Су каланчасын кем карарга тиеш

Су каланчасын кем карарга тиеш
Хөрмәтле газета укучылар, “Хат юлга чакырды” рубрикасын җанландырып җибәрәбез. Һәркем үзен борчыган мәсьәләләр турында район газетасына яза ала. Без аларны урыннарга барып өйрәнербез, сезнең ярдәм һәм тиешле органнар белән бергәләп катлаулы хәлдән чыгу юлларын, проблемаларны чишү юнәлешләрен табарга тырышырбыз. Безнең максат кемнәндер гаеп эзләү түгел, ә бәлки һәрьякка файдалы чишелеш табу. Бер үтенеч бар: хатлар аноним булмасын иде. Редакция өчен генә дип, исем–фамилиягезне язмауны үтенсәгез, без аны сер итеп сакларбыз.
Ашытбаштан су каланчасы турында хат килде. Анда мондый юллар бар: “Элек басуга төзелгән су башнясы хәзер урам уртасында калды. Ул бик иске. Кайчан авар икән, дип шикләнеп тә куясың. Хәзер көн-төн башнядан су ташый. Янындагы йортларга су керү куркынычы туды. Шушы мәсьәләне уңай якка хәл итәргә ярдәм итә алмассызмы?”
Хатны алуга Ашытбашка киттек. Чыннан да, яңа, матур йортлар төзелгән яшьләр урамын су каланчасы ямьсезләп тора. Авылдан читтә булса, аңа игътибар итүче булмас иде. Ул, гадәттә, су бетсә генә искә төшә. Ә монда баш- ня күз алдында, җитмәсә якында яшәүчеләргә су басу кыркынычы яный башлаган. Илнур Әхмәтгалиевның гаражына кадәр килеп җиткән ул.
— Бу галәмәтне күреп, исләрем китте, — дип сөйли Илнурның әтисе Илсур Әхмәтгалиев. — Без аерым яшибез. Заманында колхозда баш инженер булып эшләдем. Бу башня 1989 елда басуга төзелде. Хәзер менә монда яңа урам барлыкка килде. Башня тузды. Суга кеше башына 20 сум түләп торабыз.
Шул тирәдә яшәүче Радик болай дип сөйли:
— Элек суны мин кудырдым. Җаваплылыгы зур. Гел карап, сакта торырга кирәк. Акчасы аз. Мең ярымга кем эшләсен монда?! Әнә, 75 яшьлек Нургаян абый риза булып йөри инде. Олы кеше булгач, су ташып акканын күреп тә бетерми торгандыр.
Нургаян абыйны да күреп сөйләштек. Аңа 80 яшь икән инде. Сөбханалла, Нургаян абый, күз тимәсен, болай аяк өстендә эшләп йөргәч, рәхмәт кенә инде сезгә! Тик менә су ташый бит... Аны нишләтергә?!
— Ашытбашта ике су башнясы бар, — дип сөйли Ташкичү авыл җирлеге башлыгы Фәим Фәйзуллин. — Аның икенчесе ферма ягында. Яңа Кенәр “коммунальные” осталарын чакыртсаң, киләләр үзе. Узган ел башняның череп тишелгән аскы ягын рәтләттек. Әнә, үзегез күрәсез, су кудыруны көйләп торучы “автомат” алып кайттык. Калган ки-рәкле әйберләрен табып, “автомат”ны урнаштырасы бар. 2025 елга кадәрге чорга авылларны су белән тәэмин итү схемасы эшләнде. Ашытбашка тагын бер су башнясы кирәк. Су башнялары үзенә хезмәт күрсәтә алырлык оешмага беркетелсә, эш күпкә уңайрак булыр иде.
Район күләмендә күтә-релә торган мәсьәлә бу. Су каланчаларын кем карап торырга тиеш? Мәсьәләгә ачыклык кертү өчен район инфраструктура үсеше секторы мөдире Илфат Рәхимов белән сөй-ләштек.
— “Автомат” куйгач, башнядан су ташымаячак, — диде ул. — Районда барысы 127 (күмәк хуҗалыкларныкы 56) су башнясы бар. Моннан берничә ел элек Арчага һәм Арча зонасындагы авылларның су башняларына “Водоканал–Сервис” ширкәте хезмәт күрсәтә башлады. Кенәр зонасында бу эш көйләнеп китә алмады. Узган ел “Яңа Кенәр торак–коммуналь хуҗалыгы” ширкәтенең бу хезмәткә лицензия срогы чыкты. Ә ул кыйммәт тора.
Һәр эшнең үз кешесе булган кебек, су каланчалары да аерым бер оешмага беркетелергә тиеш, дип беләм мин. Эчә торган су бит ул! Скважиналарны, су каланчаларын билгеле бер тәртиптә тотуның үз кагыйдәләре бар.
Әнә, “Водоканал–Сервис” ширкәте җитәкчесе Тәлгать Миндубаев:
— Арча һәм Арча зонасындагы авыллардагы халык белән суга түләү буенча килешүләр төзеп, су каланчаларын карап торабыз, — ди.
Ә бит аларга да тузган су каланчалары белән жиңел түгел. Авыл халкының да төрлесе бар: суга түләргә бик ашкынып тормаучылары җитәрлек. Яңа Кенәр зонасында да бу мәсьәләдә тәртип урнаштырасы иде.
Румия НАДРШИНА