Районда сайлаулар уңышлы узды

Районда сайлаулар уңышлы узды
Татарстан Республикасында Президент сайлауларында Рөстәм Миңнеханов җиңеп чыкты. Аны яклап республикада сайлаучыларның 94,4 проценты тавыш бирде. Арча муниципаль районы территория сайлау комиссиясе хәбәр иткәнчә, Арча районында Рөстәм Миңнеханов 98,48 процент тавыш җыйды.
Башка кандидатларның нәтиҗәләре түбәндәгечә: Рушания Билгилдеева– 0,31, Хафиз Миргалимов – 0,99, Руслан Йосыфов 0,18 процент.
Районда сайлаулар бик оешкан төстә, актив узды. Барлык сайлаучыларның 98,93 проценты, тавыш- ларын биреп, үзләренең гражданлык бурычын үтәде. Бердәм тавыш бирү көнендә муниципаль берәмлек Советларына 172 депутат сайланды.
Арча районында барысы 39737 сайлаучы теркәлгән. Аларның 607се беренче тапкыр тавыш бирде. Районда 62 сайлау участогы эшләде, шуларның 15е Арча шәһәрендә.
Иртәнге сәгать 7дә үк Арча районында сайлау участоклары гөрләп торды. Район җитәкчесе Илшат Нуриев тормыш иптәше Гөлнур ханым белән иртәнге 7 сәгать 15 минутта ук тору урыны буенча Апаз авылы мәдәният йортында урнашкан сайлау участогына килеп тавыш бирде.
Арчаның 5нче гимназиясендә урнашкан сайлау участогында әзерлек һәрвакыттагыча, бик яхшы. Тавыш биреп чыккач ял итеп ала аласың, төрле-төрле яшелчәләр, кул эшләнмәләре белән сәүдә итү оештырылган иде.
Сәламәтлекләре буенча участокка килә алмаган сайлаучыларның өйләренә барып тавыш бирдерделәр. Алар белән без дә 97 яшьлек Майкамал әби Әмирова янында булдык. Узган сайлауларда ул участокка үзе килгән. Ләкин вакыт үзенекен итә, әмма әбинең хәтере яхшы әле.
– Миңа бик күпне күрергә туры килде, – диде ул. – Бүгенге тормышка шатланып бетә торган түгел, мин республиканың матур киләчәге өчен тавыш бирәм.
Арчаның 1нче мәктәбендә урнашкан сайлау участогында да сайлаулар һәрвакыт югары дәрәҗәдә үтә. Беренче сайлаучыларны сайлау комиссиясе рәисе Лилия Зарипова каршы алды. Беренче булып Зур урамда яшәүче Гөлназ Хәкимова, Лилия һәм Ирек Вахитовлар килде. Комиссия рәисе аларга истәлек бүләге тапшырды. Бу көнне сайлауга беренче килгән һәм тормышларында тәүге сайлауда катнашкан яшьләргә бүләкләр барлык учас- токларда да бирелде.
Бөтен җирдә дә сайлаучылар өчен концерт программалары оештырылган иде. Теләгән кеше кайнар чәй, коймактан да авыз итә алды.
Сайлауларның гаделлеген участокларда төрле партия вәкилләре күзәтеп торды.
5 сайлау участогында (Апаз, Наласа, Яңа Кишет, Урта Аты, Урта Курса авылларында) Президент сайлаулар электрон юл белән үткәрелде.
Өйләгә кадәр сайлаучылар бик актив булды. Сәгать 12гә сайлаучыларның 60 проценты үзләренең гражданлык бурычларын үтәгән иде.
– Арча муниципаль районы территориясендә сайлаулар тыныч үтте, – диде Россия Федерациясе Эчке эшләр министрлыгының Арча районы буенча бүлеге җитәкчесе Айдар Баһавиев. – Һәр участокта да полиция хезмәткәрләре дежур торды, тәртип бозулар булмады.