Эш урыннарын Интернет табарга булыша

Эш урыннарын Интернет табарга булыша
Хезмәт һәм мәшгульлек буенча федераль хезмәт яңа проект – “Россиядә эш” (http://trudvsem.ru/) порталы башлап җибәрде. Сайтта гражданнар эш, ә җитәкчеләр эшче, хезмәткәрләр таба алачак. Хезмәт урыннары турындагы мәгълүматлар бөтен Россия буйлап җыелган. Бу хакта тулырак мәгълүмат бирүен сорап район хезмәт һәм мәшгульлек үзәге җитәкчесе Гөлфия Низамовага мөрәҗәгать иттек.
– Ваканцияләрнең гомумроссия базасын булдыру нигә кирәк?
– Портал базасында илнең барлык төбәкләрендәге эш урыннары турында мәгълүматлар тупланган. Шуның ярдәмендә кайсы төбәктә телисең, шунда хезмәт урыны табарга була. Моннан тыш, мәгълүматны ачыклау өчен портал эш бирүче белән элемтәгә керү, хәтта читтән торып, скайп аша аралашу мөмкинлеге дә бирә.
– Порталның өстенлеге нәрсәдә?
– Иң мөһиме, “Россиядә эш” порталы хезмәте эш эзләүчеләр өчен дә, эш бирүчеләргә дә бушлай. Аннан андагы мәгълүмат тикшерелгән һәм дөрес, вакансияләр дә кабатланмый. Мәгълүматлар даими яңартылып тора. Моннан тыш портал мошенниклардан ышанычлы сакланган.
– Вакансияләрдән тыш аннан тагын нәрсә белеп була?
– Ул бик күп мәгълүмат бирә. Каядыр күченеп китәсең, тору урыныңны үзгәртәсең икән, порталда ул төбәкләрдә яшәү шартлары турында белергә мөмкин. Күрсәтмә интерактив формада, карта ярдәмендә. Барлык төбәкләр социаль–икътисади күрсәткечләр буенча рейтингка тезелгән. Мәсәлән, фатир бәяләре, гомумән, бәяләр, уртача хезмәт хакы, төбәк буенча эшсезлек, икътисади үсеш темпы, балалар бакчасына чират һәм башкалар нинди дәрәҗәдә. Вакансияләр социаль объектлар да булган торак пунктның интерактив тактасына төшерелгән. Хезмәт урыны уңайлы урнашканмы, шул тирәдә медицина учреждениеләре, мәктәпләр, балалар бакчалары бармы – алдан белеп, мөмкинлекне бәяләп куярга була. Киләчәктә җәмәгать транспорты белән хәлнең ничек торуы турында да мәгълүмат куелачак.
– Портал белән ничек эшләргә?
– Дәүләт хезмәте порталына теркәлергә генә кирәк. Хәзер аның 15 миллион кулланучысы бар. Һәм аларның барысы да өстәмә теркәлмичә “Россиядә эш” порталыннан файдалана ала. Хезмәт “мәйданчык” кебек корылган. Эш бирүчеләр, хезмәт урыны эзләүчеләр җиңел генә бер–берсен таба. Компанияләр турыдан–туры буш эш урыннары һәм хезмәткәрләргә үзләренең таләпләре, эш эзләүче үзе турында мәгълүматлар бастыра. Үзенә яраклы эш тапкан кеше сорау белән хат җибәрә һәм очрашу турында килешә ала.
– Ә аның үзеңә яраклысын порталда ничек табып алырга соң?
– Порталда уңайлы эзләү системасы бар. Аерым һөнәр, я булмаса, билгеле бер хезмәт хакы буенча, яки торак мәсьәләсе хәл ителгән эш урыннары табарга мөмкин.
– Мәгълүматлар базасы ничек төзелә?
– Берничә юл белән. Роструд (хезмәт һәм мәшгульлек федераль хезмәте) зур оешмалар белән килешүләр төзи. Мәшгульлек үзәгендә булган мәгълүматлар да бирелә. Гомумән, эшче яки хезмәткәр кирәк булган һәр эш бирүче вакансияләре турында яза ала.
– Ә ниндирәк вакансияләр табарга була?
– Ниндие кирәк. Бүгенгә төзелештә эшче куллар җитешми. Табиблар, шәфкать туташлары, транспорт белән идарә итүчеләр һәм башкалар кирәк. Арча районы мәшгульлек үзәге көн дә Рострудка Арча районы буенча соралган вакансияләр турында мәгълүматлар җибәреп тора. Интернеты булмаган гражданнар безнең үзәктә урнашкан компьютердан килеп карый ала.
Гөлсинә Зиннәтова