Эш нәтиҗәсе хәзер рейтингта күренә

Эш нәтиҗәсе хәзер рейтингта күренә
Татарстан Республикасы Мәгариф һәм фән министрлыгында урта гомуми белем мәктәпләренең узган уку елы нәтиҗәләре буенча рейтингы төзелде.
Район мәктәпләре арасындагы күрсәткечләрне газета укучыларыбызга тәкъдим итәбез:
АЕРЫМ ФӘННӘРНЕ ТИРӘНТЕН ӨЙРӘНҮЧЕ ЛИЦЕЙ,
ГИМНАЗИЯ, МӘКТӘПЛӘР РЕЙТИНГЫ
№   Гомуми белем мәктәпләре исеме      Баллар суммасы
1 Арчаның В.Ф.Ежков исемендәге аерым фәннәрне тирәнтен өйрәнү 1нче урта гомуми белем мәктәбе 111
2 Арчаның 5нче гимназиясе 81

УРТА ГОМУМИ БЕЛЕМ МӘКТӘПЛӘРЕ РЕЙТИНГЫ
№       Гомуми белем мәктәпләре исеме          Баллар суммасы
1 Түбән Мәтәскә урта гомуми белем мәктәбе 102
2 Г.Тукай исемендәге Ашытбаш урта гомуми белем мәктәбе 98
3 Шушмабаш урта гомуми белем мәктәбе 89
4 Арчаның 2нче урта гомуми белем мәктәбе 82
5 Арчаның 7нче урта гомуми белем мәктәбе 79
6 Яңа Кенәр урта гомуми белем мәктәбе 78
7 Иске Чүриле урта гомуми белем мәктәбе 78
8 Наласа урта гомуми белем мәктәбе 77
9 Апаз урта гомуми белем мәктәбе 75
10 Курса–Почмак урта гомуми белем мәктәбе 70
11 Лесхоз урта гомуми белем мәктәбе 64
12 Яңа Кырлай урта гомуми белем мәктәбе 61

Әлеге рейтингка аңлатма бирү өчен район мәгариф идарәсе җитәкчесе Зөлфәт Дәүләтбаевка мөрәҗәгать иттек:
— Зөлфәт Миннефәрович, рейтинг нинди максатта төзелде?
— Аның төп максаты — мәктәпләрнең белем һәм тәрбия бирү сыйфатына комплекслы бәя бирү. Рейтинг төзегәндә педагогик коллективларны белем һәм тәрбия бирү сыйфатын үстерү белән кызыксындыру, белем бирү процессын камилләштерү, укыту сыйфаты турында тулы мәгълүмат алу, шулай ук укытучыларның һөнәри осталыклары дәрәҗәсен билгеләү бурычлары куелды. Таблицалардан күренгәнчә, мәктәпләр ике төркемгә бүлеп бәяләнде. Беренчесендә югары дәрәҗәдә укыту мөмкинлеге булган, фәннәрне тирәнтен өйрәнүче мәктәпләр, икенчесендә урта гомумбелем мәктәпләре.
— Урын биргәндә нинди күрсәткечләр исәпкә алынды?
— Рейтинг төзү шактый катлаулы процесс. Аны газета битләрендә генә чагылдырып бетерү мөмкин түгел. Мин төп юнәлешләрне генә атап китәм. Иң беренче чиратта, әлбәттә, укучыларның белем сыйфаты исәпкә алынды. Икенчесе — милли белем бирү торышы. Рейтингта сәләтле балалар белән эш системасы да мөһим урын алып тора. Тәрбия бирү шулай ук игътибар үзәгендә. Балаларның сәламәтлекләрен саклау, иминлеген тәэмин итү мәсьәләләре дә исәпкә алына. Шулай ук, кадрлар белән тәэмин ителеш, аларның белемен күтәрү дә йогынты ясый. Шушы күрсәткечләргә нигезләнеп тупланган баллар суммасы буенча мәктәпләрнең рейтингы төзелә.
Бу турыда Арча районы мәгариф идарәсе сайтында тулырак мәгълүмат алырга мөмкин.