Максат – Олимпия уеннарында җиңү

Максат – Олимпия уеннарында җиңү
16 яшьлек Арча кызы, боксчы Гөлүсә Галиева уңышлары турында без газетада күп яздык. Менә әле яңа гына бокс буенча Италиядә үткән Европа чемпионатында җиңү яулап кайткач, без спорт остасы Гөлүсәне тренеры һәм әтисе Марат Галиев белән редакциягә кунакка чакырдык.
Зифа буйлы бу матур кызны аңларга тырышам. Ни өчен нәфис затларга хас булмаган спортның бокс төрен сайлаган ул?
— Кечкенәдән әтигә ияреп спорт залына йөрдем, — ди Гөлүсә. — Менә шуннан ничектер кереп кителде... 7 яшьтә инде мин чынлап торып бокс белән шөгыльләнә башладым.
7 яшьтә үк ул “Колос” мәдәният йортында күрше–тирә район спортчылары белән үткәрелгән бокс ярышларында җиңүгә ирешә. Малайлар арасында Гөлүсә Гөлүс булып яшьтәшләре белән көч сынаша. Бер җиңү тәмен татыган кызда үҗәтлек, тагы да җиңү теләге уяна.
— Гөлүсә барысы 46 ярышта катнашып, 3сендә генә җиңелде. Россия күләмендәге ярышларда 5 тапкыр җиңү яулады,—ди тренеры.
Кызлар арасында бокс ярышларында Гөлүсәгә иң беренче җиңү 2009 елда килә. Урал Федераль округы буенча узган ярышларда яшьтәшләре арасында уңышларга ирешеп, Россия чемпионатында катнашу өчен юллама ала. Озак та үтми, Ставрополь краенда үткән Россия чемпионатында җиңү яулый.
Инде Гөлүсә чит илләрне дә күрергә өлгерде. Болгария, Сербия, Италиядә үткән ярышларда үзен көчле боксчы буларак танытты. Көчлеләрне, гадәттә, көндәшләре белә һәм алардан “җиңелермен” дип өркеп тә тора.
— Гомумән, Россия спортчылары көчлеләрдән санала, алардан куркып торалар,— ди Марат Галиев.
Гөлүсә:
— Иртән һәм кичен —барысы 4 сәгать бокс белән шөгыльләнәм, — ди.
— Шундый зур хезмәт бу,— ди тренер. — Һәр шөгыльләнүдә 2–3 килограмм авырлыкны, организм өчен әһәмиятле компонентларны югалтасың. Тулы кыйммәтле ризык белән тукланырга, витаминнар кабул итәргә кирәк. Россия җыелма командасында булгач, Мәскәү табибларына күрендек, алар киңәше белән тукланабыз.
Тренерың янып–көеп йөрмәсә, үҗәт булмаса, тырышмаса, зур җиңүләр килмәс иде. Марат Галиев үзе бер кызыклы шәхес. Үз эшенә бирелгән фанатлар, гадәттә, башкаларга охшамаган була. Мине дә кисәтеп куйды ул:
— Сез, журналистлар, бутап бетерерсез инде...
Тренер күңелендә канәгатьсезлек хисләре дә тойдым мин.
— Шөгыльләнергә спорт залы кирәк безгә, — ди ул. —Безнең максат —Олимпия уеннарында җиңү!
Арча, Татарстан, Россия данын Европага таныткан спорт остасы Гөлүсәгә, аның тренеры Марат Галиевка ихлас күңелдән уңышлар телибез. Гөлүсәбез Олимпия уеннарында җиңеп, батыр йөрәкле татар кызларының нинди икәнен бөтен дөньяга билгеле итсә иде!
Румия НАДРШИНА