Бернәрсәсез калдырды

Бернәрсәсез калдырды
Иртән торып кап–кара болыт каплаган күк йөзен күрдем дә, Сәрия апа белән Магданур абыйның кара күмергә калган өйләре янына килеп, чарасызлыктан ни эшләргә белми аптырап калган йөзләрен, яшь каплаган күзләрен күз алдыма китереп, эсселе–суыклы булып киттем. Сентябрь тәмамланып килә, алда салкын кыш. Булганның кадерен белеп, алган пенсияләренең рәхәтен күреп, тыныч кына яшисе урынга, бу ике өлкән яшьтәге кешенең башына тагын алга таба ничек яшисе, өр–яңадан тормышны ничек корасы, дигән уйлар килеп басты.
Хәтерләсәгез, 8 сентябрь коточкыч ямьсез, җилле көн иде. Кайдадыр бик каты яңгыр, боз яуды, бина түбәләрен кубарып атты. Яшене ялт та йолт килде. Шул яшен төн уртасында Южная урамындагы 47нче ике фатирлы йортны сугып, ике гаиләне бернәрсәсез урамда калдырды. Дөрес- рәге, нәкъ йорт турысындагы агач багананы суга ул, ә чыбык аша өйгә үтеп керә.
– Урамда агач ут баганаларын ташына алыштыра башлаганнар иде. Безнең турыга җитте дә туктады. Гөнаһ шомлыгына каршы, нәкъ менә шул алыштырылмаган агач багананы сукты да инде яшен. Аннан икенче көнне үк килеп таш багана утыртып киттеләр, тик…эш беткән, терсәкне тешләүдән файда юк иде. Өйне калай белән тышлап, түбәне калайдан япкан идем. Өйнең эчке ягын заманча итеп эшләп чыктым. Әле күптән түгел генә канализация үткәрдек. Дүрт ел буе төзекләндерү эшләре алып барып, быел тәмамлаган идек кенә. Ял итәрмен, балыкка йөрермен, дип хыялландым. Менә картлык көнебездә бер тиенсез урамда утырып калдык, – ди яшерен генә күз яшьләрен сөртеп Магданур абый.
Олы яшьтәге ир кешенең күзендә яшь күрү күңелне сыкрандырды. 60 яшьлек Сәрия һәм 65 яшьлек Магданур Җамалиевларга хәзер кая барырга?
– Өй салу көчтән килми инде. 50 яшьләр тирәсендә булсак та, тырышып карар идек әле. Рәхмәт, күршеләр ярдәм итә. Мәрхәмәтлек үзәге киемнәр бирде. Һади Такташ урамында әби–бабайдан калган кечкенә генә иске (1946 елда салынган) йортыбыз бар иде. Аңа газ да, су да, ут та кермәгән. Шунда урнашырга мәҗбүр булдык. “Водоканал–Сервис” ширкәте бушка су кертеп бирде. “Йортыбыз янды, безне түләүләр исемлегеннән сызып атыгыз инде”, – дип менгән идем. Җитәкчесе Тәлгать Миндубаев шунда ук ярдәм итәргә алынды. Зур рәхмәт аңа һәм су керткән егетләргә. Район башлыгы Илшат Нуриев та махсус үзе төште. Яңа Кенәрдән вакытлыча торырга фатир бирделәр. Тик безнең барыбер йорт салырлык яки сатып алырлык мөмкинлегебез юк. Газ кертергә ярдәм итсәләр, бәлки, шушы иске йортны гына яшәргә яраклы хәлгә китерергә тырышыр идек, – диләр Җамалиевлар.
Икенче фатирда яшәүче 60 яшьлек Дания Либцегер һәм Гафур Нәфыйковның бөтенләй торыр урыннары юк.
– Кешеләрнең ваемсызлыгы аптыратты мине. Халык ярдәм итәргә түгел, кызык карарга килгән. Балаларда кечкенәдән әхлакый тәрбия бирергә кирәк. Әнә бу юлы 21–25 яшьләр тирәсендәге бер егет, кем икәнен дә белмибез, безнең тирәнеке түгел, киемнәрен салып гөрләп торган ут эченә кереп китеп, ирем Вакыйф белән гараждан машинаны этеп чыгарды. Шундыйлардан үрнәк алсыннар иде, – ди күршеләре Гүзәлия Миннәхмәтова. – Ә менә үзебезнең урам халкы белән горурланам. Берсүзсез ярдәм кулы суздылар.
– Янгында көчегебез белән песи балабыз да янып үлде. Алар да җан ияләре. Песи баласының әнисе көн дә янган өйгә менеп, үзенчә елап, җирне тырный–тырный баласын эзли. Минем дә ут юкка чыгарган тормышымны, хәләл көчем белән җыйган байлыгымны кайтару өчен җиргә ятып тырныйсым килә, – ди ике инфаркт, бер инсульт кичергән Магданур Җамалиев. – Ярдәм сорап оешмаларга мөрәҗәгать итеп карадым. Файдасыз. Күршеләремә рәхмәт. Гүзәлияләр дә, Зөлфирә Хәйруллина да булышырга гына торалар. Бәлкем, шундый изге күңелле кешеләр табылыр. Кешеләр, бөтен ышаныч сездә, ярдәмегездән ташламасагыз иде. Бүген без сезнең мәрхәмәтлеккә мохтаҗ.
АКЧА КҮЧЕРЕРГӘ ТЕЛӘҮЧЕЛӘР ӨЧЕН
БАНК РЕКВИЗИТЛАРЫ: Банк получателя Доп офис №8610/0679
Кор/счет банка 30101810600000000603
БИК банка 049205603
Счет получателя 42307810362165009929
Ф.И.О получателя: Замалиев Магданур Шириазданович
Гөлсинә Зәкиева