Алар кулларына паспорт алды

Алар кулларына паспорт алды
Арча Мәдәният йортында “Мин – Россия гражданины” дигән кичә булды. Биредә 14 яше тулган егетләр һәм кызларга паспорт тапшырылды.
Паспорт кешенең иң беренче булып кулына алган һәм гомере буе аның белән бергә атлаган иң кирәкле документы. Аның шулай тантаналы шартларда бирелүе әле тормыш юлына аяк басып кына килүче яшь егетләр һәм кызлар күңелендә аеруча нык тәэсир калдырачак.
– Сез – илебезнең киләчәге. Бүгеннән Россия гражданины дигән горур исемгә ия булдыгыз. Хәзер сез аның тулы хокуклы хуҗалары да. Укуыгыз, хезмәтегез белән аңа лаек булуыгызны исбатларсыз, илебез, республикабыз, районыбыз дәрәҗәсен күтәрүгә, абруен арттыруга үзегездән өлеш кертерсез, илебез икътисады, мәдәнияте һәм сәнгатен тудырган һәм үстергән өлкән буын вәкилләре башлангычларын дәвам итәрсез, дип ышанабыз, – диделәр аларга мөрәҗәгать итеп кичәне алып баручылар “Бердәм Россиянең Яшь гвардиясе” Арча җирле бүлекчәсе штабы җитәкчесе Лия Ильина һәм “XXIнче гасыр яшьләре” клубы җитәкчесе Руслан Галәветдинов.
Район башкарма комитетының яшьләр парламенты рәисе Юлия Ибраһимова үзләрен паспорт тарихы белән таныштырды.
Бу көнне Адилә Абзалова, Алмаз Закиров, Ирек Зиннәтуллин, Зөлфәт Хәмидуллин, Ләйсән Шәрипова, Илсинә Әхмәтханова, Диана Бариева, Әмир Мөхәммәткәримов, Әлфис Сафин, Талия Төхвәтуллина, Гөлнур Һадиева, Эльвина Хәкимуллина, Раилә Шаһимәрдәнова кулларына паспорт алды. Кеше тормышындагы иң әһәмиятле документны аларга район башкарма комитеты җитәкчесе урынбасары Рамил Гарифҗанов, федераль миграция хезмәтенең Арча районы бүлеге җитәкчесе Ольга Лошакова, “Бердәм Россия” сәяси партиясе җирле бүлекчәсе башкарма комитеты җитәкчесе Тәлгать Җәләлетдинов тапшырды.
– Киләчәктә кулларыгызга әле күп төрле документ алырсыз. Әмма бу иң беренчесе һәм иң “зурысы”. “Мин – Россия гражданины” дип горурланып әйтерлек итеп яшәгез, – диделәр алар егетләр һәм кызларны тормышларындагы әлеге иң истәлекле көннәре белән котлап.
Гөлсинә Зәкиева