“Мин сайлауларга ни өчен барам”

“Мин сайлауларга ни өчен барам”
Без шушы сорауга җавап алу максатыннан сораштырулар үткәрдек.
Район үзәк хастаханәсенең реанимация бүлеге җитәкчесе, 2011 елда “Ел табибы – Ак чәчәкләр” конкурсында җиңеп, җиңел машина белән бүләкләнгән Ренат Урманов:
– Сайлауларга, әлбәттә, барам. Бу безнең тормышыбыз, ә аңа битараф карап булмый. Быел менә кызыбыз мәктәпне тәмамлап, Америкага укырга китте. 2013 елда ул FLEX программасын отып, Америка мәктәбендә укып кайткан иде инде. Улыбыз аспирантурада укый. Быел хастаханәне ничек уңайлы һәм матур итеп төзекләндерделәр. Яңа медицина җиһазлары кайтачак. Сайлаулар ул бик тә әһәмиятле сәяси вакыйга. Безнең иминлегебез, тынычлыгыбыз, мул яшәвебез һәм дә сәламәтлегебез дәүләт белән идарә иткән кешеләрдән тора. Сайлауларда без иң лаеклыларга тавыш бирик.
Шурабаш авылыннан терлекче Валентин Федоров:
– Иптәшем Ирина белән икебез дә фермада бозаулар карыйбыз. Өч балабыз бар. Алар өч телне дә беләләр: үз ана телебез (мари), татар һәм рус телләрен, чит телне дә өйрәнәләр. Ана телендә мәктәптә дә укыйлар. Авылда “Шишор” мари халык ансамбле бар, йолаларыбыз саклана, матбугатны теләгән телебездә алабыз, мәктәбебез ныклап төзекләндерелде. Сайлауларның әһәмиятле вакыйга икәнен йөрәгем белән аңлыйм. Яшьтән Әфганстанда хезмәт итеп кайткан кеше мин. Ил, республика, район, авылым язмышына битараф кала алмыйм. Шуңа да сайлауларга барам. Башкаларны да сайлауларда катнашырга чакырам.
Арчадан укытучы Елена Герасимова:
– 18 яшем тулганнан бирле сайлаулардан калган юк. Быел да барачакмын. Үз фикереңне белгертергә кирәк бит! Мин гомерем буе Арчаның 1нче мәктәбендә рус теле һәм әдәбиятыннан укыттым. Элеккеге белән бүгенге мәктәпнең аермасы бик зур. Яңа спорт залы, ашханә, актлар залы, җылы бәдрәфләр, техник җиһазлар – үзгәрешләрне санап бетерерлек түгел. Сайлауларга тагын да уңай якка үзгәрешләр булыр дип өметләнеп барабыз. Укытучы ул иң элек укытучы булырга тиеш. Укытучы өчен иң мөһиме укучы, чын кеше тәрбияләү. Аңа артык эш йөкләмичә, кәгазь мәшәкатьләреннән арындырып, балага белем бирү, җәмгыять өчен лаеклы кешеләр тәрбияләүне төп эш итеп куярга кирәк. Мин бу үзгәрешләрнең булачагына ышанам. Җәмгыятьтә яшәп тә, анда барган вакыйгаларга битараф калырга ярамый. Сайлаулардан без тагын да уңай якка үзгәрешләр көтәбез, ә бу безнең иң лаеклыларны сайлавыбыздан тора.
Сикертәннән дүрт бала әнисе Фәридә Гобәева:
– Безнең сайлаудан калган юк, әлбәттә, барабыз. Аллага шөкер, “Яшь гаиләләр” программасы буенча зур итеп өй салып чыктык. Менә әле олы кызыбыз- ның туе булды. 17 яшьлек улыбыз Үрнәк агросәнәгать көллиятендә укый, бер кызыбыз 3нче сыйныфта, кечкенәсе – 5 яшьлек улыбыз бакчага йөри. Иптәшем “Ак Барс” агрокомплексы”нда терлекче булып эшли. Үзем кибеттә сатам. Мәктәбебез өр-яңа, рәхмәт төшкере, бакчабыз әйбәт кенә эшләп тора. Сайлауларга авыл эчендәге юлларыбыз да рәтләнер әле, дигән өметләр белән барабыз. Сайлау- ларда катнашу безнең гражданлык бурычыбыз. Аннан читтә калу ул үзеңнең киләчәгеңә, гаиләңә, балаларыңа карата битарафлык күрсәтү булыр иде. Барыбыз да сайлауларда катнашыйк!
Румия Надршина