Яңа төзелгән йортка – 5 ел гарантия!

Яңа төзелгән йортка – 5 ел гарантия!
“Идарәче компания” ширкәте нинди эшләр башкара? Ширкәт юристы Эдуард Шакиров белән әңгәмәбез шул хакта.
— Идарәче оешма ул идарә килешүе нигезендә күп фатирлы йорт белән идарә итүче төрле оештыру-хокук формасындагы юридик зат яки шәхси эшмәкәр. “Идарәче компания” коммуналь ресурсларны (кайнар, салкын су, электр энергиясе, газ, җылылык энергиясе һәм башкалар) үзенә ала, коммуналь хезмәтләр тәкъдим итә, күп фатирлы йортлар эчендәге инженер системаларына хезмәт күрсәтү өчен җавап бирә. “Арча шәһәре һәм Арча муниципаль районы идарәче компаниясе” ширкәтенең максаты — йортлар белән идарә буенча эш, торак буенча законны төгәл үтәү, вакытында һәм сыйфатлы хезмәт күрсәтү, ишегалларын төзекләндерү. Ел да компания ныклап төзеклән-дерү адреслы программасына йортларны кертү буенча эш алып бара. Беренчедән, ныклап төзек-ләндерү өчен акча аның аша уза, икенчедән, заказчы буларак кайсы оешма төзекләндерәсен конкурс нигезендә сайлап ала. Быел 7 йорт ныклап төзекләндерелде, киләсе елда 8 йорт планга кертелде.
— Ә вак-төяк төзекләндерү эшләрен кем башкара?
— Күп фатирлы йортлар эчендәге, ягъни гомуми милекне (түбә, подъездлар, инженер системалары) төзекләндерү безгә йөкләнгән. Узган ел фатирларга шәхси җылылык казаннары куюны төгәлләдек. Бүгенге көнгә барлык йортлар кышкы сезонга әзер. “Идарәче компания” ширкәте карамагындагы барлык йортларда су, электр белән тәэмин итү системалары төзекләндерелде. Безнең үзебезнең осталарыбыз бар. Эльмир Егоров, Азат Фазылҗанов бөтен төр төзекләндерү эшләрен башкаралар.
— Нинди йортлар сезнең карамакта?
— ТМШлар составында булмаган йортлар һәм барлык яңа йортлар өчен без җаваплы. Шәһәр Советы һәм дәүләт торак фонды үз милкендәге йортларны килешү нигезендә карап торырга безгә тапшыра. Һәм без килешү нигезендә аларны, шулай ук тирә-юньнәрен тәртиптә тотарга һәм төзекләндерергә тиешле. Без үз чиратыбызда әлеге йортларда яшәү-челәрдән эчке тәртип һәм чисталык саклауны таләп итәбез.
— “Идарәче компания” тарафыннан үз йортларына күрсәткән хезмәтләргә нәрсәләр керә?
– Ныклап төзекләндерелгән яки яңа төзелгән йортка 5 ел гарантия бирелә. Шушы вакыт эчендә җитешсезлекләр килеп чыкса, без подрядчы оешмага хат юллыйбыз һәм алар белән бергә урынга барып тикшерәбез, җитешсезлекләрне бетерү өстендә эшлибез.
Кемдер өй эчендә үзгәреш кертергә теләсә дә, иң беренче безгә мөрәҗәгать итә, аннан йорт милекчесе — шәһәр Советына бара. Үз белдеге белән фатирда нидер үзгәртү рөхсәт ителми, аның өчен штраф каралган. Янгын, электр куркынычсызлыгын саклау, инженер системасы җиһазларыннан куллану кагыйдәләре буенча аңлату эшләре алып бару, йортларга хезмәт күрсәтүгә кагылышлы шикаятьләрне карау да “Идарәче компания”гә йөкләнгән. Үзебездә диспетчер хезмәте бар, килгән шикаятьләр махсус журналга теркәлеп барыла, шикаять, гариза яки теләкләрегезне (әгәр булса) 3–33–08 номеры белән шалтыратып, Почта урамы, 9нчы йортка килеп (чиркәү бинасы) яки ukarsk.ru электрон адресына язып җибәрергә мөмкин. Бездән эшчеләр, белгечләр барып, акт төзиләр һәм вакытында чарасын күрәбез.
Гөлсинә ЗӘКИЕВА