Тәрәзәләрне дөрес сайлыйк

Тәрәзәләрне дөрес сайлыйк
Бүген күпләр иске тәрәзә рамнарын яңа пластикка яки агачка алыштыра. Тәрәзә һәм ишекләргә заказ биргәндә кулланучылар нәрсәгә игътибар итәргә тиеш? Бу сорауга ТР Дәүләт алкоголь инспекциясенең Арча территориаль органының эчке базарны үстерү һәм координацияләү бүлеге җитәкчесе Ләйсән Абдуллина җавап бирә.
— Чыннан да, бүгенге көн өчен бу мәсьәлә бик әһәмиятле. Еш кына гражданнар безгә тәрәзә һәм ишекләрне дөрес урнаштырмаган очракта кулланучылар хокукларына кагылышлы сораулар бирә. Күп вакыт кулланучылар ишек–тәрәзәләр куйдырганда бары тик телефон номеры һәм “арзан” сүзе генә күрсәтелгән белдерүләр буенча мөрәҗәгать итә. Исегездә тотыгыз: арзан тәрәзәләр һәм бушлай монтажны, кагыйдә буларак, бер көнлек фирмалар тәкъдим итә. Андыйлар арзанлы, сыйфатсыз материал белән тиешле технологияләргә таянмыйча эшли. Арзанлы материаллар бу фирмаларга керем, ә клиентларга — проблемалар һәм сыйфатсыз тәрәзәне дөрес куймау нәтиҗәсендә килеп чыккан җитешсезлекләрне бетерү өчен өстәмә чыгымнар вәгъдә итә.
Компания сайлаганда үлчәм алу, тәрәзәләрне ясау, аларны китерү, монтажлау һәм гарантия хезмәте күрсәтү белән бер оешма шөгыльләнгәненә өстенлек бирергә кирәк. Тәрәзә конструкциясенә язмача сату–алу, монтажлау эшләренә килешү төзүне таләп итегез. Анда тәрәзәләрнең саны, исеме һәм размеры, бәясе, түләү тәртибе, тәрәзә конструкцияләрен кулланучыга тапшыру срогы, тәрәзә сыйфатына гарантия йөкләмәләре күрсәтелгән булырга тиеш. Монтажлау эшләренә килешү үз эченә эшләнәсе эшләр исемлеген, материалларның бәясен, монтажлау эшләренең соңгы срогын һәм монтажга сыйфат гарантиясен алырга тиеш.
Әгәр эшләүче, сатучы һәм куючы бер оешма булмаса, закон буенча түләүне, кую бәясен аерым күрсәтеп, бүлергә кирәк. Бу адым заказ буенча дәгъвалар булган очракта аеруча мөһим. Рамнар канәгатьләндермәсә, сезгә ярдәмгә законның 18нче маддәсе килер, ә кую буенча дәгъваларыгыз булса — 29нчы маддә буенча эш итегез.
Әгәр тәрәзә конструкцияләрен тапшырганда сезгә алу–тапшыру актына кул куярга кушалар икән, беренче чиратта игътибар белән тәрәзәне карап чыгыгыз. Җитешсезлекләр булган очракта яки килешү шартлары үтәлмәсә, актка кул куймагыз. Барлык дәгъваларны һәм искәрмәләрне күрсәтеп, ике яклы акт төзүне таләп итегез. Әгәр риза булмасалар, ике данә актта да булган җитешсезлекләрне һәм дәгъваларыгызны күрсәтегез. Җитешсезлекләрне бетерү срогын күрсәткәннән соң гына актка кул куегыз. Фирма эшчесенең имзасы булган икенче данә акт сезнең кулда калырга тиеш. Монтажлау эшләре беткәннән соң шулай ук ике яклы акт төзүне таләп итәргә кирәк.
Еш кына тәрәзәләрне ясау һәм урнаштыру сроклары да бозыла. Бу очракта “Кулланучылар хокукларын яклау турында”гы РФ Законы нигезендә кулланучы неустойка түләүне таләп итә ала: тәрәзә тапшыру срогын бозган өчен һәр кичектерелгән көнгә алдан түләнгән сумманың 0,5 проценты, монтажлау срогын кичектергән өчен — һәр кичерелгән көнгә эшләү бәясенең 3 проценты, ләкин билгеләнгән бәядән кыйммәтрәк түгел.
Дәгъва булган очракта бернинди дә телдән килешүләр алып бармагыз. Иң яхшысы — ике данәдә дәгъва язу һәм нәрсә таләп итүегезне ачык итеп күрсәтү. Монда сезгә ярдәмгә кулланучылар хокукларын яклау хезмәте килер.
Гөлназ
ГЫЙНИАТУЛЛИНА