Укытучылар һәм укучылар ярыша

Укытучылар һәм укучылар ярыша
Көзге каникул көннәрендә район мәгариф идарәсе һәм мәгариф хезмәткәрләре профсоюз комитеты тарафыннан педагоглар арасында спорт ярышлары үткәрелде.
— Алар Халыклар бердәм-леге һәм Татарстан Конс-титуциясе көннәре уңаеннан оештырылды. Анда районның барлык мәк-тәпләреннән, Арча балалар бакчаларыннан һәм Арча Укучылар сараеннан спорт сөючеләр катнашты. Бу мәгариф хезмәткәрләренең республика спартакиадасына әзерлек тә булып тора, — диде район мәгариф идарәсе җитәкчесе Руслан Низамов.
Дартс буенча ярышлар “Арча” спорт комплексында узды. Финал өлеше аеруча кызыклы булды. Беренче, икенче урыннар үз ияләрен тиз тапса, өченче урынга берничә кеше өметләнде. Әмма гадәттә спортта иң көчлеләр җиңә.
— Беренче урынны яулармын дип башыма да китермәгән идем. Дартс минем өчен дә яңалык. Алдан яхшылап әзерләнергә, серләренә төшенергә туры килде. Тырышлык бушка китмәде, — ди Яңа Кенәр балалар бакчасында шәфкать туташы булып эшләүче Наилә Зарипова.
Наилә Яңа Кенәргә Иске Ашыттан килеп йөри. Ире Хәмбәл (Яңа Кырлай мәктәбе директоры) белән ике бала үстерә. Спорт белән шөгыльләнергә дә вакыт таба. “Сәламәт тәндә—сәламәт акыл, диләр. Балаларда да кечкенәдән спортка карата уңай мөнәсәбәт тәрбия-ләргә кирәк. Ә моның өчен үзеңә үрнәк күрсәтү зыян итми”, — ди ул.
Укытучылар, тәрбиячеләр актив рәвештә спортка тартыла. Бу аларга сәламәтлекләрен ныгытырга да мөмкинлек бирә. Ә инде спорт ярышларында катнашып җиңүләр яулау — үзе зур дәрәҗә. Укытучының үзе өчен генә түгел, коллектив өчен дә. Җиңүче коллективларга күчмә кубок һәм бүләккә спорт инвентарьлары тапшырыла. Узган ел спортның күп төре буенча җиңү яулап, Яңа Кенәр лицее — беренче, агросәнәгать көллияте — икенче, Арчаның 7нче һәм Лесхоз мәктәпләре өченче урыннарны яулаган.
— Спортның 10 төре буенча унынчы ел рәттән инде ярышлар оештырылып килә, — ди мәгариф хезмәткәрләре профсоюзының район советы рәисе Вакыйф Харисов. — Дартс һәм ату буенча ярышлар быел беренче тапкыр үткәрелә. Аларда 44 профсоюз оешмасыннан 260тан артык кеше катнаша.
Ату буенча ярышлар ике урында үтте. Арчаның беренче мәктәбендә хатын-кызлар, бишенче гимназиядә ир–егетләр төз ату буенча көчләрен сынашты.
Арчаның өченче мәктәбендә дә бу көнне призлы урыннар өчен көрәш барды. Тик биредә спортчылар түгел, ә яшь математиклар көч сынашты. 2-4 сыйныф укучылары арасынды “Яшь математик” дип исемләнгән район бәйгесе узды.
— Башта математика сөючеләр үз мәктәпләрендә ярышты, җиңүчеләр монда килде, — ди бәйгене оештыручыларның берсе, район методик берләшмә җитәкчесе Лилия Хөснетдинова. — Максаты—сәләтле балаларны барлау, фикерләүне үстерү, югары этапка әзерләү. Биремнәр кодлар белән һәр сыйныфка аерым татар һәм рус телләрендә бирелде.
Биремнәр күбрәк логик фикерләүгә нигезләнгән иде. Монда, беренче чиратта, башны эшләтергә кирәк. Кайберәүләргә алар бик җиңел бирелсә, кыенлык кичерүчеләре дә табылды.
— Төрлеләре бар иде, — ди Курса–Почмактан 4 сыйныф укучысы Илнар Абзалов. — Биремнәрнең барысын да эшләдем. Белмим, дөрес булгандырмы?
Анысы инде соңыннан билгеле булды. Җиңүчеләргә бүләкләрне тантаналы шарт-ларда район мәгариф ида-рәсе җитәкчесе Руслан Низамов тапшырды.
— Математика ул—барлык фәннәрнең патшасы. Бүгенге ярышта иң акыллы, иң зирәк 80нән артык бала катнашты. Батырчылык итеп белемегезне сынап карарга килүегез—үзе зур җиңү. Киләчәктә тагын да яңа үрләргә ирешүегезне телим, — диде ул, җиңүчеләргә бүләкләр тапшырып.
Призлы урыннарны алмаганнар да буш калмады, аларга сертификатлар бирелде. Хәер, мондый бәйгедә катнашу балалар өчен үзе зур җиңүгә тиң.
— Сез бүген белемнәрегезнең бәясен белдегез, җиңү тәмен тойдыгыз, — диде соңыннан укучыларны котлап, 3нче мәктәп директоры Илһамия Абдуллина. — Иң кадерлесе һәм мөһиме—сез бүген мәктәбегез данын якладыгыз.
7 ноябрь мәгариф өлкәсендә чараларга бай булды. Бу көнне беренче, икенче мәктәпләрдә, бишенче гимназиядә педагогик советлар үткәрелде. Анда беренче чирек нәтиҗәләре, Бердәм дәүләт имтиханнарына әзерлек, сәләтле балаларны әзерләү һәм башка мәсьәләләр каралды.
Гөлсинә ЗӘКИЕВА