ЯҢА ПУНКТ АЧЫЛДЫ

ЯҢА ПУНКТ АЧЫЛДЫ
1 июльдән сату өчен билгеләнгән терлекләр бары тик махсус сугым пунктларында гына чалынып эшкәртелергә тиеш. Безнең районда шундый цех Көтек авылы янында төзелде. 30 июльдә аны ачу тантанасы булды. Анда район җитәкчесе Илшат Нуриев, җирлек башлыклары, хуҗалык җитәкчеләре, ит белән эш итүче эшмәкәрләр катнашты.
— Без закон кушканны үтәргә тиешбез, — диде район җитәкчесе үзенең чыгышында. — Бөтен таләпләргә туры китереп шундый пункт төзегән өчен Нияз Шәрәповка зур рәхмәт. Биредә хәләл ит әзерләнәчәк, быелдан башлап район мәктәпләре, балалар бакчалары бары тик шушы пунктта эшкәртелгән итне генә алачак.
Район ветеринария берләшмәсе җитәкчесе Ринат Фәйзрахманов 1 июльдән терлек сую, пунктның эшчәнлек тәртибен аңлатты.
— Сатуга дигән терлекне пунктка алып килгәндә аның үзеңнеке булуы турында авыл җирлеге белешмәсе, барлык дәвалау чаралары үткәрелү турында участок ветеринария фельдшеры белешмәләре булу мәҗбүри, — диде ул. — 1 июльдән соң ветеринария берләшмәсе келәймә белешмәләре бирми.
Пунктка китерелгән малны кабул итеп алалар, машинаны юалар һәм дезинфекциялиләр. Көнендә сую мөмкинлеге булмаса, аларны урнаштырып тору урыны да бар. Эшкәртү цехлары заманча җиһазланган. Итне суытырга кирәк булса суыткычлар эшләп тора. Үпкә- бавырлары гына түгел, мөгез-тоякларга кадәр эшкә китә. Теләсәң, бәясе канәгатьләндерсә, терлекне бөтенләе белән тапшырып, акчасын алып китә аласың.
Билгеле инде, транспорт мәсьәләсе дә кузгатылмый кала алмады.
— Кирәк булса, терлекне үзебез барып алабыз, — ди пункт мөдире Нияз Шәрәпов.
— Бер терлекне чалып, эшкәртеп бирү күпмегә төшә инде?
— Без Арча районы кешеләре өчен терлекнең тиресен, башын калдырсалар, шуңа риза инде.
Район җитәкчесе Илшат Нуриев шәхси хуҗалыкларда сыерлар кимүенә борчылуын белдерде. 78 хуҗалыклы Чулпан авылында нибары өч сыер калган.
— Сез дә бу мәсьәләне игътибарда тотыгыз, — диде ул, хуҗалык җитәкчеләренә. — Печән, фураж белән тәэмин итүдә тоткарлыклар булырга тиеш түгел.
Район җитәкчесе игеннәрне урып-җыюда оешканлык булырга тиешлеген искәртте. Соңгы көннәрдәге эссе һава бөртекләрнең дымлылыгын киметте. Элеватор ашлыкны кабул итеп, эшкәртеп бирергә әзер.
Элеваторның яңа директоры Ләйсән Әһлиуллина ашлыкны эшкәртеп бирү тәртибен аңлатты.
Ильяс Фәттахов