55 яшьтә герне 56 тапкыр!

55 яшьтә герне 56 тапкыр!
Арча стадионы спорт залында “Энергосбыт” предприятиесе Идел буе бүлекчәсенең район идарәсе һәм “Татарстан почтасы” филиалы коллективлары ГТО нормаларын тапшырды.
Район яшьләр эшләре, спорт һәм туризм бүлеге җитәкчесе Зиннур Сәгыйтов:
— ГТОны районда барлык хезмәт коллективлары да тапшырачак, — дип сөйләде. — Бүген физкультура—спорт комп-лексының кайбер төрләрен спортзалда тапшырсалар, кросс, кар яву сәбәпле, язга калачак. Ә кышкы айларда ГТОны чаңгы буенча тапшыру каралган. Ахыр-дан нәтиҗәләр чыгарылгач, яшь буенча барлык төрләрдә дә 1нче урынны алучылар арасында жирәбә үткәреләчәк. Бәхетле кешегә санаторийга юллама биреләчәк!
“Энергосбыт” идарәсе җитәкчесе Алия Вәлиеваның ГТО нормаларын тапшыруына сокланып карап тордым. Тәбәнәк турникта тартылу һәм басып торган килеш алга таба иелү буенча нормаларны арттырып үтәде ул.
— Сез спорт белән дус, шулаймы? — дип сорыйм үзеннән.
— Спорт минем гомерлек юлдашым, — дип җавап бирде Алия Хәйнәсовна. — Монда, стадионда мине беләләр. Кышын чаңгыда, җәен велосипедта, роликта йөрим. Казанда “Татэнергосбыт” идарәсе җыелма команда составында спорт ярышларында катнашам, призлы урыннар алабыз.
— Спорттан гадәттә күңел күтәренкелеге аласың.
— Спорт миңа уңай энергия бирә. Күнегүләр вакытында тискәре энергия юкка чыга. Гәүдәң җиңел, үзең сәламәт буласың. Башкаларга да мин күбрәк хәрәкәтләнергә киңәш итәр идем.
“Энергосбыт” идарәсендә өлкән агент булып эшләүче 23 яшьлек Алсу Низамова:
— Бассейнга йөрим, шугалакта шуам, — дип спорттан ерак тормавын әйтте.
35 яшьлек техник Алия Сәгыйтова тәбәнәк турниктан тартылу буенча шулай ук норманы берничә тапкырга арттырып үтәде.
“Татарстан почтасы” филиалы хатын–кызлары һәм ир–атлары уен–көлке белән шау–гөр килеп ГТО нормаларын тапшырды.
— Армиядән кайтканнан бирле спорт залына килгән юк иде, — ди шофер булып эшләүче Ринат Гыймадиев. — Шул көннән 35 ел гомер үткән. Миңа хәзер 55 яшь.
Сөбханалла, диясе килә Ринатка. 16 килограммлы герне 56 тапкыр күтәрде. ГТО нормасын 5 тапкырга арттырып үтәде! Яше барса да, гәүдәгә җиңеллеген югалтмаган.
— Тик торган юк минем, — ди. — Үз йортыбыз белән яшибез. Менә әле яңа йорт салдык.
Почтада инженер булып эш-ләүче Гөлназ Сөнгатуллина:
— Арчада яшәсәм, бассейнга йөрер идем, — дип кызыга. — Эшкә Мөндештән килеп йөрим.
Спорт киемнәреннән спорт залына килү, ГТО нормаларын тапшыру хисапчы булып эшләүче Ләйсән Камалиевада да эзсез үтмәгән.
— Быел чаңгыга басарга исәп бар, — ди.
Сынаулар тәмамлангач, “Арча” спорт мәктәбенең тренер–укытучысы, нормаларны ничек тапшырырга кирәклеген аңлатып, һәр катнашучының исем-фамилиясен, нәтиҗәләрен язып баручы Руслан Галәветдинов фикерләре белән кызыксынам.
— ГТО нормаларын катлаулы, көч җитмәслек, дип әйтмәс идем, — диде ул. — Үзегез күрдегез, күбесе, берничә кешедән кала, нормаларны үтәде, хәтта берничә тапкырга арттырып үтәүчеләр булды. ГТОдан һәркем үзенә шундый нәтиҗә чыгарсын иде: гәүдәне тиешле авырлыкта тоту һәм авырмас өчен спорттан аерылмаска, күбрәк хәрәкәтләнергә кирәк!
Румия НАДРШИНА