Тәрбияче белән спектакльгә

2014 елның 17 декабре, чәршәмбе
Тәрбияче белән спектакльгә
12 декабрьдә сәнгать мәктәбендә узган җәмәгать тәрбиячеләре киңәшмәсендә аларга тәрбиядә булган балалары белән бергә мәдәни чараларга барырга тәкъдим ителде. Берничәсенә балигь булмаганнар комиссиясе сәркатибе Лилия Завялова 16 декабрьдә күрсәтеләчәк спектакльгә чакыру билетлары да тапшырды.
—Мондый чараларга тәрбиягә авыр бирелүче яшүсмерләрне җәлеп итү бик мөһим. Киләчәктә җәмәгать тәрбиячеләре белән очрашулар квартал саен узачак. Башкарган эшләр белән беррәттән без бу турыда да хисап алачакбыз,— диде район башкарма комитеты җитәкчесенең социаль мәсьәләләр буенча урынбасары Илнур Котдусов.
Бу көнне җәмәгать тәрбиячеләре Мәрхәмәтлек үзәге психологы Инна Нурмиевадан бик күп файдалы киңәшләр дә ишеттеләр. Соңыннан залга исәптә торучы балалар үзләре дә чакырылды. Алар каршында сәхнәдә “Без барын да булдырабыз!” мөмкинлекләре чикләнгән балалар республика конкурсы лауреатлары чыгыш ясады. Аларның җыр-биюләрен дулкынланмый карау мөмкин түгел.
Гүя, язмыш сынавына бирешмәүче көчле рухлы бу балалар залда утыручы яшьтәшләренә бездән үрнәк алыгыз, бүтән ялгыш адым ясамагыз, дип дәшәләр иде.
ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International