Арчада фигуралы шуу

Арчада фигуралы шуу
Моңарчы без фигуралы шууны телевизордан гына карый идек. Ә хәзер андый мөмкинчелек Арчаның үзендә бар.
Бер көнне Боз сараена фигуралы шуу секциясенә йөргән балаларның чыгышын карап кайттык. Күңелле тамашаны карарга район башлыгы урынбасары Любовь Осина да килде.
Шоу-программаны Укучылар сарае хезмәткәре Лия Ильина алып барды. Район башкарма комитеты җитәкчесенең социаль мәсьәләләр буенча урынбасары Рамил Гарифҗанов, районның фигуралы шуу федерация- се рәисе Альберт Хәкимов (“Жилкомбытсервис” ширкәте җитәкчесе) яшь спорт сөючеләрне, ата- аналарны, тамаша карарга килүчеләрне сәламләде, фигуралы шуу белән шөгыльләнүчеләргә уңышлар теләде, аларга истәлекле бүләкләр тапшырды.
Ә мин хоккей секциясенә йөрүче 5 яшьлек малайларны алып килмәвемә үкендем. Алар да чәчәктәй нәни кызларның боз өстендә матур итеп төрле хәрәкәтләр ясауларын күреп соклансын иде. Үзе бер кызыклы манзара бит! Казаннан да фигуралы шуучылар кайткан. Казан кызлары Клара Швецова белән Анфиса Рябованың боз өстендәге чыгышын безнең Арча кызлары “без дә шундый булачакбыз!” дип тәэсирләнеп күзәттеләр. Казан тренеры Алинә Галимова бозда нәкъ аккоштай “йөзә”, балалар аннан күзләрен дә алмый. Соңыннан тренерның үзе белән таныштык.
– 20 яшьтә, – дип сөйләде Алинә Илдаровна. – 3,5 яшьтән шөгыльләнә башладым. Синхрон фигуралы шуу буенча спорт мастеры, ялгыз фигуралы шуу буенча спорт мастерлыгына кандидат. Арчада балалар белән февральдән шөгыльләнә башладык. Балалар теләп йөриләр, тырышлар, мин аларны яратып өлгердем инде. Хезмәтемне бик яратам. Киләчәктә балаларның зур спортка чыгу мөмкинлеге бар, алар төрле ярышларда катнашачак, гәүдәләре нәфис, сәламәтлекләре нык булачак, мәктәпне тәмамлагач, тренерлыкны сайлый алалар, ә бит боз өстендә фигуралы шуу күңел күтәренкелеге, матур тойгылар, рәхәтлек бирә – гомумән, бу төр спортның файдасы зур.
Бозда матур, нәфис хәрәкәтләр ясап шуып кергән Камиләнең әнисе Ләйлә Сәгъдетдинова кызының иңнәренә җылы курткасын салды.
– Фигуралы шууның файдасы бик зур, – диде Ләйлә ханым. – Баланың мускул системасы ныгыды, сәламәтлеге яхшырды, түземлерәк булырга өйрәнде. Уңай тәэсирләрне сөйләп бетерерлек түгел. Ул нәфис хәрәкәтләрне Боз сараеннан чыккач та дәвам итәбез. Сезнең кызыгыз биюче мәллә, дип сорыйлар.
Апалы-сеңелле ике нәни кызның пардан киенеп боз өстенә чыгуын, сөбханалла, дия-дия күзәттек. Боздан кергәч, әниләре Алинә Хәбибуллина белән сөйләштек.
– Әлфиягә – 7, Зәринәгә 5 яшь, – дип таныштыр- ды ул кызлары белән. – Кушлавычта укытам. Фигуралы шууны үзем бик яратам. Шуңа кызларымны да Боз сараена йөртәм. Алар да бу спорт төрен бик яратты. Әни, кайчан барабыз, дип торалар.
Чәчәк кебек 5 яшьлек Аделинаның әнисе Ландыш Мотыйгуллина да кызы өчен сөенеп бетә алмый.
...Килер бер көн, без үзебезнең Арча фигуристларын “безнекеләр!” дип сөенә-сөенә телевизордан карап утырырбыз әле.
Румия Надршина