Медицина иминияте полисын алыштыру ашыгычмы?

Медицина иминияте полисын алыштыру ашыгычмы?
Медицина учреждениеләренә мөрәҗәгать итәргә уйласаң, беренче чиратта мәҗбүри медицина иминияте полисын сорыйлар. Чөнки ул хастаханәләрдә дәвалану өчен төп документ. Аның нигезендә иминият компаниясе клиентларына дәүләт гарантиясенә кергән дәвалауны алырга мөмкин. Полисларны Татарстан Республикасының төрле почмагында кулланырга була. 2011 елда Россиядә бердәм үрнәктәге медицина иминияте полислары бирелә башлады. Тик полисны алу өчен сәгатьләр буе чират торырга туры килә. Ни өчен?
Халыкны кызыксындырган кайбер сорауларга җавап алу максаты белән без иминият компаниясе вәкиллеге директоры Мөнәвәрә Әхмәтгалиевага мөрәҗәгать иттек.
— Мөнәвәрә Наримановна, медицина иминияте полисларын алыштыру ни өчен шундый ыгы-зыгы тудырды? Шул срокта алыштырып бетерергә дигән билгеле бер вакыты бармы аның?
— Бездә халык бөтен нәрсәне вакытында эшләргә ярата. Берсе тотынса, барысы да кузгала. Арчада барлык район халкына 2 белгеч кенә хезмәт күрсәтә. Һәр клиент белән кимендә 15 минут эшләргә кирәк. Ашыгыч әйбер түгел икәнлеген аңлатып та карыйбыз. Тик кеше чиратта тора, китми. Тагын бер кат исегезгә төшерәсем килә, 51нче маддә нигезендә иминиятләнгән затларга 2011 елның 1 маена кадәр бирелгән мәҗбүри медицина иминияте полислары аларны бердәм үрнәктәге мәҗбүри медицина иминияте полисларына алыштырганчыга кадәр га-мәлдә була.
— Полис алыштыру өчен һәр кеше үзе килергә тиешме?
— Әйе. 18 яшькә кадәрге балаларның полисларын әти-әнисе алыштыра ала, калганнары барысы да үзләре килә. Анкета тутырасы, 6 урынга кул куясы бар. Башта вакытлыча таныклык бирәбез. Шул вакыт арасында кеше хастаханәгә мөрәҗәгать итсә, аны шул таныклык буенча кабул итәчәкләр. 30 эш көне эчендә төп нөсхәсе кайта.
— Хәзер кеше чит төбәкләргә күп чыга. Шунда авырып китте, ди. Иске полис белән хастаханәләргә кабул итәләрме соң?
— Медицина оешмасы һәм медицина хезмәткәре тарафыннан ашыгыч ярдәм кешегә бернинди каршылыксыз, бушлай һәркайда күрсәтелә. Иске үрнәктәге полислар Россиянең бөтен территориясендә дә кабул ителә. Ләкин кайбер төбәкләрдә безнең компания турында белмиләр, шуңа кешегә медицина ярдәме алу белән кыенлыклар туарга мөмкин. Ә инде яңа кабул ителгән бердәм медицина полисы Россия Федерация-сенең һәрбер субъектында да әйләнештә. Россия-нең кайсы почмагында булсагыз да, 88005000303 телефонына шалтырата аласыз.
— Ә менә медицина ярдәме күрсәтү белән бәхәсле мәсьәләләр туган очракта полис ияләренә өстенлек бармы? Алар сездә үзләренә яклау таба аламы?
— Бездә иминиятләштерелгән затларны яклаучы хезмәт бар. Ул тәүлек буе эшли һәм медицина ярдәме күрсәтү белән бәйле бәхәсле мәсьәләләрне хәл итәргә булыша. Бу он-лайн режимында эшләүче хезмәт. Ягъни пациент белән поликлиникада бәхәсле хәл туа икән, ул шунда ук безгә шалтырата ала. Безнең белгечләр аның проблемасын хәл итү өчен әлеге дәвалау учреждениесе җитәкчелеге белән элемтәгә керә.
— Аңлатуыгыз өчен рәхмәт, Мөнәвәрә Наримановна.
Гөлсинә ЗӘКИЕВА