Тәрбиячеләр сәнгатьтә дә оста

Тәрбиячеләр сәнгатьтә дә оста
“Илнең, җирнең, тыныч көннең кадерен белеп, җырлап яшик!” дигән оешма, предприятие, учреждениеләр иҗат концертлары мәктәпкәчә яшьтәге балалар учреждениеләре коллективлары чыгышы белән тәмамланды.
Балалар бакчалары тәрбиячеләре район күләмендә үткәрелгән бер генә чарадан читтә калмый. Кирәк икән, сәхнәгә чыгып җырлыйлар, бииләр, кирәк булса, шул чараны үзләре оештырырга да күп сорамыйлар. Аларның сәнгать өлкәсендәге осталыклары бәхәссез. Шуңа шәһәр балалар бакчалары коллективлары куйган концертның югары дәрәҗәдә буласы көн кебек ачык иде.
Узган атнада Арча Мәдәният йортында үткән концерт 50дән артык кешене берләштергән хор чыгышы (җитәкчесе Гөлнара Гәрәева) белән башланып китте. Зәки Зәйнуллинның “Кырык бернең арбалы хатыннары” спектакленнән өзекне тамашачы тын калып карады. Бер станциядә сугышка алып киткәннәрен көтеп, ачтан тилмереп яткан ирләренә уфалла арбасына төяп ашарга илтергә киткән авыл хатыннары, алар кичергән юл газаплары, ирләрен төягән поездның аларның борын төпләреннән сызгырып үтеп китүе — бар да залдагыларның, аеруча өлкәннәрнең күңеленә ук белән кадалгандай итте, иң нечкә кылларына чиртте. Уйнаулары да оста иде.
Ул көнне балалар бакчаларында балаларыбызны тәрбияләүчеләр бер үзләре зур концерт куйды. Гаилә ансамбле дә (Земфира, Рената һәм Ильяс Хәсәновлар) яраткан көйләрен башкарды, Сания ханым Галиуллина гармунда уйнап җырлады, “Шәл бәйләдем” биюе дә алкышлар яулады, кул эше остасы Раушания Закирова хезмәтләре белән дә таныштык, шаярып–көлеп тә алдык. Гомумән, һәр чыгыш үзенчәлекле һәм матур булды, һәр номер күңелләрдә матур тәэсир калдырды. Балалар да өлкән апаларына ярдәмгә килгән иде. Алар җырлады да, биеде дә. Тамашачы ул кичне рәхәтләнеп ял итте, күңел ачты. Ә тәрбиячеләр сәхнәдә осталыкларын тагын бер кат исбатлады.