Бәяләр бакчаларда үзен сиздерәме

Бәяләр бакчаларда үзен сиздерәме
Азык–төлеккә бәяләр үзгәрүнең балалар бакчаларына да йогынтысы тими калмагандыр. Бу турыда иң башта район прокуроры ярдәмчесе Рамил Йосыпов белән сөйләштек.
— Бакчаларны тикшергән юк, — дип җавап бирде прокурор ярдәмчесе. — Әлегә республика прокуратурасыннан бакчаларны тикшерергә дигән күрсәтмә килмәде. Шикаятьләр дә кермәде.
Республика буенча “Роспотребнадзор”ның Арча төбәге бүлеге җитәкчесе Эльвира Шәйхуллина:
— Бакчаларда ризык сыйфаты буенча таләпләр-не тупас бозу очраклары ачыкланганы юк, — диде.
Товар белән тәэмин итүчеләр белән узган ел төзелгән килешүләрдәге бәяләр бүгенгедән шактый аерыла. Бу мәсьәләне күптән түгел районга республиканың ФАС идарәсе вәкиле килгәч тә күтәрделәр.
Район мәгариф идарәсендә балалар бакчаларында туклану буенча җаваплы Гөлнара Ныркова болай ди:
— Бакчаларда баланың бер көнлек ашавы 98 сум 95 тиенгә төшә. Арчадагы һәм берничә авылдагы бакчаларны азык–төлек белән “Айракс” ширкәте тәэмин итә. Бәяләрдә элеккеге белән сизелерлек аерма юк. Авыл кибетләре тәэмин иткән кайбер авыл бакчаларында бәяләрдә бик аз гына аерма бар. Банан бик нык кыйммәт-ләнеп китте. Кайвакыт аның урынына башка җиләк–җимеш бирелә. 1 марттан өстәлләргә кыяр, помидор куела башлады. Бакчалар 1нче категорияле сыйфатлы ит белән тәэмин ителә.
“Айракс” ширкәте җитәкчесе Әгъләм Локманов:
— Безнең тәҗрибә зур, — дип сөйләде. — Бәяләр уйнавыннан бакчаларга зыян китермәдек. Зур суыткычларда, складларда туплап калган азык–төлек арзангарак та чыкты әле. Итне шәхси хуҗалыклардан алабыз. Ул җентекле ветеринария лабораториясе тикшерүе үткән булырга тиеш.
Кайбер балалар бакчалары мөдирләре, тәрбиячеләр белән сөйләштем. Берсеннән дә зарлану сүзе ишетмәдем. Киресенчә, бездә ашау бик әйбәт, диделәр.
Күпербаш һәм Арчаның 2нче балалар бакчасына төшке ашны туры китереп бардым. Алдан хәбәр итеп түгел. Күпербашта (13 март) балаларга фаршлы токмачлы аш, ит белән дөгеле вак бәлеш бирделәр. Эчтә, кухня диварына 10 көнлек меню элеп куелган.
— Меню белгечләр тарафыннан эшләнгән әзер рецептура буенча төзелә, — дип сөйли мөдире Энҗе Галиева. — Итле ризыклар көн саен бирелә, балык өч көнгә бер тапкыр. Азык–төлекне сыйфат срогына карап алам.
— Бакчада 18 ел пешекче булып эшлим, — ди Рәсилә Сәләхиева. — Элекке елларга караганда хәзер ашау әйбәтрәк. Сәгать 10нарда көн саен җиләк–җимеш бирәбез. Йогурт та бирелә. Итне ботлап китерәләр, ал ботны һәм артны чиратлап алабыз. Ит бик әйбәт.
Арчаның 2нче бакчасында (мөдире Фәния Шакирова) 16 мартта көндез балаларга борщ, пылау, кыяр, помидор бирделәр. Балалар сыпыртты гына. Үзем дә ашадым. Телеңне йотарлык! Пешекчеләр Рәидә Сабирҗанова белән Зөлфия Закирова уңганлыгына һәм ризыкның булуына бәйле бу. Ул турыда аерым язарбыз.
— Хәзер бакчада туклану күпкә яхшы, — дип сөйли тәҗрибәле пешекче Рәидә Сабирҗанова. — Ризык ассортименты төрлеләнде.
Теманы тагы да дәвам итеп була, әлегә нокта куеп торыйк.
Румия НАДРШИНА