Ралина йөрергә тиеш

Ралина йөрергә тиеш
Капкадан керүгә әниләре кочагында сентябрь кояшына изрәп йоклап яткан песи балаларына күз төште. Тукталып шуларга сөеп карап тордык. Янәшәдә генә куян кетер-кетер кишер кимереп йөри. Ул помидорлар кып-кызыл булып утыра. Бу йортның ишегалдыннан ук үзенә бертөрле тәртип, җылылык сирпелә.
Шау-гөр килеп өйгә кердек. Безне коляскада утырган Ралина елмаеп каршы алды. Әнисе Эльвира, дәү әнисе Венера ханым сөенечләреннән нишләргә белмәде. Кызларының хәлен белергә, аның күңелен күрергә килгәннәр бит. Олы апалары, абыйлары гына түгел, дуслары, балалар да килгән. Күңелле ыгы-зыгы башланды: ул арада Ралина шалкан булды, иптәшләренең кайсы әби, бабай, кыз, эт, песи, тычканга әверелде. “Шалкан” әкияте һаман да өр-яңа, аны һәрвакыт беренче тапкыр күргәндәй, ишеткәндәй кабул итәсең. Соңыннан балалар сөенешеп кул чапты. Аннан китте уеннар, бергәләшеп фотога төшүләр. Педагог-психолог Эльвира Һадиева, музыка җитәкчесе Ләйсән Галиева балалар арасында бөтерелеп йөрде.
– Нинди матур курчаклар белән килгәнсез, – дип соклануымны яшерә алмадым.
– Без быел 304 мең сумлык грант оттык, – дип сөйләде балаларны тернәкләндерү үзәге җитәкчесе Наилә Самие- ва. – Менә шуңа әкият геройлары курчакларны алдык. Курчаклар бик матур. Балалар бик ярата. Мөмкинлекләре чикләнгән балалар өчен менә дигән дәва алар. Өйләргә барып та курчак- лар белән дәвалыйбыз.
Балаңның йөри алмавы – бу нарасыеңны аякка бастыру өчен көрәш тә. Зәвык белән киенгән Эльвира ханымның елмаеп фотоларга төшереп йөрүен күреп мин күңелемнән генә аны: “Афәрин!” – дип куәтләдем. Чөнки аңа сыгылып төшәргә, төшенкелеккә бирелергә һич ярамый.
– Берьюлы Арча телевидениесеннән безне күрсәткәч, син елмаеп йөрисең ич дип, гаҗәп- ләнүләрен белдерүчеләр булды, – дип сөйли Эльвира.
Әйе, безгә бу өлкәдә алга киткән илләр дәрәҗәсенә күтәрелергә кирәк әле. Мөмкинлекләре чикләнгәннәр дә безнең кебек кешеләр, аларның да башкалар кебек яшәргә, белем алырга, эшләргә, ял итәргә хокуклары бар. Иң мөһиме – кеше арасына чыгу, үз эченә бикләнмәү. Алар гарип әхлаклы кешеләргә караганда бәхетлерәк тә әле. Безгә әнә шуларны кызганырга кирәк.
Ралина иптәшләре белән бочче уйный, ярышларда җиңү яулый. Спортта уңышка ирешкәне өчен район башкарма комитеты җитәкчесе Илшат Нуриев биргән Мактау грамотасы да түрдә тора. 13 яшьлек Ралинаның бөтен хыялы йөреп китү. Быел аның бу хыялы тагын да ныгыган. Тольятти кызының “Согаз” ширкәте ярдәме белән чит илләрдә дәваланып йөри башлавын ишеткән Ралинада “йөрү!” максаты тагын да ныгыган. Кыз игелекле кешеләрнең ярдәменә ышана.
Ралина йөрергә тиеш. Диңгезгә барганда әнисе Ралинаны үзеннән калдырмый. Икенче ел рәттән Абхазиядә ял итеп кайталар.
– Диңгездә су коенырга яратам, – ди Ралина. – Суга батырмый торган җайланманы киям дә эчкә кадәр кереп китәм. Шулай рәхәт миңа.
Румия Надршина