Файдаланасың икән — түлә

Файдаланасың икән — түлә
Үзегез дә күреп, сөенеп йөрисездер, шәһәр дә, авыллар да соңгы елларда күзгә күренеп чистарды. Урамнарга тәртип керде, коры елгалар чүптән арынды. Кайбер урыннарда бер җирдә бер кәгазь кисәге күрсәк тә, алып чүп савытына ташлыйсы, тәмәке төпчекләре ташлаучыларны шелтәлисе килә башлады. Чат саен диярлек чүп ташлау өчен контейнерлар куелган, аларны бушатып, полигонга чыгарып баралар.
— Шәһәрдә генә 423 контейнер, 54 бункер бар. 3 “КамАЗ”, 1 “ЗИЛ, 2 “ГАЗ”, 2 бункерлы машина иртән кеше йокыдан торганчы ук юлга чыга. Үрнәк, Иске Чүриле, Кәче, Наласа авыл җирлекләренә кергән авылларга айга ике тапкыр билгеле көннәрдә баралар. Һәрберсе үз хезмәтен намус белән башкара, — ди “Жил-комбытсервис” ширкәте җитәкчесе Альберт Хәкимов.
Хезмәт күрсәтүче оешма үзенә йөкләнгән эшне үти. Без аны шулай тиеш дип саныйбыз, әмма һәрбер хезмәтнең түләүле икәнен онытып җибәрәбез.
— Бөтен хикмәт тә шунда шул. Кайбер шәхси хуҗалыклар чүпне ташлыйлар, ә менә шуны полигонга чыгаручы оешма белән килешү төзеп, хезмәтләре өчен түләргә теләмиләр, — ди шәһәр башкарма комитеты җитәкчесе Рафил Исмәгыйлев. — Бу кем өчендер күршесе түли, дигән сүз бит. Бәясе беребез өчен дә көч җитмәслек түгел, югыйсә.
— Мин Җиңүнең 40 еллыгы урамында, 5нче йорт, 5нче фатирда яшим, — ди Сөембикә апа Гарипова. — Менә кулымда квитанция. 14 төрле хезмәт өчен түлим. Чүп ташлаганга 42 сум. Ул хезмәттән файдалангач, түләргә кирәклеге көн кебек ачык бит инде.
— Бакчада чокыр казып, чүпне шунда ташлый башладым. Килешү төземәскә дә уйлаган идем. Тик капка төбенә контейнер куйдылар. Ничек аннан файдаланмыйсың? Чүпне ташлагач, ничек оялмыйча килешү төземисең, — диде Бибинур апа. — Пенсиям күп түгел, әмма тиеш булгач, ничек түләмисең? Бәясе ул кадәр түзмәслек тә түгел. Үзебез эшләгәнгә акча сорыйбыз бит. Бу да шуның кебек. Һәр хезмәт өчен түләргә кирәк. Заманы шундый.
“Жилкомбытсервис” ширкәтенә шалтыратып, бәясен белештем. Татарстан Республикасының тарифлар буенча комитеты билгеләгән бәя торак мәйданның квадрат метрыннан чыгып исәпләнә. Бер квадрат метрга 1 сум 26 тиен. 100 квадрат метрлы йортта яшәгән очракта да, айга 126 сум чыга. Әмма шуны түләмәс өчен аяк терәп торучылар бар. Шунысы кызык, араларында хәлле тормышта яшәүчеләр дә аз түгел. Картлар барлы–юклы пенсиясен чыгарып бирә, ә алар — юк. “Без үзебез ташлыйбыз”, — диләрдер, бәлкем.
— Көнкүреш калдыклары махсус оешмалар тарафыннан полигонга чыгарылырга һәм шунда утилләштерелергә тиеш. Үзләре чыгарган очракта да кулларында акча түләгәнгә язулары булмый торып, аларны полигонга кертмиләр. Димәк, тегеләй дә, болай да түлисе. Иң яхшысы, килешүеңне төзеп, вакытында акчаңны түлә дә, тынычлап яшә.
Хәзерге вакытта шәһәрдә 600дән артык шәхси хуҗалыкта яшәүчеләр килешү төземәгән. Кагыйдәләр нигезендә гражданнар көн-күреш калдыкларын чыгарган һәм утилләштергән өчен килешү төзергә бурычлы. Әлеге муниципаль норматив–хокук таләпләрен үтәмәү административ хокук бозу булып санала.
— Бу өлкәдә эш бара, — ди Рафил Исмәгыйлев. — Көнкүреш калдыкларын чыгару һәм утилләштерү буенча хезмәт күрсәтүче оешма белән килешү төземәүчеләр һәм бурычлы кешеләр административ комиссиягә чакырылачак һәм аларга штрафлар салыначак, аларның исем-нәрен сезнең газета аша халыкка күрсәтергә дә уйлыйбыз.
Гөлсинә ЗӘКИЕВА