Һәр өлкәдә – Монтессори–терапия хезмәте

Һәр өлкәдә – Монтессори–терапия хезмәте
Мөмкинлекләре чикләнгән балалар һәм яшүсмерләр өчен “Өмет чыганагы” тернәкләндерү үзәге эш үрнәге бөтен республикага таныш, дисәк, ялгыш булмас. Наилә Сәмиева җитәкчелегендәге коллектив мөмкинлекләре чикләнгән балаларны рухи, физик яктан ныгыту, үстерү өчен төрле ысуллар куллана. Моның өчен үзәктә бөтен мөмкинлекләр бар.
– Без республика күләмендә үткәрелгән төрле бәйгеләрдә катнашып, грантлар отабыз. Шул акчага көндәлек эштә кирәкле җиһазлар сатып алабыз, – диде үзәк җитәкчесе Наилә Сәмиева. – Авыл җирлегендә яшәүче инвалид балаларны социаль тернәкләндерү формасы буларак, “Монтессори–терапия хезмәте” проекты буенча Россия бәйгесендә җиңеп чыгып, грант оттык. Акчасына шушы юнәлештә эш алып бару өчен кабинет җиһазладык, белгечләрне укыттык. Хәзер төркемнәрдә шәхси дәресләр алып барабыз.
Арча педагогика көллия- тендә булган республика семинары “Өмет чыганагы” тернәкләндерү үзәге өчен сынауга тиң булды. Ул “Авыл җирлекләрендә яшәүче инвалид балалар өчен социаль тернәкләндерү формасы буларак “Монтессори – терапия хезмәте” проекты буенча нәтиҗә ясау семинары иде. Арча балаларны тернәкләндерү үзәге белгечләре бу көнне эш тәҗрибәләре белән уртаклашты. Күргәзмә дә оештырылган иде.
Семинарда Татарстан Республикасы хезмәт, мәшгульлек һәм социаль яклау министры урынбасары Ирина Просвирякова катнашты һәм чыгышында социаль хезмәткәрләргә киңәшләрен бирде, үзгәрешләр, яңалыклар белән таныштырды.
– Арча районында балалар һәм өлкәннәрне тернәкләндерү буенча берничә учреждение эшли. Шуларның берсе – балаларны тернәкләндерү үзәге. Коллектив республика күләмендә мактаулы. Аның “Монтессори–терапия хезмәте” проекты буенча эш алымнары башкаларга үрнәк итеп куярлык, – диде ул.
Бу педагогларның чыгышларыннан ук күренде. Алар үз хезмәтләре турында сөйләп кенә калмадылар, видеофильм аша балалар белән дәрестә шөгыльләнү вакытларын да күрсәттеләр. Музыка җитәкчесе Ләйсән Галиева Монтессори материалларын музыка, тәрбияче Зөлфия Кәримуллина математика дәресләрендә ничек куллануы турында сөйләде. Педагог–психолог Эльвира Һадиева баланы психик яктан үстерүдә дә Монтессори–терапиянең роле зур булуы турында видеомисал белән аңлатты. Логопед Лемара Ганиеваның шушы ысулны сөйләм телен үстерүдә, тәрбияче Фәния Мусолямова әйләнә–тирәбез белән танышуда бик уңышлы куллануы турында белдек.
– Алдында күп әйбер булудан бала сайлау мөмкинлеге күрә. Эшләп карый, ялгыша, яңадан тотына. Шулай һәр әйбернең үз урыны барлыгын аңлый, – ди Эльвира Һадиева. – Монтессори мохитендә кул хәрәкәтләре өчен да, баш миен эшләтү, уйлау, фикер йөртү сәләтен арттыруга да материаллар күп.
– Белгечләрнең хезмәт тәҗрибәләре бик кызык- лы, яхшылап уйланылган. Миңа бик ошады, – диде Баулы районыннан социаль педагог Нәфисә Нургалиева.
Социаль яклау өлкәсе хезмәткәрләре бу көнне фикер дә алыштылар, үз тәҗрибәләре белән дә уртаклаштылар, соңыннан “Өмет чыганагы” тернәкләндерү үзәгендә булып, арчалыларның эшләрен үз күзләре белән күреп киттеләр. Семинарда район башкарма комитеты җитәкчесе урынбасары Рамил Гарифҗанов катнашты һәм, гомумән, районда социаль яклау системасының эше турында мактап әйтеп үтте.
Гөлсинә Зәкиева