Сатарга дигәнен пунктка алып барасың

Сатарга дигәнен пунктка алып барасың
1 майдан үзең асраган терлекне үз хуҗалыгыңда суярга ярамый икән, дигән хәбәр авыл халкын пошаманга салды. Әлеге мәсьәләгә ачыклык кертүне сорап газета укучыларыбыз да шалтырата. Без, үз чиратыбызда, “Россельхознадзор”ның Татарстан Республикасы буенча идарәсе баш дәүләт инспекторы Ринат Фәйзрахманов һәм районның ветеринария берләшмәсе җитәкчесе Рәкыйп Йосыповка мөрәҗәгать иттек.
—2014 елның 1 маеннан Таможня берлегенең “Ит һәм ит продукциясе куркынычсызлыгы турында”гы техник регламенты көченә керә, — диде Ринат Фәйзрахманов. — Әлеге регламент сугым продуктлары һәм ит продукциясенең куркынычсызлыгын тәэмин итү буенча мәҗбүри таләпләрне билгели. Мәсәлән, терлекләрне сую дәүләт теркәве үткән, махсус җиһазланган пунктларда гына башкарылырга тиеш. Әмма үзеңә дип асраган терлек өчен борчылырга кирәкми. Регламентта бу турыда ачык итеп әйтелгән: гражданнар үзләре куллану өчен асраган терлекләргә, шулай ук кошларга бу таләпләр кагылмый.
— Ярар, мин, мәсәлән, ике үгез асрадым, ди. Шуның берсе үземә иткә, икенчесен сатарга дип планлаштырам. Икенчесе белән нишләргә кирәк инде миңа?
— Сатарга дигәнен сую пунктына (ул безнең районда да булачак) алып барырга туры килә. Анда аны суеп, эшкәртеп бирәчәкләр, ветеринария табибы шунда ук келәймә суга, белешмә бирә.
—Сатарга ният иткән сарык, кәҗәләрне дә шул пунктка алып килергә туры киләме?
— Әлбәттә, — диде Рәкыйп Йосыпов. — 1 майдан соң терлек итен ветеринария лабораториясенә алып килү файдасыз, анда келәймә сугылмаячак, белешмә бирелмәячәк.
— Каз, үрдәкләр белән нишләргә?
— Сатарга дигән кош итен келәймәләү тәр-тибе әлегә элеккечә кала.
— Сугым пунктларын теләгән кеше ясый аламы?
— Бу мәсьәлә гади генә түгел. Пунктларга таләпләр катгый. Аны төзү урыны дәүләт ветеринария һәм санитария органнары белән килешенеп билгеләнергә тиеш. Аның торак пунктлардан, терлек торакларыннан, көтүлекләрдән, сулыклардан, җәмәгать урыннарыннан, балалар һәм дәвалау учрежде- ниеләреннән 300 метр читтә булуы шарт.
Барлык таләпләргә җавап бирерлек итеп эшләнгән пунктлар гына дәүләт теркәве үтә алачак.
Ильяс ФӘТТАХОВ