә ошаганын сайлап була. Менә без олы кызыбыз Зәринә белән сәнгать мәктәбен сайладык. Минем бөтен уңышларым балаларымда. Зәринә халык җырларын башкарып, Россия күләмендәге ярышларда берничә тапкыр җиңеп чыкты инде. Укытучысы Алсу Кашаповага рәхмәт. Үземә йөрергә өр-яңа “Калина” машинасы алдык. Балаларны кирәкле җиргә йөртергә машина кирәк. Шуңа сөенеп бетә алмыйм. Ул гынамы, тиздән өр-яңа фатирлы да булачакбыз әле! Мин башкаларны да сайлауларга барырга чакырам.
Румия Надршина