Кимүнең сәбәпләре төрле

Кимүнең сәбәпләре төрле
13 декабрьдә район башкарма комитеты җитәкчесе Илшат Нуриев үткәргән киңәшмәдә Арча муниципаль районында алкоголь базарының торышы, алкоголь һәм спирты булган продукциянең законсыз әйләнешен булдырмау чаралары турындагы мәсьәлә каралды.
— Тормыш күрсәткәнчә, авылларда кибетләр саны кимү яки аларның бөтенләй булмавы алкоголь продукциясен яшереп сатуның артуына китерә, — диде район җитәк-чесе. — 2014 елның декабрендә республикада “Легаль булмаган алкоголь” айлыгы игълан ителде, алкоголь базарын тотрыкландыру буенча “Юл картасы расланды. Без районда авыл җирлекләре башлыклары, дәүләт алкоголь инспекциясе, эчке эшләр бүлеге, алкоголь продукциясе әйләнешен легальләштерү буенча ведомствоара комиссия һәм әлеге мәсьә-ләләргә кагылышлы башка оешмалар белән берлектә эш алып барырга тиешбез.
Татарстан Республикасының этил спирты һәм алкогольле продукция җитештерүне, әйләнештә йөртүне, сыйфатын дәүләт тикшерүен тәэмин итү һәм кулланучылар хокукларын яклау буенча дәүләт инспекциясенең Арча территориаль органы җитәкчесе Булат Кадыйров чыгышыннан күренгәнчә, районда лицензиясе булган 193 сәүдә объекты алкоголь продукциясен ваклап сатарга хокуклы. Шуларның 54е район үзәгендә, 134е авылларда урнашкан (2013 елда 219 булган).
Быел “Арча сәүдә идарәсе”нең “Нарат” ширкәте — 7, “Курса” ширкәте — 5, “Яңа Кенәр”, “Шушма”, “Торг” ширкәтләре берәр кибеттә алкоголь сатуны туктатканнар. 44 авылда алкоголь продукциясе бөтенләй сатылмый. Быел сигез айда районда 407 мең литр алкоголь продукциясе сатылган, бу 2013 елның шул чорына карата — 90, 2012 елдагыга карата 77,1 процент тәшкил итә. Быел сигез айда районның бер кешесенә уртача 7,8 литр (республика буенча 9,6 литр) туры килә.
Алкоголь продукциясе ни өчен азрак сатыла башлаган соң? Беренче сәбәп — аракы әйберләренә бәя күтәрелү. Аннан соң — халыкта акча булмау, күп кешеләрнең шәһәрләргә эшкә йөрүе (шуннан алалар дип уйларга була), сәламәт яшәү рәвеше алып баручылар, шул исәптән дин тотучыларның саны арту.
Әмма сәбәпләрнең тагын берсе бар әле.
— Россия Эчке эшләр министрлыгының Арча районы буенча бүлеге хезмәткәрләре 2014 елның унбер аенда 123 тикшерү үткәрделәр, — диде бүлекнең икътисадый куркынычсызлык һәм коррупциягә каршы тору төркеме өлкән опер-уполномоченные Айнур Вәлиев. — Шуларның 65е — ваклап сату челтәрендә, 31е — автотранспортта, 24е — шәхси секторда.
2014 елның февралендә Яңа Кенәр авылында Г.Муллагалиеваның өеннән ялган билгеләре булган спиртлы сыеклык сатуы ачыклана. Шундый 38 шешә сыеклыкны табып алып юк итәләр.
2014 елның 11 июнендә Арча шәһәрендә яшәүче И.Зариповтан этикеткалары булмаган бишәр литрлы 10 пластик савытка тутырылган спирты булган 50 литр сыеклык алына һәм кешеләр сәламәтлегенә зыян китергәнче юк ителә.
Иске Чүриле, Иске Җөлби авылларында законсыз спиртлы эчемлекләр белән сату итү фактлары ачыкланып, гаеплеләр җавапка тартылган.
Киңәшмәдә шулай ук “Арча сәүдә идарәсе” ширкәте директоры урынбасары Салихҗан Хәкимҗанов, 29 номерлы район үзәк даруханәсе мөдире Лилия Хәкимова, кайбер авыл җирлекләре башлыклары чыгышлары тыңланды.
Ильяс ФӘТТАХОВ