Апазда үзенчәлекле бәйрәм
Апаз авыл җирлеге (җитәкчесе Раушан Котдусов) 23 февраль – Ватанны саклаучылар көнен үзенчәлекле итеп үткәрәләр
Бу җирлеккә алты авыл керә: Апаз, Хәсәншәех, Пөшәңгәр, Мирҗәм, Каратай, Кызыл Игенче авыллары. Халык Апаз авылына җыелды. Район башлыгы Илшат Нуриев та туган авылына кайтты.
Иң башта сугыш каһарманнары һәйкәленә чәчәкләр салдылар, район башлыгы ил-көннәребез тыныч булсын дип, Ватанны саклаучылар көне белән котлады, 1 минутлык тынлык белән сугышта һәм сугыштан кайткач һәлак булганнарны искә алдылар.
Аннан Апаз мәдәният йортына керделәр. Тантаналы өлештән соң шахмат ярышлары башланып китте. Мәктәп укучылары һәм зурлар да – 30лап кеше ярышта катнашты. Баш хөкемдар Сөләйман Галиуллин булды.
– Халык күп килгән, сабантуемени! – дип, хис-тойгыларын белдерде шахматчылар.
Көндезге сәгать 2ләргә кадәр барды ярышлар.
Нәтиҗәләрне дә әйтеп үтәбез. Мәктәп яшендәге балалар арасында
Кызлар:
1 урын – Роза Минҗанова (Апаз мәктәбе, 7 сыйныф)
2 урын – Гүзәл Әсхәдуллина (Апаз мәктәбе, 4 сыйныф)
3 урын – Алинә Низамова (Пөшәңгәр мәктәбеннән килеп, Апаз мәктәбендә укый, 6 сыйныф)
Малайлар:
1 урын – Әмир Әмиров (Апаз мәктәбе, 7сыйныф)
2 урын – Руслан Котдусов (Пөшәңгәр мәктәбеннән килеп, Апаз мәктәбендә укый, 6 сыйныф)
3 урын – Данияр Зәкиев (Хәсәншәехка әби-бабасына кунакка кайткан онык)
Өлкәннәр:
1 урын – Сөләйман Галиуллин (Ашытбаш)
2 урын –Сәгъдулла Фазуллин (Пөшәңгәр)
3 урын – Айзат Минҗанов (Апаз)
Шахматчылар кайнар ризык белән тукландылар. Берәү дә бүләксез калмады. Ә 1нче, 2нче, 3нче урыннарны алучылар аерым бүләкләнде. “Бүләкләр әйбәт”, – дип куанды шахматчылар. “Шахматны тагын да остарак уйнарга!” дигән максат һәм яхшы кәеф белән таралышты алар.
Румия Саттарова