ФОТОРЕПОРТАЖЛАР

Бүген Үзәк китапханә каршында эшләп килүче “Каурый каләм” әдәби-иҗат берләшмәсе әгьзасы, үзешчән шагыйрь тормышны яратып, иҗатта янып яшәүче каләм остасы, 2 китап авторы хөрмәтле райондашыбыз, шигьри җанлы Ренат Шәрәфиевның иҗатын китап укучыларга яктыртуга багышланган әдәби кичә узды. Чарада китап укучыларга үзешчән шагырьнең “Кайтыйк әле яшьлек язына” дигән яңа китабы тәкьдим ителде. Әдәби-музыкаль кичәгә киң катлам китап укучылар, “Каурый каләм” әдәби-иҗат берләшмәсе әгъзалары, китапханәчеләр, шагырьнең туганнары, якыннары килде. Очрашуда шагыйрь иҗатын яктырткан презентация һәм видеороликлар күрсәтелде. Кичә барышында китапның һәр бүлектән шигырьләр укылды, райондашыбыз, көйләр авторы Светлана Хазиева белән берлектә җырлар яңгырады. Чарада шигырь китабына кереш сүз язган Татарстан Язучылар берлеге әгъзасы Гөлчирә Нәҗметдинова чыгыш ясады. Әдәби-музыкаль кичәдә яңа китапка карата фикерләр тыңланды, җылы сүзләр, матур теләкләр, моңлы җырлар гармун көйләренә уралып уңышлы үтте. Ринат Минзөфәр улына алдагы елларда да яңа китаплары дөнья күреп, китап укучыларны сөендерер дигән теләктә калдык.

7-9 ноябрьдә Казанда XXll Халыкара «Золотая нить» дизайн-проекты бәйгесе узды. «Заманча этник костюм» номинациясендә Арча балалар сәнгать мәктәбенең «Хәят» этник костюм театры төркеме кызлары III дәрәҗә лауреат дипломына лаек булды. Шулай ук «Хәят» төркеменең кече группа кызлары беренче тапкыр бәйгедә чыгыш ясап ll дәрәҗә лауреат дипломына лаек булды. Алар бәйгенең кубоклары һәм бүләкләре белән бүләкләнде. Җитәкчеләре Кәримова А.А., Галимҗанов А.Р., Гомәрова А.Д., Солтанова Д.Э.

29 октябрьдән - 5 ноябрьгә кадәр Төньяк Осетия-Алания Республикасы Владикавказ шәһәрендә «АЛТЫН МАЙДАН-Алания» Халыкара милли мәдәният фестивале-бәйгесе - 2025 узды. Фестивальдә Арча балалар сәнгать мәктәбенең “Хәят” этник костюм театры төркеме кызлары катнашып I һәм II дәрәҗә Лауреат дипломнарына лаек булдылар. Җитәкчеләре Кәримова Альмира Әхтәм кызы, Галимҗанова Айгөл Радис кызы, сәхнәгә куючы Гумерова Альбина Данис кызы, хореограф Солтанова Дина Эльмир кызы. Фестиваль программасы бик бай булды. Укытучылар «Халык гореф-гәдәтләрен өйрәнү нигезендә балаларның һәм яшүсмерләрнең этномәдәни үсеше» дип исемләнгән фәнни-гамәли конференциясендә катнаштылар. Шулай ук Бесланда урнашкан мемориаль комплекс, осталык дәресләре, экскурсияләр, музейларда булдылар. «Артхурон» халык фольклор бию театры концертын карадылар. “Хаят” төркеме кызларын һәм җитәкчеләрен җиңүләре белән котлыйбыз!

21 октябрьдә балалар сәнгать мәктәбендә беренче сыйныф укучылары өчен «Сәнгать доньясына сәяхәть» бәйрәме узды. 100 якын беренче сыйныф укучысы быел мәктәп укучылары сафын тулыландырды. Бу музыкантлар да, биючеләр дә, рәссамнар да. Бәйрәм театральләштерелгән тамаша белән башланып китте, Төп рольләрне «Зазеркалье» (җитәкчесе Зөлфия Кочурова) театр бүлеге укучылары уйнады. Әдәби персонаж Незнайка (Мәгъсүмов Ирек), шулай ук сәнгать феясы (Кочурова Оля) бию феясы (Шайдуллина Ләйсән) балалар белән күңелле уйнадылар, табышмаклар чиштеләр, викторинада катнаштылар, җырладылар, биеделәр. Беренче сыйныф укучыларының беренче чыгышлары да бәйрәмнең матур бизәге булды. Иҗатта беренче адымнарын гына башласалар да, мәктәп сәхнәсендә аларның чыгышлары күркәм һәм бик матур булды. Кечкенә артистларның һәр музыкаль номеры җылы каршы алынды һәм көчле алкышлар белән озатылды. Бәйрәм азагында балалар сәнгать мәктәбе директоры Сабирова Г.Б., укыту һәм тәрбия эшләре буенча директор урынбасары Хасанова З.Ф. укучыларга значоклар тапшырдылар, матур теләкләрен җиткерделәр. Чара балалар күңелендә җылы тәэсир калдырды.

Арча үзәк модель китапханәсендә «Авыл яши – Деревня живёт» проекты кысаларында Арчаның 1нче һәм 6 нчы мәктәпләренең өлкән сыйныф укучылары өчен фермерлар һәм эшмәкәрләр белән берлектә «Намуслы бизнес һәм сыйфатлы ризык» дигән темага аралашу сәгате үткәрелде. Очрашуда Арча муниципаль районы Авыл хуҗалыгы идарәсенең финанс-икътисад бүлеге җитәкчесе М.Р.Абдуллин, крестьян-фермер хуҗалыклары җитәкчеләре – Корайван авылыннан Ф.Д.Әхмәтханов һәм Мөндеш авылыннан Б.Х.Гарипов катнашты. Чара барышында балалар тәҗрибәле профессионалларның чыгышларын тыңладылар, кыйммәтле киңәшләр алдылар. Очрашып аралашу яшьләргә авыл хуҗалыгы өлкәсендәге һөнәрләренең әһәмиятен аңларга ярдәм итте. Алга таба бу өлкәдә эшкуарлык белән шөгыльләнергә теләк уянырлык мәгълүмат бирде.