“Мәктәп”тән мәктәпкә

“Мәктәп”тән мәктәпкә
Мәктәпкәчә яшьтәгеләрне тәрбияләүче балалар бакчаларын барыбыз да белә. Ә менә нәниләр “мәктәбе” турында кайберәүләр хәбәрдар түгел. Кече яшьтән балаларның акыл үсешен, сәләтен үстерү мәктәбе Укучылар сараенда һәм сәнгать мәктәбендә оештырылган.
Атнаның ике көнендә, билгеле бер сәгатьләрдә, педагоглар балалар белән дәресләр үткәрә. Дәрес башланыр алдыннан, әти–әниләр ул яки кызларын бакчадан алып, “мәктәп”кә илтәләр. Аерым түгәрәкләр бакчаларның үзләрендә дә бар.
Кайбер әти–әниләр бу турыда белми, белсәләр дә, бакчадан баланы вакытлы вакытсыз алып интектермим әле, бакча да бик җиткән, дигән фикердә тора.
Бакча тәрбиячеләре белән дә сөйләштем.
— Безнең программа үзебезнең дә көчле, балаларны мәктәпкә әйбәт әзерлибез, — дип әйтә кайбер тәҗрибәле педагоглар.
— Ата–аналар рәхмәт әйтеп бетерә алмый, укытучылар бездән килгән балалардан бик канәгать,— ди Укучылар сараенда 5 яшьтән балаларга белем бирүче педагог Рәмзия Кадыйрова.
Дәресләрне карарга теләвемне ишеткәч, тәҗрибәле педагог Рәмзия Кадыйрова “мәктәп”кә икенче ел йөргән балалар белән үткәрелә торган дәресләргә чакырды. Нәниләр белән беренче ел эшләүнең бик кыен икәнлеген аңлатты ул. Ә менә икенче ел “мәктәп”тә белем алган балалар хәйран гына белем туплаган була икән.
...Математика дәресе. Балалар үзләре кебек кечкенә генә парталарда утыра. Янәшәләрендә мультфильмның төсле сүрәтләре төшерелгән берсеннән–берсе матур сумкалар. Парта өстендә авторучка, төсле карандашлар, бетергеч... мәктәп укучысына ни кирәк — бар да бар. Дәрестә балалар кушарга өйрәнделәр. Каты кәгазьдән ясалган 2 кыяр, 3 помидорны сумкага салып, кибеттән сатып алып кайттылар, шуларны бер сумкага туплап санап күрсәттеләр. Яшелчә-ләрне тактадагы “кесә”ләргә салып кушып карадылар, урыннарын алмаштырып та куштылар, балалар берсен–берсе уздыра–уздыра “5”ле санын әйттеләр. Аннан мәктәпкәчә яшьтәгеләр өчен махсус эшләнгән сүрәтле дәфтәрләр өләшенде. Балалар керпе җыйган гөмбә, алмаларны куштылар, дәфтәргә шул гөмбә, алмаларның рәсемнәрен ясадылар, урыннарын алмаштырып та ясадылар, кушудан килеп чыккан санны дөрес итеп әйтеп тә бирделәр. Парта арасыннан кузгалып күнегүләр дә ясап алдылар. Ярты сәгать дәреснең үткәне сизелмәде дә. Тәнәфестән соң дөрес итеп укырга, язарга өйрәнделәр. Тәнәфестә балалар берсен–берсе уздыра–уздыра монда кызык икәнлеген сөйләделәр, бигрәк тә физкультура дәресен яратуларын әйттеләр.
— Кече яшьтәгеләрне үстерү “мәктәп”ләрендә балалар түземлеккә, игътибарлылыкка, тырышлыкка өйрәнә, — ди 1нче мәктәпнең башлангыч сыйныф укытучысы Валентина Осипова.
Ата–ананың баласын кечкенәдән белем дөньясына алып керергә омтылуын аңлап була. Һәркем кадерлесен белемле, сәләтле итеп күрәсе килә. Әлбәттә, мондый “мәктәп”не үткән балага беренче сыйныфта укуы җиңелрәк биреләчәк, укытучыларга да алар белән эшләве уңайрак. Бакчаларга йөрмәгән балаларга бигрәк тә әйбәт бу. Әмма күңелдә барыбер дә, балалар бакчаларында да шөгыльләнәләр, сабый чакны урлау, вакыйгаларны ашыктыру түгелме икән бу, дигән шик бар.
Румия НАДРШИНА