ЯҢАЛЫКЛАР
Дәүләт Советында үткән тантаналы чарада республика районнарыннан килгән 32 балага Татарстан Республикасы Дәүләт Советы Рәисе Фәрит Мөхәммәтшин паспортлар тапшырды.
Россиянең куркынычсызлык федераль хезмәте чик буе сагы институтына 2016 елга студентлар җыя. Мәгълүматларны 89050227761 телефоны аша алырга була.
Сабада Татарстан Республикасы муниципаль хезмәткәрләре Спартакиадасы кысаларында мунципаль хезмәткәрләр арасында мини-футбол буенча ярышлар булды. Арча районы командасы дүртенче урынны алды.
Яшел Үзәндә балалар һәм яшүсмерләр иҗатының “Йолдызлы карусель” икенче Бөтенроссия бәйгесе булды. Анда Арча балалар сәнгать мәктәбендә тәрбияләнүчеләр дә катнашты. Камил Носратов (гитара) беренче дәрәҗә дипломант исеменә лаек булды.
Казанда балалар һәм яшүсмерләр иҗатының “Алтын лира” беренче Халыкара фестиваль-бәйгесе узды. Анда Арча балалар сәнгать мәктәбе укучылары уңышлы чыгыш ясады. Илдус Гайнетдинов (гитара) икенче дәрәҗә лауреат исемен яулады. Диләрә Әхмәдиева (фортепиано) һәм Сусанна Фәйзрахманова (гитара) беренче дәрәҗә дипломант булдылар.
Терлекчелек тармагында үсеш 5 проценттан ким булмаска тиеш. Район җитәкчесе Илшат Нуриев җитәкчеләр һәм белгечләр алдына шундый бурыч куйды.
8 декабрьдә хуҗалык җитәкчеләре һәм белгечләре белән үткәрелгән киңәшмәдә сүз шул турыда барды. Район авыл хуҗалыгы һәм азык-төлек идарәсе җитәкчесе Айдар Габбасов унбер айлык эшкә анализ ясады, булган җитешсезлекләргә тукталды.
Район ветеринария берләшмәсе җитәкчесе Ренат Фәйзрахманов азык составында аеруча каротин җитмәүгә игътибарны юнәлтте. Ә бу үз чиратында күңелсез нәтиҗәләргә китерә.
Арчаның Марат Лотфуллин исемендәге 2нче урта мәктәбендә бу көн һәр елда истә калырлык итеп үткәрелә. Быел да шулай булды.
Укучылар, шәһәрнең көньяк өлешендәге күп функцияле үзәк хезмәткәрләре эчтәлекле, матур чыгышлар әзерләгән иде.
Бу көнне мәктәпкә хөрмәтле кунаклар — запастагы офицерлар Сергей Баһаветдинов, Юрий Козлов, Ренат Галиев килде. Алар үзләренең хәрби хезмәт юллары турында сөйләделәр, сорауларга җавап бирделәр.
Мәктәп әфган сугышында һәлак булган Марат Лотфуллин исемен йөртә. Кичәдә аның батырлыгы яңадан күз алдына килеп басты.
— Батырлыкка һәр көнне урын бар, — диде мәктәп директоры Руслан Низамов укучыларга мөрәҗәгать итеп. — Тәртипле булу, яхшы уку — үзе батырлык.
Җитмәсә, өстәп түлиләр. Бүген Арча һәм Әтнә районнары буенча Пенсия фонды идарәсе районда яшәү минимумыннан азрак пенсия алган 1189 пенсионерга 1 млн. сум өстәп түли. Пенсионерларны кызыксындырган сорауларга җавап алу максатыннан без Арча һәм Әтнә районнары буенча Пенсия фонды идарәсе җитәкчесе урынбасары Гөлназ Ибәтуллинага мөрәҗәгать иттек.
– Гөлназ Гыйлембаевна, искә төшерик әле, бүген пенсионерның яшәү минимумы күпме һәм киләсе елда ул ничек булачак?
– 2015 елда пенсионерның яшәү минимумы 6310 сум тәшкил итә, ә 2016 елда 7526 сум булачак.
Район мәгариф учреждениеләре хезмәткәрләренең профсоюз оешмасы җитәкчесе Вакыйф Харисов бадминтон һәм өстәл теннисы буенча финал ярышына дәшкәч, махсус кызыксынып бардым. Тарихы электән килгән әлеге заманча спорт төрләре белән шөгыльләнергә хәзер мәктәпләрдә мөмкинлекләр бар.
Мәкаләне язарга утыргач, район үзәгеннән иң ерак төбәкләрнең берсе Носы мәктәбе директоры, тәҗрибәле педагог Вәсим Бәдертдиновка шалтыраттым.
– Элек укытучылар Арчага килеп, спорт ярышларында катнаша идеме? – дип сорыйм.
– Мәктәптә 32 ел эшлим. Элек укытучыларның район үзәгенә килеп, бүгенгедәй күп төрле спорт ярышларында катнашканнарын хәтерләмим, – диде ул. – Соңгы вакытта бигрәк тә активлашып киттек. Көзлектә кросс бирдек, пневматик мылтыктан аттык, дартс уйнадык. Менә хәзер бадминтон, өстәл теннисы... Алда йөзү, шахмат, шашка, чаңгы ярышы, волейбол уеннары көтә.
Шимбә көн кич белән Ашытбаш мәдәният йортында шагыйрь Наил Касыймовка 60 яшь тулу уңаеннан юбилей кичәсе булды. Афәрин, мәдәният йорты директоры Айгөл Фәйзрахманова белән китапханә мөдире Талия Сабитова шундый матур бәйрәм оештырган.
Кунакларны тулы бер зал каршы алды. Ашытбашлылар авылдаш шагыйрьне әнә шулай зурлады. Наил Касыймов сәхнәдән:
– Казанда К.Тинчурин театрында үткәрелгән юбилеемда да болай дулкынланмаган идем, – дип сөйләде. – Туган авылда, мине яхшы белгән авылдашлар алдында сөйләве икенче...