Өлкәннәр турында кайгыртып

Өлкәннәр турында кайгыртып
Өлкәннәр декадасы уңаеннан Татарстан Республикасы Министрлар Кабинетында брифинг үткәрелде.
Анда өлкәннәрнең тормыш шартлары, аларны пенсия белән тәэмин итү, социаль һәм медицина ярдәме күрсәтү, шулай ук декада барышында булачак чаралар турында Татарстан Респуб- ликасының Хезмәт, мәшгульлек һәм социаль яклау министры Эльмира Зарипова, сәламәтлек саклау министры Гадел Вафин һәм Россия Пенсия фондының Татарстан Республикасы буенча бүлекчәсе идарәчесе Марсель Имамов чыгыш ясады.
– Татарстанда 873 мең 283 пенсия яшендәге кеше санала, бу республикадагы барлык халыкның 22,7 процентын тәшкил итә. Шуларның 250 меңнән артыгы ирләр, 622 меңнән артыграгы хатын-кызлар. Димәк, республикада һәр дүртенче кеше өлкән яшьтә, – дип билгеләп үтте Эльмира Зарипова.
Ул өлкән яшьтәге гражданнарны социаль яклау системасының үсеше, аерым категория гражданнарга ташламалар, социаль хезмәткәрләр тарафыннан өлкәннәрнең өйләренә барып хезмәт күрсәтү, мөмкинлекләре чикләнгәннәрне тернәкләндерүнең техник чаралары, пенсионерларны санатор-курорт юлламалары белән тәэмин итү, теләге булганнарны эшкә урнаштыру, лаеклы ялдагыларны компьютерда эшләргә өйрәтү турында сөйләде.
– Компьютер белемен 2007 елдан 78 мең пенсионер үзләштерде. Шул исәптән “Өченче буын университеты” проекты кысаларында 18 мең, “Интернет–озын гомер” проекты буенча 23 мең кеше. Эш эзләп меңнән артык пенсионер мөрәҗәгать итте, шуларның 300гә якыны эшкә урнаштырылды, – диде Эльмира Зарипова. – Быел август аенда 80 яше тулган һәм ялгыз яшәүче пенсионерларның тормыш шартларын өйрәнү оештырылды. Урыннардагы халыкны социаль яклау бүлекләре белгечләре аларның өйләрендә булды. Тикшерүләр күрсәткәнчә, Татарстанда ялгыз яшәгән 22678 кеше бар. Шуларның кайсылары нинди ярдәмгә мохтаҗ булуын ачыклау өчен бик уңай чара булды бу. Чөнки шуның нәтиҗәсендә 307 кешене туганнары үз янына алды, 103енә социаль хезмәткәрләр өйләренә барып хезмәт күрсәтәчәк, 8е өлкәннәр өчен интернат-йортка, берсе психоневрологик интернатка урнаштырылды.
Шифаханәләргә юллама инвалидларга гына түгел, пенсио- нерларга да бирелә.
– Алдагы елларда 5–6 юллама булса, быел ул күбрәк килде. Эшләп торучы пенсионерлар да мөрәҗәгать итәргә мөмкин, – дип аңлатты халыкны социаль яклау бүлеге җитәкчесе Илдус Әһлиев.
Брифингта сораулар да булды. Икенче елга да пенсияләр күләме үзгәрерме? Бу сорауга Марсель Имамов җавап бирде:
– 2016 елда да пенсияләр артачак. Февраль аенда иминият өлеше 7,5 процентка арта, апрельдә социаль пенсиягә һәм ай саен бирелә торган акчалата түләүләргә үзгәреш кертелүе көтелә. Августта быелгы кебек үк эшләүче пенсионерлар пенсиясе күләме дә күтәреләчәк.
Социаль пакетны сайларгамы, әллә акчанымы? Бу мәсьәлә күп пенсионерларны борчый. Һәм күбесе социаль пакетны түгел, ә акчаны сайлый.
– 1 миллион 714 меңнән артык рецепт, 1 миллион сумнан артык бәягә дару бирелгән, – ди Гадел Вафин. – Яшь барган саен авырулар да арта. Даруларга бәяләр турында сөйләп тә торасы юк. 700 сумга нәрсә алып була? Шуңа бу мәсьәлә турында яхшылап уйларга, 10, 100 тапкыр артыграк түләргә туры килүе турында онытмаска кирәк.
Бу хакта бүген сөйләшергә соңга калынды инде. Чөнки сайлау мөмкинлеге 1 октябрьгә кадәр генә. Әмма алдагы еллар турында бүгеннән уйлап кую зыян итми.
Гөлсинә Зәкиева