Район башлыгы Илшат Нуриев 27 сентябрьдә Арча шәһәрендә яшәүче Бөек Ватан сугышы ветераны Үзбәк Сабировны туган көне һәм якынлашып килгән Өлкән яшьтәге кешеләр көне белән котлады, бүләкләр тапшырды.
– Мин сугышка үзем теләп киткән идем, – ди ветеран. – Тиз генә барып кайтырмын дип киткән җирдән җиде ел хезмәт итәргә туры килде. Һәр чорның үз рәхәтлекләре, үз авырлыклары бар. Сугыш башланганда без малайлар идек әле, ир-егетләр фронтка китеп барды. Без атлы лобогрейка белән иген урабыз, норманы үтәп кайтсаң бер кило бодай бирәләр. Әй, аңа шатланганнар!
Ильяс Фәттахов