Ветераннар – Яңа Кишет авыл җирлегендә

Ветераннар – Яңа Кишет авыл җирлегендә
Яңа Кишет авыл җирлегендә район ветераннар советы президиумының күчмә утырышы булды.
Район ветераннар советы рәисе Альберт Җамалиев җитәкчелегендә Арчадан һәм Яңа Кенәрдән президиум әгъзалары, сукырлар җәмгыяте җитәкчесе Зөфәр Зарипов, сугыш һәм хезмәт ветераны Халисә Гафурова, хәрби көчләр ветераннары оешмасыннан Юрий Козлов катнашты.
Ветераннар күчмә президиумы эшен җирлектәге социаль объектларны караудан башлады. Симетбашта һәйкәл янында, мәдәни-спорт үзәгендә булдылар, Кышкардагы мәчеткә керделәр, Яңа Кишеттә төзекләндерелгән мәктәпне, Иске Кишеттәге Гани Сафиуллин музеен карадылар, шушы музейны торгызуга, мәгълүматлар туплауга үзеннән искиткеч зур өлеш керткән ЗУЭС җитәкчесе Рөстәм Гомәровның Герой турында сөйләвен тын да алмыйча бирелеп тыңладылар.
– Без Яңа Кишет мәктәбенә Гани Сафиуллин исемен бирүне сорап үтенеч белән мөрәҗәгать иттек. Үтенечебезне кабул итәрләр һәм әлеге белем йорты якташ Геройлары исемен йөртер дип өметләнәбез, – диде Альберт Җамалиев төзекләндерелгән бинаны карап чык- каннан соң.
– Безнең төп максат – авыл халкы тормышын яхшырту. Шуны күздә тотып, юллар салына, чишмәләр карала, фельдшер–акушерлык пунктлары эшләп тора. Һәр авылда медицина хезмәткәре бар. Иске Кишеттә электр баганалары алышынды. Интернет, телефон, телевидение – нәкъ шәһәрдәгечә. Тик менә бер проб- лема – авылда яшьләр калмый, – диде Яңа Кишет авыл җирлеге башлыгы Тәбрис Арсланов.
– Бу сәхнәдә иң беренче булып күтәрелеп, җырлавым белән горурланам, – диде Симетбаш авылы мәдәни–спорт үзәгенә кергәч, хезмәт ветераны Факия Шәрәфетдинова. – Әни минем шушы авылдан. Хәдичә әби белән Һидиятулла бабай аны тәрбиягә алып үстергәннәр. Лотфулла исемле балалары сугышта һәлак булган. Шуңа Хәдичә әби туганының баласына Лотфулла дип исем куштыр- ган. Лотфулла Шәфигуллин туганнарына гына түгел, авылдашларына да бик игелекле кеше булып чыкты.
– Симетбаш авылы халкы – бәхетле халык. Аларның намуслы, тырыш хезмәтчәннәре, ярдәм итәргә әзер торган кешеләре бар. Шуларның берсе – сөт җыючы һәм үз кибетләре булган Рәхимә Мортазина. Корбан ашлары, очрашулар үткәрүдә ул булыша.
Нинди генә чара оештырылса да, бөтен авылның китапханә, клуб хезмәткәрләре ярдәмгә килә. Муллалар белән тыгыз элемтәдә эшлибез. Алар бик белемле. Әхлакый тәрбиягә зур урын бирәләр.
Безнең авылларда хәзер аракы белән туй, юбилейлар үткәрү бетте, – диде җирлекнең ветераннар советы җитәкчесе Раиф Әхмәтшин.
Аннан ветераннар советы президиумы әгъзалары Хәтнәгә бардылар, изге чишмәне, чиркәүне карадылар. Биредә дә аларны Рөстәм Гомәров каршы алды һәм озатып йөрде, әлеге урыннарның тарихы белән таныштырды.
Гөлсинә Зәкиева