РФ Хезмәт кодексына хезмәт эшчәнлеге турындагы мәгълүматларны электрон рәвештә формалаштыруга кагылышлы үзгәрешләр кертелде

16.12.2019 ел, №439-ФЗ номерлы Федераль закон нигезендә Россия Федерациясе Хезмәт кодексына хезмәт эшчәнлеге турындагы мәгълүматларны электрон рәвештә формалаштыру буенча үзгәрешләр кертелде. Үзгәрешләр 2020 елның 1 гыйнварыннан үз көченә керде.

         Россия Федерациясе Хезмәт кодексының 66 статьясы нигезендә билгеләнгән үрнәктәге хезмәт кенәгәсе хезмәткәрнең хезмәт эшчәнлеге һәм хезмәт стажы турында төп документ булып тора. Эш бирүче һәр хезмәткәргә хезмәткәрнең әлеге эш бирүчедәге эше төп хезмәт булган очракта хезмәт кенәгәләре алып бара.

        Федераль закон белән Россия Федерациясе Хезмәт кодексы 66.1 статья белән тулыландырылган, аның нигезендә эш бирүче электрон рәвештә хезмәткәрнең эшчәнлеге һәм хезмәт стажы турында, башкара торган эш, башка даими эшкә күчерү һәм хезмәткәрне эштән азат итү турында белешмәләрне, шулай ук эш бирүче тарафыннан Россия Федерациясе Пенсия фондының мәгълүмат системасына тапшырыла торган хезмәт килешүен туктату нигезләре турында төп мәгълүматны формалаштыра.

      Закон нигезендә соңгы эш урыны буенча эш бирүчедән дәүләт һәм муниципаль хезмәтләр күрсәтүнең күпфункцияле үзәгендә, Россия Федерациясе Пенсия фондында, дәүләт һәм муниципаль хезмәтләрнең бердәм порталын кулланып, хезмәт эшчәнлеге турында мәгълүмат алу ысуллары билгеләнгән.

       Федераль закон нигезендә, аның нигезләмәләрен гамәлгә ашыру максатларында, эш бирүчеләргә гамәлгә ашырырга кирәк булган кайбер чаралар каралган.

       2020 ел дәвамында эш бирүчеләргә локаль норматив актларга, килешүләргә һәм күмәк шартнамәләргә үзгәрешләр кертергә кирәк; һәр хезмәткәргә хезмәт законнарындагы үзгәрешләр һәм хезмәткәрнең эш бирүченең Россия Федерациясе Хезмәт кодексының 66 статьясы нигезендә хезмәт кенәгәсен алып баруын дәвам итүен яисә хезмәт эшчәнлеге турында Россия Федерациясе Хезмәт кодексының 66.1 статьясы нигезендә белешмә бирүен сайлау хокукы турында язма рәвештә хәбәр итәргә кирәк.

        Әгәр хезмәткәр эш бирүчегә күрсәтелгән гаризаларның берсен дә бирмәсә, эш бирүче хезмәт кенәгәсен Россия Федерациясе Хезмәт кодексының 66 статьясы нигезендә алып баруын дәвам итә.

Арча районы прокуроры ярдәмчесе,

юрист 1 класслы юрист                                                                 Д.А. Низамов