Бушлай дарумы, әллә акчамы

Бушлай дарумы, әллә акчамы
Районда барысы 8532 кеше ташламадан файдалана. Бөек Ватан сугышында, сугышчан хәрәкәтләрдә (Әфганстан, Чечня һ.б.) катнашучылар, I, II, III төркемдәге инвалидлар бушлай шифаханәләрдә дәвалана, транспортта йөри, медикаментлардан файдалана ала. Әлеге социаль пакет киләсе елда 930 сум 3 тиен тәшкил итәчәк.
Транспортка – 102 сум 80 тиен, шифаханәләргә – 110 сум 83 тиен, иң күбе даруларга – 716 сум 40 тиен каралган. Кызыгырлык акчамы? Ташламадан файдаланырга хокуклы 8532 кешенең бүген 71,2 проценты бушлай хезмәтләрдән баш тарткан. Күпчелек акчасын алу ягында. Ни өчен? Кызыксынып, сораштырулар үткәрдем. Җаваплар бер төрлерәк булды: “Туйдым мәшәкатеннән”, “Кыйммәтле даруны барыбер бирмиләр”.
Моннан берничә ел элек бер ир кеше:
– Бәвел юлында теге өч хәрефле чирне таптылар, – дип күз яшләре белән елаган иде. – Бер даруы гына да 10 мең сум тора, мин каян алыйм ул акчаны? Әле ул әллә ничәү кирәк. Никләр генә социаль пакетның акчасына кызыктым икән? Хәзер балалар сүгә...
Арча поликлиникасы мөдире Лилия Фәйзрахманова:
– Дөрес, мәшәкате бар, – дип сөйләде. – Дәүләт акчасы белән бәйләнгән даруларны табиб каравыннан, язу процедурасыннан башка берничек тә җибәреп булмый. Тормышта авыру белән көтелмәгән хәлләр килеп чыгарга мөмкин. Андый очраклар бар. Менә II типтагы шикәр чире белән авыручы бер әбинең чире көчәеп китеп, инсулинга калды. Ә авыруга бер айга 2,5 мең сумлык инсулин кирәк. Әби ташламалы дарулардан баш тарткан булган. Кыен хәлдә калды. Ак канлылык чирен дәвалау өчен бер ампула 120 мең сум тора. Бу чир белән бәйле очраклар да булгалады. Бушлай медикаментлардан файдалану – ул үзеңне, тормышыңны алдан иминиятләп кую.
...Кичке сәгать 5тән соң Арчаның 29нчы дәүләт даруханәсенә кердем. Гадәттә аптекадан кеше өзелми. Урта яшьләрдәге ханым белән сөйләшәбез.
– Миндә шикәр чире, – диде ул. – 25 ел инде даруда. Акчасын алмыйм, бушлай дарулардан файдаланам. Уңайлы.
Өлкән яшьтәге Рәшидә апа:
– Картым шушы дарудан башка тора алмый, – дип алган даруын күрсәтте. – Менә шушы ингаляция дару бәясе 1 мең сумнан артык. Сулый алмый интегә. Хәзер, Аллага шөкер, телефоннар эшли. Даруханә белән элемтәдә торабыз. Акчасын түгел, даруын алабыз.
Онкология чиреннән дәваланган Наилә ханым да даруга килгән.
– Шалтыратып белештем дә, килеп җиттек, – диде ул елмаеп. – Ярый әле дәүләтнең бушлай дарулар программасы бар. Нишләр идек...
29нчы даруханә мөдире Лилия Хәкимова быелгы үзгәрешләр турында әйтте:
– 1 июльдән ташламалы исемлектән кайбер дарулар төшеп калды, ә кайберләре өстәлде.
– Ни өчен кайбер авырулар үзләре теләгән кыйммәтле ташламалы даруны ала алмый?
– Бер даруның аналоглары берничә булырга мөмкин, – дип аңлатты Лилия Мансуровна. – Аларны төрле фирмалар җитештерә. Исемнәре, бәяләре төрле булса да, аларның дәвалау нәтиҗәсе бер төрле. Әгәр дә даруның дәвалау нәтиҗәсе юк икән, бу турыда табибка әйтергә кирәк.
Арча һәм Әтнә районнары буенча Пенсия фонды идарәсе җитәкчесе Рузия Нурмөхәммәтова киңәш итә:
– 1 октябрьгә кадәр вакыт бар әле, социаль пакеттан файдаланырга теләүчеләр Пенсия фондына килеп гариза яза алалар.
Румия Саттарова

Бушлай дарумы, әллә акчамы
Районда барысы 8532 кеше ташламадан файдалана. Бөек Ватан сугышында, сугышчан хәрәкәтләрдә (Әфганстан, Чечня һ.б.) катнашучылар, I, II, III төркемдәге инвалидлар бушлай шифаханәләрдә дәвалана, транспортта йөри, медикаментлардан файдалана ала. Әлеге социаль пакет киләсе елда 930 сум 3 тиен тәшкил итәчәк.
Транспортка – 102 сум 80 тиен, шифаханәләргә – 110 сум 83 тиен, иң күбе даруларга – 716 сум 40 тиен каралган. Кызыгырлык акчамы? Ташламадан файдаланырга хокуклы 8532 кешенең бүген 71,2 проценты бушлай хезмәтләрдән баш тарткан. Күпчелек акчасын алу ягында. Ни өчен? Кызыксынып, сораштырулар үткәрдем. Җаваплар бер төрлерәк булды: “Туйдым мәшәкатеннән”, “Кыйммәтле даруны барыбер бирмиләр”.
Моннан берничә ел элек бер ир кеше:
– Бәвел юлында теге өч хәрефле чирне таптылар, – дип күз яшләре белән елаган иде. – Бер даруы гына да 10 мең сум тора, мин каян алыйм ул акчаны? Әле ул әллә ничәү кирәк. Никләр генә социаль пакетның акчасына кызыктым икән? Хәзер балалар сүгә...
Арча поликлиникасы мөдире Лилия Фәйзрахманова:
– Дөрес, мәшәкате бар, – дип сөйләде. – Дәүләт акчасы белән бәйләнгән даруларны табиб каравыннан, язу процедурасыннан башка берничек тә җибәреп булмый. Тормышта авыру белән көтелмәгән хәлләр килеп чыгарга мөмкин. Андый очраклар бар. Менә II типтагы шикәр чире белән авыручы бер әбинең чире көчәеп китеп, инсулинга калды. Ә авыруга бер айга 2,5 мең сумлык инсулин кирәк. Әби ташламалы дарулардан баш тарткан булган. Кыен хәлдә калды. Ак канлылык чирен дәвалау өчен бер ампула 120 мең сум тора. Бу чир белән бәйле очраклар да булгалады. Бушлай медикаментлардан файдалану – ул үзеңне, тормышыңны алдан иминиятләп кую.
...Кичке сәгать 5тән соң Арчаның 29нчы дәүләт даруханәсенә кердем. Гадәттә аптекадан кеше өзелми. Урта яшьләрдәге ханым белән сөйләшәбез.
– Миндә шикәр чире, – диде ул. – 25 ел инде даруда. Акчасын алмыйм, бушлай дарулардан файдаланам. Уңайлы.
Өлкән яшьтәге Рәшидә апа:
– Картым шушы дарудан башка тора алмый, – дип алган даруын күрсәтте. – Менә шушы ингаляция дару бәясе 1 мең сумнан артык. Сулый алмый интегә. Хәзер, Аллага шөкер, телефоннар эшли. Даруханә белән элемтәдә торабыз. Акчасын түгел, даруын алабыз.
Онкология чиреннән дәваланган Наилә ханым да даруга килгән.
– Шалтыратып белештем дә, килеп җиттек, – диде ул елмаеп. – Ярый әле дәүләтнең бушлай дарулар программасы бар. Нишләр идек...
29нчы даруханә мөдире Лилия Хәкимова быелгы үзгәрешләр турында әйтте:
– 1 июльдән ташламалы исемлектән кайбер дарулар төшеп калды, ә кайберләре өстәлде.
– Ни өчен кайбер авырулар үзләре теләгән кыйммәтле ташламалы даруны ала алмый?
– Бер даруның аналоглары берничә булырга мөмкин, – дип аңлатты Лилия Мансуровна. – Аларны төрле фирмалар җитештерә. Исемнәре, бәяләре төрле булса да, аларның дәвалау нәтиҗәсе бер төрле. Әгәр дә даруның дәвалау нәтиҗәсе юк икән, бу турыда табибка әйтергә кирәк.
Арча һәм Әтнә районнары буенча Пенсия фонды идарәсе җитәкчесе Рузия Нурмөхәммәтова киңәш итә:
– 1 октябрьгә кадәр вакыт бар әле, социаль пакеттан файдаланырга теләүчеләр Пенсия фондына килеп гариза яза алалар.
Румия Саттарова