Орлыкны бүгеннән әзерлә

Орлыкны бүгеннән әзерлә
Сайтыбызда үткәрелүче бәйгегә Иске Ашыттан Тәлгать Борһанов 1350 граммлы бәрәңге җибәргән. Әлегә аны узучы юк. Әмма бу рекорд та яңармас дип әйтеп булмый.
“Ак барс” агрокомплексы” ширкәтендәге уңышны күргәч баш агроном Рөстәм Мөхәммәдиевтән иң зур бәрәңгене үлчәүләрен сораган идем.
— Бер бәрәңге 1340 грамм килде, — диде ул. — Аннан зурраклары да чыккан иде.
Курса–Почмактагы баз түшәмгә кадәр эре–эре бәрәңгеләр белән тулган. Җилләтү системасы эшли, температураны көйләп торалар. Бу хуҗалыкта бәрәңге алу, нәкъ элекке еллардагы кебек, бөтен халык эшенә әверелә. Дөрес, хәзер кул хезмәте азая бара, ике комбайн эшли. Өч мәктәп, Үрнәктәге агрокөллият укучылары булыша.
Күпчелек хуҗалыклар игеннәрне урып–җыюны төгәлләде. Район буенча бер гектардан уртача уңыш — 29 центнер.
— Республика Авыл хуҗалыгы һәм азык–төлек министрлыгы 15 августтан 15 октябрьгә кадәр орлык салу икеайлыгы игълан иткән иде, — ди район авыл хуҗалыгы һәм азык–төлек идарәсенең үсемлекчелек бүлеге җитәкчесе Миннәхмәт Сәгыйтьҗанов.
— Безнең район хуҗалыклары шушы икеайлыкта 13338 тонна сабан культуралы орлыклары салырга тиеш. Аларны дәүләт стандарты таләпләренә туры китереп салырга, киптерергә, чистартырга һәм Россия авыл хуҗалыгы үзәге филиалында тикшертергә. Орлык сата торган хуҗалыклар сертификат алырга тиеш.
Баш белгеч әйтүенчә, быел орлык салу өчен табигый шартлар уңай килмәде, август аендагы яңгырлар комачаулык итте. Бүгенге шартларда алдан дымлылыкны һәм тишелешне тикшертергә кирәк. Чөнки дымлы орлыкның тишелеше көннән–көн кими бара. Киптерү җайланмасы булмау, орлыкны гел читтән алу хуҗалыкны упкынга алып бара.
Районда өч орлыкчылык хуҗалыгы бар. “Ак барс” агрокомплексы”, “Курса МТСы”, “Игенче” ширкәтләре югары репродукцияле орлыклар әзерли алырлык куәтле матди–техник базага ия.
Хәзерге вакытта орлык- ларның 91 проценты салынган, ә ул 100 процент булырга тиеш. “Акчишмә”, “Ак барс” агрокомплексы”, “Кырлай”, “Аю”, “Ватан”, “Курса МТСы”, “Игенче”, “Татарстан”, “Северный” хуҗалыклары җитәрлек кадәр орлык салып куйдылар. Ә менә “Арча”, “Мәрҗани” ширкәтләренә бу мәсьәләдә шактый тырышырга кирәк әле.
Заманында киптерү, чистарту җайланмалары һәр хуҗалыкта бар иде. Быел “Татарстан” ширкәтендә “ЗАВ–40” җайланмасын, ашлык киптергечне сафка бастырдылар. Тәүлеккә 100 тоннага якын ашлыкны чистартып, киптереп була, орлык әзерләү проблемасы да хәл ителгән.
Ильяс Фәттахов