«Минем дөньям» тренинг күнегүләре
9 нчы декабрьдә Арча «Мәрхәмәтлелек үзәге»нең гаилә hәм балаларга социаль ярдәм күрсәтү бүлегенең сенсор бүлмәсендә мөмкинлекләре чикләнгән балаларның әти-әниләре өчен тренинг күнегүләр үткәрелде.
Гаиләдә «үзенчәлекле бала» туганда әти-әниләр «Нигә бу минем белән шулай килеп чыкты?», «Нигә минем балам башкалар кебек түгел?» дип үз-үзләренә сорау бирәләр, күңел төшенкелегенә, депрессиягә бирелә башлыйлар. Ә балаларга дөнья авырлыкларын җиңү өчен иң беренче якын кешеләренең, гаиләсенең, әти-әнисенең ярдәме кирәк. Ләкин, әти-әниләр күп очракта үзләре ярдәмгә мохтаҗ, иң беренче психологик яктан. Шул максаттан, күңелсезлеккә бирелүдән, авырлыкларны җиңәргә ярдәм итү максатыннан, әти-әниләр белән төрле күнегүләр үткәрелде. Алар арасында «Үз-үзеңне макта», күнегү-пантомима «Пыяла аркылы сөйләшү», «Мактау», «Мин» сүзенең ике ягы». Шушы күнегүләр ярдәмендә әти-әниләрнең дөньяга, үз балаларына карашлары үзгәрде, курку, төшенкелек хисе юкка чыкты, төрле стресслы ситуацияләрдән, авыр хәлләрдән чыгу юлы бар икәне ачыкланды.