Яшь сайлаучылар белән очрашу

Яшь сайлаучылар белән очрашу
9 сентябрьдә Җиңү паркында яшь сайлаучылар кичәсе, сайлауга беренче тапкыр баручы яшь егетләр һәм кызлар белән очрашу булды.
Аңа Арча педагогика, агросәнәгать көллиятләре, социаль белем бирү академиясенең Арча филиалы студентлары чакырылган иде. Ә студентлар булган урында тормышның гөрләп торуын аңлатып торасы юк. Кичә бер үк вакытта очрашу, аралашу, эшлекле сөйләшү дә, күңел ачу да булды.
Чара үзенчәлекле башланып китте. Башта шушы өч уку йортыннан өч команда визит карточкаларын тәкъдим итте, кызыклы һәм мавыктыргыч формада үзләре, эшләре, тормышлары белән таныштырды. Әлбәттә, ул җыр-бию- сез генә үтмәде. Фәндүс Гыйльметдинов белән Раил Бакыев җырлауларын яшьләр алкышлар белән “күмде”. Башны эшләтүгә, командалар оештыруга юнәлдерелгән уеннар да кызыклы чыкты. Тамашачы уен-көлке белән кабул итсә дә, җавап табучыларга хәйран гына тирләп-пешәргә туры килде. Әмма иң җитди “имтихан” алда булган икән. Сайлауга кагылышлы викторина сорауларын районның яшьләр парламенты җитәкчесе Юлия Ибраһимова әзерләп килгән иде.
– Менә шундый юл белән без беренче тапкыр сайлауга баручы егетләр һәм кызларга сайлауларның мөһимлеген аңлатырга тырыштык. “Республика тасмасы” дигән һәм башка акцияләр оештырдык. Шуннан чыгып “Әлеге тас- маның төсләре нәрсәне аңлата?” дигән сорау бирелде дә инде. Кызыл төс көчне, агы – чисталыкны, яшеле тормышны, яңарышны белдерә, – диде ул.
Яшьләрнең фикерләре белән кызыксынам. Артур Вафин өчен бу сайлаулар икенчесе булса, Алинә Шиһабиева беренче тапкыр бара икән.
Сайлау хокукына ия булуым белән горурланам, шул ук вакытта бераз дулкынланам да, – диде Алинә. – Районда, шәһәребездә күпме эшләр башкарылды, балалар бакчалары төзелде, мәктәпләр төзекләндерелде. Боларның барысы да халык өчен бит.
Арча педагогика көллияте студентлары, Казанбаш кызлары Альбина Әлмиева белән Руфия Гыйззәтова да аның фикере белән килешәләр.
– Безнең Казанбаш мәктәбен ничек яхшы итеп төзекләндереп куйдылар, – диде алар.
Яшь сайлаучылар белән очрашуда район башкарма комитеты җитәкчесе урынбасары Рамил Гарифҗанов катнашты.
Гөлсинә Зәкиева