Бала үзе өйрәнә

Бала үзе өйрәнә
Район балаларны тернәкләндерү үзәгендә “Монтессори–терапия хезмәте”н куллану буенча республика күләмендә семинар булды. Анда район башкарма комитеты җитәкчесенең социаль мәсьәләләр буенча урынбасары Илнур Котдусов катнашты. Балаларны тернәкләндерү үзәкләре җитәкчеләре, белгечләре үзара аралашып, тәҗрибә туплады.
Район балаларны тернәкләндерү үзәге җитәкчесе Наилә Сәмиева:
— 2013 елда без, Россия күләмендәге социаль проектлар конкурсында “Монтессори–терапия хезмәте” проекты белән катнашып, 1 млн. сумнан артык грант оттык, — дип сөйләде. — Бик күп җиһазлар алдык. Бездә Монтессори терапиясе буенча 8 педагог, 54 бала шөгыльләнә.
Мария Монтессори — Италия педагогы. Баланы мәҗбүри рәвештә тәрбияләргә, өйрәтергә кирәкми, аңа бары тик үсү өчен мөмкинлек тудыру һәм ярдәм итү сорала. Монтессори әнә шул алымны алга сөрә. Мәсәлән, балага карандашлар, кәгазь бите бир дә, өйрәтмә, ә бәлки нәрсә эшләгәнен читтән генә күзәт. Бала үзлегеннән рәсем ясый–ясый менә дигән рәссамга әверелергә мөмкин!
— Мин Россиянең бик күп өлкәләрендә булдым, — дип сөйләде республиканың “Көзге” халыкка социаль–психологик ярдәм күрсәтү үзәге директоры Нина Исланова. — Бездә күпкә яхшырак. Уңайлыклардан файдалана белергә генә кирәк. Чит илләрдән (Америка, Англия) тернәкләндерү учреждениеләре җитәкчеләре килгәли, алар бездәге хезмәтләрнең бушка булуына исләре китә.
Район тернәкләндерү үзәге педагог–психологы Эльвира Һадиева Монтессори терапиясен ничек куллануы турында җентекләп сөйләде.
— Бала үзе нәрсә яхшы, нәрсә начар икәнен аерырга тиеш, — диде ул. — Аңа мөмкинлекләр тудырып, юнәлеш кенә биреп җибәрергә кирәк.
Эшлекле сөйләшүдән соң семинарда катнашучылар монтессори–терапевтлар үткәргән математика, рус теле сәгатьләрендә булдылар, логопед, хезмәт инструкторы алып барган дәресләрне, музыка белгече әзерләгән концертны карадылар. Аларның һәркайсы кызыклы иде. Монтессори терапиясе буенча нинди генә җиһазлар юк! Балалар монда дәваланып кына калмый, ә бәлки төрле җиһазлар яр-дәмендә хәрәкәт, тоемлау, сөйләшү күнекмәләре аша тормышка төрле яклап яраклашырга да өйрәнәләр. Әнә, сөйләшүе кыенрак бирелгән Амаль хезмәт дәресендә мамык таякчыклардан ничек матур итеп бәрән ясап куйды?! Бу кызыклы иҗат эше һәм вак әйберләр белән эшләү аның сөйләмен дә яхшыртачак.
— Хезмәт дәресен бик яраталар, — ди инструктор Гөлнара Салихҗанова. — Материаллар күп һәм кызыклы. Юнәлеш бирәбез дә, балалар үзләре иҗат итә. Дәрестән бер дә китәселәре килми.
Балалар концерт куеп та шаккатырды. Коляскадагы Рәсимнең Аделина белән рус халык биюен башкаруы музыка белгече Ләйсән Галиеваның хезмәт нәтиҗәсе. Кайсы өлкәне алсаң да шулай.
Соңыннан кунаклар фикерләре белән кызыксындым. Кукмарадан килгән социаль педагог Алия Сафиуллина:
— Арча тернәкләндерү үзәге материалларга, җиһазларга бик бай, без бу яктан мактана алмыйбыз, — диде.
— Безнең өчен иң мөһиме — аралашу, — ди Лаештан килгән педагог–психолог Гүзәлия Абдулкадыйрова. — Монда балалар бик актив — бу педагоглар хезмәтенә бәя.
Румия Надршина