Арчада “Татарстан кроссы–2015” булды

Арчада “Татарстан кроссы–2015” булды
25 сентябрьдә Арча хакимияте хезмәткәрләре беренчеләрдән булып ГТО нормаларын тапшырды. Алар йөгерде дә, урыннан озынлыкка да сикерде. Ирләр гер күтәрсә, хатын–кызлар аркылы борыска тотынып тартылды. Шулай ук хезмәткәрләр башка спорт төрләре буенча да үзләрен сынап карады.
Ә 27 сентябрьдә Арчада “Татарстан кроссы–2015” массакүләм йөгерү булып узды. Анда төрле предприятие, учреждение, оешмалардан, мәктәпләр, уку йортларыннан 649 кеше катнашты. Ярышлар “Арча” балалар һәм яшүсмерләр спорт комплексы янында башланып китте. Стартны район башлыгы Илшат Нуриев бирде.
– Барыгызны да бу спорт бәйрәме белән чын күңелдән котлыйм, – диде ул йөгерешчеләргә мөрәҗәгать итеп. – Кросс халыкны спортка тарту, сәламәт яшәү рәвеше булдыру максатыннан үткәрелә. Быел без аңа үзгәреш кертеп, башка зур шәһәрләрдәгечә, шәһәрнең үзәк урамында массакүләм итеп үткәрергә булдык. Сезгә уңышлар, җиңү шатлыгы телим. Хәерле сәгатьтә.
Йөгерешчеләр Интернационал, Зур урам буйлап Арчаның бишенче гимназиясенә кадәр бардылар. Гимназия янында аларны җанатарлар каршы алды. Ирләр арасында беренче булып Адель Мөҗипов килде. Рөстәм Яруллин, Азамат Идиятуллин аннан беразга гына калышып, икенче, өченче урыннарны яуладылар. Кызлардан Алина Гаранина беренчелекне бирмәде. Айгөл Миндубаева, Зөһрә Ситдыйкова икенче һәм өченче килде.
– Күптәннән йөгергән юк иде инде. Үземнең өлгерлегемне, көчемне сынап карау өчен яхшы булды әле бу, – диде финиш сызыгын тугызынчы булып үткән “Жилкомбытсервис” ширкәте җитәкчесе Альберт Хәкимов.
– Альберт спорт белән бик дус. Әле дә футбол уйный, – дип мактап та куйдылар үзен янындагылар.
– 32нче булып килсәм дә, минем өчен беренчелекне алуга тиң булды бу. Элек йөгерә идем. Шул чакларны искә төшердем, – ди Татарстан Республикасы хәрби комиссариатының Арча һәм Әтнә районнары буенча бүлек җитәкчесе урынбасары Фәнил Сафиуллин.
Хезмәт ветераннары 72 яшьлек Ягьфәр Шәмиев белән 66 яшьлек Руфина Гәрәева да яшьләрдән калышмаган. Ягьфәр Шәмиевның оста чаңгычы булуын беләбез. Яхшы йөгерешче дә икән бит әле ул.
– Сабантуенда да йөгереп, алдынгылыкны бирмәдем. Кроссларда катнашып та беренче урыннарны яуладым. ГТО нормаларын да бик яхшы тапшырдым. Яшьтәшләрем арасында. Педагогика көллияте командасы составында волейбол да уйнадым. Спорт белән шөгыльләнү көр күңелле булырга мөмкинлек һәм дәрт бирә, – ди ул.
Руфина Гәрәева да биш ел инде өлкәннәр арасында үткән республика ярышларында катнаша, спортның берничә төре буенча призлы урыннар яулап килә.
– Яшьтәшләрем арасында республика чемпионы да әле мин, – ди Руфина ханым.
Бишенче гимназия янында бүләкләү тантанасы да булды. Беренче ун урынны яулаганнарга, иң яшь һәм өлкән йөгерешчеләргә истәлек бүләкләре тапшырылды.
Ул көнне Арча үзәгендә дә бәйрәм гөрләде. Арча Мәдәният йорты үзешчәннәре концерт куйды. Рәсим Низамиев, Рафис Сәлахетдинов, Дамир Гасыймов, Зилә Зиннәтова, Расих Галимҗанов, Зөлфия Әүхәдиева, Данис Гайфуллин арчалыларга яраткан җырларын бүләк итте. Балалар өчен уеннар да, сату да оештырылган иде.
Гөлсинә Зәкиева