Туры түләүләр тормышка ашырыла

Туры түләүләр тормышка ашырыла
2015 елның 1 июленнән Татарстан Республикасы территориясендә Россия Федерациясе социаль иминият фондының “Туры түләүләр” дигән пилот программасы тормышка ашырыла.
Шушы көннән пособиеләрне эш бирүчеләр түгел, ә дәүләт учреждениесе филиаллары – Россия Федерациясе социаль иминият фондының Татарстан Рес- публикасы буенча төбәк бүлекчәсе исәпли һәм акчаны турыдан–туры хезмәткәрнең банктагы счетына күчерә яки почта аша җибәрә.
Биредә сүз йөклелек һәм бала табу, йөклелекнең иртә срогында исәпкә басу, бала тугач, баланы караган өчен, авыру сәбәпле вакытлыча эшкә яраксызлык буенча (больничныйлар), производствода зыян күргән кешегә өстәмә ял өчен пособиеләр түләү керә. Әлегә кадәр ул хезмәткәр эшләгән оешма аша башкарыла иде. Ягъни социаль иминият фонды акчаны башта оешмага күчерә, ә тегесе үз чиратында хезмәткәргә бирә.
Безнең редакциядә дә соңгы вакытта социаль иминият фонды тарафыннан акча күчерү очраклары булды. Бер егетебез авырып хастаханәгә керде. Больничный акчасы вакытында исәпләнеп, 10 көн эчендә банктагы счетына күчте.
– Шушы көннәрдә генә декрет ялына киткән хезмәткәребез рәхмәт әйтеп шалтыратты. Йөклелек акчасын ул да 10 көн эчендә алган, – ди баш хисапчыбыз Рәзинә Тимергалиева.
Дөрес, безнең редакция элек тә пособиеләрне тоткарлыксыз, үз вакытында түләп бара иде. Әмма бар оешма да андый түгел бит. Пособиеләрне берничә ай буена түләмичә йөрткәннәре булган. Шуларда эшләгәннәр өчен бик уңай булды бу “Туры түләүләр” дигән пилот программасы. Ул акчалар хәзер кайсы оешмада эшләвеңә карамастан, гарантияле рәвештә 10 көн эчендә күчерелә.
– Пилот программасының иминиятләнгән хезмәткәр өчен беренче өстенлеге дә шунда. Моның белән пособиеләрнең күләме дә, исәп–хисап ясау формасы да үзгәрми, шул килеш кала,– диде социаль иминият фондының Арча районындагы 8нче филиалы директоры Әлфия Җиһаншина. – Моннан тыш пособие белән хезмәт хакы түләү вакытлары бер–берсе белән бәйләнми, эш бирүченең финанс хәленә карамастан, пособие алу гарантияләнә, ялган больничный бланклары кулланып эш итүче мошенникларга да юл ябыла. Бу программаның оешмалар өчен дә уңайлыгы бар. Беренчедән, пособие түләмәү әйләнештәге акчаны янга калдыру мөмкинлеге бирә, аннан отчет төзү процессын да җиңеләйтә.
Оешма бирмәгәч, хезмәткәргә пособие акчасын кайдан алырга соң? Элеккечә үк ул пособие алу өчен кирәкле булган документларны эш бирүчегә тапшыра. Шуңа өстәп акчаны күчерү өчен банктагы счет реквизитларын, булмаса, почта адресын төгәл күрсәтеп, гариза яза. Ә эш бирүче әлеге документларның үзенә кагылышлы өлешен тутырып, 5 календарь көннән дә соңга калмыйча, социаль иминият фондының Арча районындагы 8нче филиалына бирә. Алда әйтелгәнчә, фонд филиалы 10 көн эчендә акча күчерә. Тик пособие алучыга документларны тутырганда игътибарлы булырга, ялгышлыклар җибәрмәскә кирәк.
Сорауларга җавапларны филиалның кайнар линиясенә 293–82–19 номеры буенча шалтыратып алырга мөмкин.
Гөлсинә Зәкиева