Бәйрәмегез мөбарәк булсын

Бәйрәмегез мөбарәк булсын
1994 елдан башлап элемтә бүлеге хезмәткәрләре үзләренең һөнәри бәйрәмнәрен билгеләп үтә. Патша заманыннан башлап халык күңеленә хат ташучылар буларак кереп калган элемтә хезмәткәрләре бүген хат кына ташып калмый, әллә ничә төрле эш башкара.
Газета–журнал, пенсия, субсидия өләшүдән тыш, алар бүген товарлар да сата, посылка, бандероль дә җибәрә, иминиятләүләр, коммуналь хезмәтләр өчен түләүләр дә кабул итә, авиабилетлар да сата. Арча районында 123 хат ташучы эшли. Алар, һава торышының нинди булуы-на карамастан, өйдән–өйгә шатлык өләшеп йөрүче, хезмәтләренә чын күңелдән бирелгән фанатлар.
Россия почтасының Арча районара элемтә үзәге халыкка хезмәт күрсәтү буенча гел алдынгы урыннарда бара. Аның уңышлы эшләвендә, әлбәттә, биредә 8 ел җитәкче булып эшләүче тырыш, таләпчән Ирек Фәйзрахмановның өлеше зур. Ирек әфәнде белән әңгәмәбезне элемтә үзәгенең уңышлары турында сөйләшүдән башладык.
— Һөнәри бәйрәмебезне 4 млн.нан артык табыш белән һәм газета–журналларга яздыру планын 100 процентка үтәп каршылыйбыз. Табыш, нигездә, почта хезмәте күрсәтү, хатлар алу–җибәрү, конверт, открытка сату, посылка, бандероль җибәрү, газета–журналларга яздыру, товарлар сатудан, пенсия өләшүдән (өләшкән өчен процентлап Пенсия фонды бүлә) керә. Арча районара элемтә бүлеге буенча районда барлыгы — 225, Әтнәдә 56 элемтә хезмәткәре эшли. Һәрберсе үзләренә йөкләнгән эшне төгәл белүче, намус белән башкаручылар. Шундыйлардан аеруча Ашытбаш, Сеҗе, Сикертән, Курса–Почмак, Үрнәк бүлекчә-ләрен, Өчиледән Зөлфия Минһаҗиеваны атап үтәр идем. Озак еллар эшләүчеләр арасында Мөндеш элемтә бүлекчәсе җитәкчесе булып эшләп, хәзер эксплуатация буенча инженер Миләүшә Сираҗетдинова, оператор Тәнзилә Минҗанова ихтирамга лаек.
— Хезмәткәрләрегезне хезмәт хаклары канәгатьләндерәме?
— Канәгатьләндерә. Бездә уртача хезмәт хакы 10100 сум. Тиздән эш башыннан түләүгә күчәчәкбез. Кызыксындыру чарасы да бар: хат ташучы ничек итеп акча эшләп табыш кертә ала (товар сата һ.б.), аңа өстәмә акча языла.
— Киләчәктә хезмәтегездә яңалыклар көтеләме?
— Бүгенге көндә почта бүлекчәләренә дистанцион укыту программасы куелган. Программа нигезендә җитәкчедән башлап барлык операторлар укыячак. Безнең өчен дә, клиентлар өчен дә уңайлы программа ул. Компьютерда Россия поч-тасы сайтына кереп, почтадан җибәрелгән юлламаларны карап, кайчан кемгә җибәрелгәнен, кайчан барып җиткәнлеген белеп була. Шулай ук клиентлар өчен уңайлы булган “Форсаж” акча җибәрү прог-раммасы эшли, бер сәгать эчендә акча тиешле урынга барып җитә. Киләчәктә һәр бүлекчәгә яңа программа куелачак, аның нигезендә бездән күчерелгән акчалар клиент-ка көнендә тапшырыла. Берничә бүлекчәдә тапшыру участогы бар, аның нигезендә компьютерга почта юлламаларының штрих–кодын укытып (элек барысын кулдан язалар иде), автомат рәвештә квитанция чыга. Безнең хезмәт күп сабырлык сорый. Кеше белән эшләгәндә әдәп–әхлак кагыйдәләрен саклау кирәк. Шуңа нигезләнеп “яшерен клиент” операциясе эшли. Яшерен рәвештә билгеләнгән кеше, теләсә кайсы вакытта килеп, ничек хезмәт күрсәтүебезне тикшереп, бәя биреп китәргә мөмкин. Бу клиентлар белән эшләү сервисының сыйфатын билгели.
— Клиентларыгыз эшегездән канәгатьме?
— Канәгатьтер дип уйлыйм, шикаятьләр кергәне юк. Киләчәктә дә коллективны саклап, яклап, күрсәткечләрнең дәрәҗәсен төшермичә эшләсәк иде. Барлык хезмәткәрләрне бәйрәм белән тәбрик итәм. Сәла-мәтлек, уңышлар телим. Әйбәт кенә эшләп, ярдәмләшеп яшәргә язсын.
Розалия ЗИННӘТОВА