Телефон аша киңәш

Телефон аша киңәш
Кайчак кеше күңелен “мәчеләр тырный”, “күгендә” кара болытлар пәйда була, иң якын дусты хыянәт итә, сөйгәне ташлап китә, ялгызлыктан интегә, яшисе килми башлый... Кыскасы, гомерең дәверендә нинди генә хисләргә дучар булмыйсың, тормышның ачысын да, төчесен дә татырга туры килә.
Ярый ла иң авыр вакытыңда игътибар белән тыңларлык, яхшы киңәшләрен бирерлек, сиңа терәк булырлык кешең булса. Ә булмаса? Менә шулай бөтенләй өметсезлеккә бирелгән, язмыш тудырган лабиринттан чыга алмый азапланган кешеләр өчен инде ул ышаныч телефоны. Безнең Арчада бармы соң ул? Бу сорауны без Мәрхәмәтлек үзәге психологы Инна Нурмиевага бирдек. Инна Рәисовна, Казанда социаль-юридик институтны тәмамлап, ун ел психолог булып эшли.
— Ышаныч телефоны безнең Арчада юк. Ә менә зур шәһәрләрдә бар, берәү генә дә түгел һәм барысына да шалтырату бушка. Тагын бер ягы бар, ышаныч телефоны тәүлек буе эшләргә тиеш. Ә бездә консультация, киңәш бирү телефоны бар. Дүшәмбедән җомга көнгә кадәр көн дә иртәнге 8дән 17 сәгатькә кадәр шалтыратып, киңәш алырга мөмкин. Без ике психолог Мәрхәмәтлек үзәгенең 2 катында, 31 кабинетта утырабыз. Һәр шалтырату безнең өчен бик мөһим, телефоныбыз: 3-02-05.
— Инна Рәисовна, консультация (киңәш) бирү телефонының максаты нәрсәдә?
— Без тормышта килеп туган проблемаларны чишүдә ярдәм итәргә тырышабыз, телефон аша киңәшләр бирәбез. Әгәр төшенкелеккә бирелеп, ул хәлдән чыгу юлын таба алмасагыз, проблемалар өстәлеп торса һәм аларны чишүгә өметегезне югалтсагыз, шалтыратыгыз, безнең психологик консультация бирү телефоны сезне бервакытта да җиде юл чатында авырлыклар белән бергә бер калдырмас. Тәҗрибәле психологлар һәр кешене игътибар белән тыңлап, ярдәмгә киләчәк. Безнең максат — хәлләре шәптән булмаган гаиләләргә, төрле сәбәпләр нәтиҗәсендә үзләренә кул салу дәрәҗәсенә җиткән яшүсмерләргә, балаларга, кыскасы, кризис хәлендә булып, ашыгыч психологик ярдәмгә мохтаҗ булган һәркемгә булышу, балалар хокукларын һәм гаиләләр ныклыгын саклап калуда ярдәм итү.
Безнең телефонга шалтыратып, эчегезне бушатып кына калмыйсыз, психолог фикерен тыңлыйсыз, белгеч киңәшләрен аласыз. Болар бар да билгеле бер нәтиҗә ясарга мөмкинлек бирәчәк.
— Шәһәр җирендә психологлар белән эшләү гадәткә кергән. Ә бездә кеше бер-берсен белә, шуңа күрә үз проблемаларын читкә чыгарырга курка да, ояла да. Дөресрәге, мәгълүмат таралудан шүрли.
— Телефон аша консультация бирү эшенең ике төп принцибы бар. Беренчедән, ул бушлай, икенчедән, мәгълүмат беркая да таралмый. Сезнең шалтырату аноним була ала. Исемегезне үзгәртеп тә мөрәҗәгать итәргә мөмкин. Без телефон номерын да, шалтыратучы белән киңәш бирүче арасындагы әңгәмәне дә язып бармыйбыз. Безнең өчен иң мөһиме — сезгә авыр, кирәк вакытта ярдәм итә алу. Шуңа курыкмагыз, шалтыратыгыз. Бөтен хәлдән дә чыгу юлын табып була. Сез җиңәчәксез.
— Ә шалтыратучылар бармы соң?
— Әлбәттә. Төрле сораулар белән мөрәҗәгать итәләр. Ялгыз өлкән яшьтәге егет ярын таба алмый интегә, яшүсмерләр җавапсыз мәхәббәт утында яна, әти-әниләрне балалар проблемасы борчый, өлкәннәрнең үз мәсьәләләре җитәрлек. Һәрберсен игътибар белән тыңлыйбыз, киңәшебезне бирәбез, кирәк булганда консультациягә чакырабыз. Оялмагыз, курыкмагыз, шалтыратыгыз. Без сезнең белән.
Гөлсинә ЗӘКИЕВА