Татарча сөйләшәм һәм эшлим

Татарча сөйләшәм һәм эшлим
Татарча да яхшы бел, русча да яхшы бел, икесе дә безнең өчен иң кирәкле, якын тел. Бу сүзләр ул көнне бик күп яңгырады. Иң кызыгы шунда, рус милләтеннән булганнар тарафыннан һәм татарча. Анда Арча педагогика көллиятендә “Мин татарча сөйләшәм һәм эшлим” дигән рус милләтеннән булган тәрбиячеләрнең һөнәри осталыклары буенча беренче республика бәйгесе булды.
2013 елда Татарстан Республикасы Президенты тәкъдиме белән Арча педагогика көллиятендә милли кадрлар үзәге ачылган иде. Республика районнарыннан килгән рус милләтеннән булган тәрбиячеләр өчен биредә балалар бакчаларында рус балаларын татар теленә өйрәтү буенча курслар эшли башлады. Һәм бу көнне шушы курсларда белем алган тәрбиячеләрнең бу өлкәдә алган белемнәре генә түгел, һөнәри осталыклары да тикшерелде.
— Бәйге ике турда үтте. Беренчесендә тәрбиячеләр “Мин һәм миндә тәрбияләнүчеләр татарча сөйләшәбез” дигән темага эшләрен җибәрделәр. 55 тәрбиячедән иң көчле татар телен белүче 15е бүген финал ярышына җыелды. Бу әлеге курсларның нәтиҗәсе, дисәк тә була, — диде Арча педагогика көллияте җитәкчесе Гөлнара Гарипова.
— Балалар бакчаларында рус балаларына татар телен өйрәтү буенча республика күләмендә үткәрелә торган беренче һөнәри бәйге бу. Ул тәрбиячеләрнең һөнәри осталыгын күтәрүгә юнәлдерелгән. Балалар бакчаларына йөрүче рус һәм татар милләтеннән булган балалар, шулай ук рус тәрбиячеләре белән татар балалары бер-берсе белән аралашу, бер–берсен аңлау өчен аларның рус телен дә, татар телен дә белүләре кирәк, — диде жюри рәисе, Татарстан Республикасы мәгариф һәм фән министрлыгының бүлек җитәкчесе, доцент һәм педагогия фәннәре кандидаты Роза Шәяхмәтова.
Казаннан, төрле шәһәрләр һәм районнардан килгән тәрбиячеләр башта үзләре белән таныштырды, аннан балалар белән уеннар оештырдылар, сүзләр тәрҗемә иттеләр, иҗади осталыкларын күрсәттеләр. Барысы да татар телендә. Чит телне өйрәнү җиңел эш түгел. Аеруча безнең татар телен үзләштерү кыен, диләр. Шулай да өйрәнгәннәр бит. Кайберләрен татарлардан аерып та булмый.
— Мин Арча кызы, Арча педагогика көллиятендә белем алдым. 20 ел инде тәрбияче булып эшлим. Балалар бакчасына эшкә килгәндә бер сүз дә татарча белми идем. Ә бергә эшләүче тәрбияче ярдәмчесенең, киресенчә, русчасы начар. Балаларның да кайберләре белән татарча сөйләшергә кирәк. Менә шулай татар теленә өйрәнергә туры килде. Аннан көллияттәге махсус курсларда укып, белемемне ныгыттым. Татар илендә, татарлар арасында яшәп, татар телен белергә кирәк, дип уйлыйм, — ди Арчаның икенче балалар бакчасы тәрбиячесе Ольга Темячева.
Белү генә түгел, су кебек эчә аны Ольга. Минем белән дә татарча сөйләште. Шуңа бәйге биремнәре дә аңа авыр тоелмагандыр. Көч биреп торырга әнә хезмәттәш-ләре дә килгән.
— Ольга һәрьяктан булган. Кулыннан килмәгән эше юк. Бер генә бәйге дә аның катнашыннан башка үтми. Кирәк икән Кар кызы да, Кыш бабай да ул, — ди икенче балалар бакчасы җитәкчесе Фәния Шакирова.
“Мин татарча сөйләшәм һәм эшлим” исемле рус милләтеннән булган тәрбиячеләрнең һөнәри осталыгы буенча беренче республика бәйгесендә Ольга икенче урынны алды. Аңа 10 мең сум акчалата бүләк тапшырылды. Котлауларга без дә кушылабыз, Ольга.