Арчада беренче нәфис фильм

Арчада беренче нәфис фильм

“Дөрес әйтәсең, әти, безгә тиң түгел ул”, “Баланы әбисе карый, бабасы урамга йөрергә алып чыга, ял көннәрендә аның белән мин булам. Ә әнисенең вакыты юк. Болай булмый бит инде”, “Үксеп–үксеп елыйсым килде, түздем, бөтен дөньяга кычкырасым килде, тыелып калдым. Ачуланудан башка чарам калмады”, “Бервакыт гафу үтенеп килеп җитәр, без гафу итмәгән булып кыланырбыз”…Бу җөмләләрдән үк сүзнең тормыш турында барганын аңлап була. “Елый икән, елый ирләр дә” нәфис фильмыннан алар.

Ирләр бервакытта да еламый, диләр. Елый алар, әле ничек кенә елый. Кайвакыт хатын–кызларга караганда да нечкә хисле, йомшак күңелле була алар. Менә шул вакытта аларга таяныч, терәк кирәк.
Әлеге нәфис фильмның эчтәлеген сөйләп торуның кирәге юктыр. Чөнки спектакль буларак Арча сәхнәсендә генә дә ул 14 тапкыр аншлаг белән барды һәм аны хәтта ерак авыллардан да килеп карадылар.
Ә менә узган ел җәй аенда “Җидегән чишмә” Арча халык театры шушы пьеса буенча нәфис фильм төшерде. Режиссеры Рафис Сәләхетдинов та, уйнаучы артистлары да шул театр- ныкы.
– Аз гына акчага (250 мең сум) һәм кыска гына вакыт эчендә (8 көн һәм… төн) 1 сәгать тә 23 минут бара торган фильм төшерү–искиткеч зур хезмәт. Моны үзе эшләп карамаган кеше аңлый да алмый. Монда артистларның акча өчен түгел (халык театрында акча эшләп булмый), ә фанатларча бирелеп йөрүләре искиткеч зур роль уйнады. Аларга мин чын күңелемнән рәхмәтемне җиткерәм, – ди Рафис Сәләхетдинов. – Ә нәфис фильм төшерергә алынуыбызның төп сәбәпчеләре–безне яратып караган тамашачыларыбыз. Аларга олы хөрмәт йөзеннән эшләнде ул.
Шушы көннәрдә Арча Мәдәният йортында әлеге чын татар телендә барган нәфис фильмны тәкъдир итү кичәсе булды. Бу көн район елъязмасына тарихи чара булып кереп калачак. Чөнки республика районнарының берсендә дә нәфис фильм төшерелгәне юк, дисәк тә ялгыш булмас.
– Үзебезнең Арчада төшерелүе, аралашып йөргән кешеләр уйнавы белән дә кызыклы ул. Без балык тоткан гүзәл Казансу буйлары, улларыбызны армиягә озаткан хәрби комиссариат каршы, мәдәният, гадел хөкем йортлары, мәчет яннары… Барысы да без йөргән урыннар. Нәфис фильм искиткеч матур килеп чыккан. Арча артистларын уңышлы дебютлары белән котлыйм. Рафис Сәләхетдиновның бу эшкә алынуын батырлыкка саныйм, – диде сәхнәдән районның “Каурый каләм” түгәрәге җитәкчесе Халидә Фәйзрахманова.
Караганнар спектакльдә мондый урыннар юк, дияр. Нәфис фильм белән спектакль арасындагы аерма бу. Эзлекле барсын өчен фильмга яңа күренешләр дә өстәргә туры килгән. Бәлкем, кайберәүләр: “Кая арчалылар фильм төшерә алсын”, – дип шик тә белдергәндер. Әмма бу, чыннан да, киң форматлы, төсле чын нәфис фильм. Безнекеләр булдырган!
– Беркөнне “Ак чәчәк- ләр”не карадым, искиткеч картина. Безнең фильм да аннан бер ягы белән дә калышмый. Ә фильмның сценарий авторы, үзебезнең хезмәттәшебез, газетабыз хезмәткәре Гөлсинә Зәкиева булуы безнең коллектив өчен аеруча зур горурлык, – диде район газетасы мөхәррире Исрафил Насыйбуллин һәм сценарий авторына чәчәк бәйләме тап- шырды.
Тәкъдир итү кичәсендә тормыш иптәше Рузилә белән җырчы якташыбыз Габделфәт Сафин, Татарстан Республикасы язучылар берлегеннән шагыйрь Рифат Җамал, Татарстан Республикасының атказанган мәдәният хезмәткәре Камил Саттаров, район башкарма комитеты җитәкчесе урынбасары Рамил Гарифҗанов, “Шәһри Казан” газетасы журналистлары катнашты.
– Үзебезнең район драматургы иҗат иткән әсәр буенча үзебезнең режиссер куйган, артистларыбыз уйнаган нәфис фильмны карап горурланып утырдым. Чын татар киносы бит бу! – диде Габделфәт Сафин.
– Мин фильмга тәнкыйть ягыннан бәя бирергә уйлаган идем. Тик ул мине үз эченә шулкадәр бөтереп алып кереп китте, хәтта ул хакта оныттым да. Кайбер урыннарда күзләрдән яшь килде, – диде Рифат Җамал.
– Туган телебезне сак-лап калу өчен театр, кино сәнгате кирәк. Арчалылар спектакльләре белән сөендерделәр, Туфан Миңнуллинның “Әлдермештән Әлмәндәр”енә алынып сокландырдылар, үзләренең Әлмәндәрләрен дә таптылар, халык театр коллективларының “Идел–Йорт” төбәкара фестивалендә Гран–при җиңеп, миллион һәм шуңа автобус алдылар, – диде Камил Саттаров. – Хәзер менә тагын бер искитмәле яңалык – алар нәфис фильм төшергән. Ничек боларны мактамыйсың да, рәхмәт белдермисең инде.
– Коллективка яңа иҗат уңышлары телибез. Алардан яңа фильмнар, спектакльләр көтәбез, – диде Рамил Гарифҗанов һәм артистларга чәчәк бәйләмнәре тапшырды.
Тамашачының да төрлесе бар. Берсе ял итәргә, икенчесе гаеп эзләргә килә. Беренче коймак төерле була, диләр. Андыйларга да җирлек табылмый калмас.
– Тәнкыйть ул үзе тагын да яхшырак эшләү өчен зур мөмкинлек. Тәнкыйть күзлегеннән фикер йөртүчеләргә дә рәхмәтлебез, – ди Рафис Сәләхетдинов. – Шулай ук эпизодларда катнашкан артистларга, үзебезнең оператор егетләр Илвир Тимашев, Раушан Нәбиуллинга, ярдәм күрсәткән Татарстан Республикасы хәрби комиссариатының Арча һәм Әтнә районнары буенча бүлеге, Арча үзәк хастаханәсе, Арча халык суды җитәкчеләренә һәм хезмәткәрләренә, Тимергалиевлар, Зәкиевлар гаиләләренә, Арча икенче урта мәктәбенең 2014 елгы чыгарылыш сыйныф укучыларына чын күңелемнән рәхмәтемне белдерәм. Мәдәният йорты янында төшергән эпизодта халык булуы кирәк иде. Шул көнне биредә чыгарылыш кичәсе булуын Аллаһы Тәгаләнең безнең эшне хуплавы, дип кабул иттек без.