Сабыйлар сөенде

Сабыйлар сөенде
Күп балалы, аз керемле, авыр хәлдәге, шулай ук инвалид балалар тәрбияләүче гаиләләр бездә бер вакытта да игътибар үзәгеннән читтә калмый.
Җаваплы оешмалар да, кайбер иганәчеләр дә аларга һәрвакыт ярдәм кулы сузарга әзер. ТР хәрби комиссариатының Арча һәм Әтнә районнары буенча бүлеге дә бу изге гамәлдән читтә калмый.
Күптән түгел җитәкчесе Алмаз Борһанов, хәрби комиссариатның социаль һәм пенсия бүлекчәсе җитәкчесе Рәмлә Хәкимҗанова район башкарма комитеты каршындагы балигъ булмаганнар белән эшләү комиссиясе секретаре Лилия Завялова белән әлеге гаиләләрдә булып, хәлләрен белделәр. Бүләкләре дә күп иде.
– Коллектив белән уртага салып сөйләштек. Һәркем үз өлешен кертергә ризалык белдерде. Җыелган акчага билге өчен генә дип рәттән барлык балаларга да түгел, ә чыннан да мохтаҗ саналган гаиләләрдә тәрбияләнүчеләренә кирәкле әйберләрен алып бирергә булдык, – диде хәрби комиссар Алмаз Борһанов. – Моның өчен башта Лилия Завяловадан тиешле мәгълүматны алдык. Ул үзе дә бик теләп безгә кушылды.
– Күп балалы өч гаиләне сайлап алдык. Әниләренә шалтыратып, балаларына нәрсә кирәклеген, өс һәм аяк киемнәренең размерларын сорадык, – ди Лилия Завялова.
Урта Бирәзәдә яшәүче Миләүшә һәм Илшат Җәләевлар алты бала тәрбияли. Иң олысына 18 яшь, төпчекләре Миланага әле 4 кенә ай. Әниләре Миләүшәгә ияреп, Миланадан кала барысы да каршыга чыкты.
– Үзем балалар белән өйдә, ирем “Жилкомбытсервис”та слесарь булып эшли. Аның да хезмәт хакы зур түгел. Терлекләр асрыйбыз. Тик акчаны берничек тә җиткереп булмый шул. Өйдә балалар булыша. 9нчы сыйныфны тәмамлаган Ленар җәй буе эштә булды. Яңа Кенәрдә интернатта укучы Фаина да бик тырыш, өйдә ул уң кулым, – дип балаларын мактап китте әниләре.
Без килгәндә дә Фаина нидер эшләп йөри иде булса кирәк, алъяпкычын да салырга өлгермәгән. Мәктәптә укучы Илмир белән Фаина гына түгел, 6 яшьлек Рамилә дә бүләксез калмады. Сабыйларга күчтәнәчләр дә бар иде.
Божада яшәүче Роза Галиәкбәрова 6 бала белән ялгыз калган. Рәсим, Азалия, Алишер мәктәптә, Азат белән Әнвәр балалар бакчасында, 6 яшьлек Азамат өйдә. Ире барында тормышлары әйбәт барган. Тик ул вакытлыча туган ягына киткән. “Тиздән кайтырга тиеш. Авыр булса да, бераз түзәргә туры киләчәк”, – ди Роза.
Киемнәргә балалар гына түгел, әниләре дә сөенде. Шунда ук киеп тә карадылар. “Берәр размерларын зуррак әйткән идем. Тиз үсәләр бит алар”, – диде ул.
Аннан Иске Масрага юл алдык. Биредә үзләренең 4 балалары белән Райковлар гаиләсе яши. Ана капиталы акчасына иске генә йорт сатып алып, Казаннан кайтып урнашканнар. Гаилә башлыгы Александр бик тырыш кеше икән. Алты метр озынлыкта теплица ясап куйган. Шунда кыяр, помидор үстергән. “Яшелчәләр бик уңды. Артыгын саттык. Икеләтә файда булды. Сарай эшлим, сарыклар алып үрчетергә исәп”, – ди ул. Кош–корт асрыйлар. Йортка өстәп янкорма да сала башлаган. Тик, чынлап торып аякка басканчы, күп тырышырга кирәк шул әле. Фирдүс, Тимур, Артур, Маша күзгә күренеп үсеп килә. Киемнәр алырга да күпме акча кирәк. Шуңа бу бүләкләр бик урынлы булды.
– Тормышның шулай авыррак баруында балаларның бер гаебе юк. Күп балалы гаиләләргә аз гына булыша алганбыз, сабыйларны сөендергәнбез икән, без моңа бик шат, – ди Алмаз Борһанов.
Гөлсинә Зәкиева