Эш беткәч уйнарга ярый

Эш беткәч уйнарга ярый
Хәер, төзүчеләрнең эше ел буе бетми. Әле менә август аендагы бәйрәмнәрен дә, кызу эш өстенә комачаулык китермәсен дип, сентябрьгә күчерделәр.
Узган шимбәдә “Арча КСМы” ширкәте коллективы, ветераннар шәһәрнең көньяк өлешендә үзләре төзегән күп функцияле үзәктә җыйналды.
— Сез районда иң зур төзү оешмаларының берсе, — диде район җитәкчесе Илшат Нуриев үзенең чыгышында. — Нинди генә эшкә алынсагыз да үзвакытында сыйфатлы итеп башкарып чыгасыз. Арчаның өченче мәктәбе төзелешен 1 сентябрьгә өлгертә алырсызмы икән, дигән шигем дә бар иде. Өлгерттегез, рәхмәт сезгә!
Илшат Габделфәртович хезмәт алдынгыларына Рәхмәт хатлары тапшырды.
Ширкәт җитәкчесе Рафаэль Муллагалиев үзенең чыгышында соңгы елларда башкарылган эшләрне әйтеп үтте. 2014 елда оешма тарихында иң зур объект — 260 урынлы балалар бакчасы төзеделәр. Кызыл Бистә урамында 24 фатирлы йорт, Сикертәндә полиция участок инспекторы йорты, Пөшәңгәрдә күп функцияле үзәк, Шурабаш, Урта Курса, Түбән Мәтәскә, Арчаның 7нче мәктәпләрен ныклап төзекләндерү һ.б. Барысы 192 млн. 190 мең 700 сумлык.
2015 елда планлаштырылган эшләр 195 млн. 112 мең 300 сум. 1 сентябрьгә ул 93 процентка үтәлгән.
Аерым тукталсак: Арчаның 3нче мәктәбен үзгәртеп кору, 40 урынлы балалар бакчасы, ашханә һәм спорт залы булган янкорма. Күперле урамында 6шар фатирлы 2 йорт, Көнбатыш урамында 12шәр фатирлы 3 йорт, Утар Аты, Казанбаш, Өчиле, Яңа Кишет мәктәпләрен ныклап төзекләндерү, питомникта ике һәм өч фатирлы 2 йорт төзелде. М.Горький урамында 12 фатирлы йорт төзү башланды.
Җитәкче оешманың тарихына да тукталды. Аңа нигез салган, күп еллар эшләп лаеклы ялга чыккан Илдус Әһлиуллин, Хаммат Фәйзрахманов, Гөлниза Мәннанова, Кайма Муллагалиева, Валентина Лашманова, Галина Елизаветина, Ренат Насретдинов, Илсур Газизов бәйрәмдә алгы рәтләрдә утырдылар.
Үз хезмәтләренең осталары булган Инсаф Борһанов, Алинә Вафина, Гөлназ Гыйбадуллина, Гүзәл Гыйниятуллина, Азат Җәләлетдинов, Айсылу Мангуткина, Салават Нуриев, Нәзирә Рәхимуллина, Фоат Садриев, Наил Талипов, Айдар Хәбиров, Илназ Хәлиуллин, Ленар Хөсәенов бүгенге уңышларга иң зур өлеш кертүчеләр.
Бәйрәм матур концерт номерлары, алдынгыларны бүләкләүләр белән дәвам итте.
Кич шәһәрнең Җиңү паркында Төзүче көненә ба- гышланган бәйрәм чаралары оештырылды.
Ильяс Фәттахов