Тагын 6 кеше сертификатка ия булды

Тагын 6 кеше сертификатка ия булды
Арча ЗАГСы бүлегендә икенче һәм өченче балаларын тапкан аналарга “Ана капиталы” сертификаты тапшырылды.
Ана капиталын алу өчен сертификатны ияләрен шулай гаиләләре белән чакырып, тантаналы шартларда тапшыру районда матур гадәткә әйләнде. Бу юлы да бәхетле әниләр ирләре, балалары белән килгән иде.
2007 елның 1 гыйнварыннан алып бүгенгә кадәр безнең районда гына да 2926 анага 1миллиард 300 миллионнан артык суммада ана капиталы тапшырылган. Шуның 2329ы (800 миллионнан артыгы) кулланган инде. Күбесе ул акчаны торак шартларын яхшырту өчен, 18 кеше олырак балаларына белем бирү өчен тоткан.
– Бүгенгә ана капиталының суммасы 453 мең сумнан артыграк. Аны балага 3 яшь тулганчы да алырга мөмкин. Тик ул очракта мәсьәлә кредит учреждениеләре аша хәл ителә. Арчадагы барлык кредит учреждениеләре дә бу юнәлештә эшли. Ә 3 яшь тулгач, ул әнинең исәп–хисап счетына күчерелә, – диде Арча һәм Әтнә районнары буенча Пенсия фонды җитәкчесе Рузия Нурмөхәммәтова. – Аннан хәзер әлеге акчаның бер мәртәбә 20 мең сумын алырга була. 2016 елның 31 мартына кадәр гариза биреп калырга өлгерергә кирәк. Акча 2 ай эчендә күчә. Бүгенгә 351 кеше ул акчаны алды инде.
Рузия Нурмөхәммәтова бу тантанада ана капиталы сертификатын Арчадан Гөлүсә Гыйльметдинова, Күпербаштан Руфия Минҗанова, Арча станциясеннән Динә Ибраһимова, Мөндештән Альбина Хәйретдинова, Мирҗәмнән Карина Сафина һәм Айваннан Гөлнар Җамалиевага тапшырды.
Гөлнар белән Фәнил Җамалиевлар ике яшьлек уллары Самат һәм ике айлык кызлары Динә белән килгән иде.
– Бу акчаны без йорт төзү өчен кулланырга планлаштырабыз, – диде Фәнил.
Минҗановлар гаиләсендә инде ике кыз – 12 яшьлек Ләйсән һәм 10 яшьлек Ләйлә үсеп килә. Быел ул тагын бер балага арткан. Нәни Лилиягә әле ике ай гына.
– Без Арчада өй салабыз. Бу акча бик тә ярап куячак, – ди Руфия.
Ана капиталыннан тыш бу гаилә күп балалы буларак җир участогы да алачак.
– Өченче бала туган вакытка иң олы балага 18 яшь тулмаган очракта гына күп балалы гаиләгә җир участогы бирелә, – диде Рузия Нурмөхәммәтова.
Тантанада “Бердәм Россия” сәяси партиясенең җирле бүлекчәсе башкарма комитеты җитәкчесе Тәлгать Җәләлетдинов, аның урынбасары Валентина Гаранина катнашты. Автоградбанк хезмәткәре Алсу Әхмәдуллина кредит учреждениеләре аша ана капиталын алу тәртибен аңлатты, гаиләләргә истәлек бүләкләре тапшырды.
Гөлсинә Зәкиева