ХЕЗМӘТ ХАКЫН ВАКЫТЫНДА ТҮЛӘ

ХЕЗМӘТ ХАКЫН ВАКЫТЫНДА ТҮЛӘ
Районда хезмәт хакы бирәчәге булган предприятиеләр бар. Бу турыда иң элек район прокуроры ярдәмчесе Рамил Йосыпов белән сөйләштем.
– Эшләүче коллективларның хезмәт хакын вакытында алу-алмау мәсьәләсен һәрдаим конт- рольдә тотабыз, шикаятьләр белән дә эшлибез, – дип сөйләде ул. – Соңгы вакытта 2014 елда “Арча элеваторы” акционерлык җәмгыяте коллективыннан кергән шикаять нигезендә ачылган административ эш (бер-бер артлы өчәү булды алар) җәмәгать суды каравына җибәрелде. Әле менә яңа гына “Икмәк комбинаты” җитәкчесенә карата ачылган административ эш җәмәгать суды каравына бирелде.
Хезмәт кешесен яклаучы Россия Федерациясе Хезмәт кодексы барлыгын беләбез. Законның хезмәт хакына бәйле маддәләрен тупас бозучылар турында сөйләүне сорап район прокуроры урынбасары Радик Хәбибуллинга мөрәҗәгать иттек.
– Россия Федерациясе Хезмәт кодексының 136нчы маддәсе нигезендә хезмәт хакын бирү вакыты эчке хезмәт кагыйдәләрендә, коллектив килешүе яки хезмәт килешүендә билгеләнә. Хезмәт хакы билгеләнгән көнне ярты ай саен түләнергә тиеш. 2014–2015 елларда “Арча элеваторы” акционерлык җәмгыяте җитәкчесе Н.Гобәйдуллин, хезмәт хакын вакытында бирмичә, РФ Хезмәт кодексының 136нчы маддәсе таләпләрен тупас бозды. РФ Административ хокук бозулар турындагы кодексының 5.27 маддәсе 2нче бүлегендә вакытында хезмәт хакы түләмәгән җитәкчене 3 елга кадәр эшеннән читләштерү каралган.
Бу эш буенча икенче җәмәгать суды утырышы 2015 елның 19 мартында булды. Әлеге административ эш район жәмәгать судьясы Марат Камаев рәислегендә район прокуроры ярдәмчесе Рамил Йосыпов катнашында каралды. Ни сәбәпледер, утырышка “Арча элеваторы” акционерлык җәмгыя- те җитәкчесе килмәде. Утырыш аннан башка гына үтте. “Арча элеваторы” акционерлык җәмгыяте җитәкчесе Н.Гобәйдуллин РФ Административ хокук бозулар турындагы кодексының 5.27 маддәсе 2нче бүлеге нигезендә ел ярымга эшеннән читләштерелде.
Утырыштан соң җәмәгать суды рәисе Марат Камаевтан:
– Районда хезмәт хакын вакытында бирә алмаган эш бирүчеләрне җавапка тарткан очраклар бармы тагы? – дип сорадым.
– 2013 елда хезмәт хакын вакытында бирмәгән “Балык хуҗалыгы” җитәкчесе үз эшеннән читләштерелде. Бүген бу хуҗалык белән проблемалар юк. Менә хәзер тагын район прокуратурасыннан “Икмәк комбинаты”ның коллективка бирәсе хезмәт хакын эзләп алу буенча эш керде. Ә, гомумән алганда, хезмәт хакы белән бәйле эшләр соңгы вакытта кимеде.
“Арча элеваторы” акционерлык җәмгыяте җитәкчесе, җәмәгать суды карары белән риза булмыйча, район судына апелляция биргән. Әлеге административ эшне 2015 елның 14 маенда судья Гөлназ Вәлиева рәислегендә район суды карады. Район суды җәмәгать суды карарын үзгәрешсез калдырды һәм закон көченә керде.
Җитәкченең үз эшендә калырга тырышуы табигый хәл. Димәк, предприятиене алга җибәрү, хезмәткәрләргә вакытында хезмәт хакы бирү мөмкинлекләре бар. Моңа ышанасы килә.
Румия Надршина