ЯҢАЛЫКЛАР

23-24 май көннәрендә Түбән Мәтәскә җирлегендә Бөек Җиңүнең 71 еллыгына багышланган Арча районы белем бирү учреждениеләре укучылары турслёты булып узды. Ярыш “А” һәм “Б” классларына бүлеп үткәрелде.

Табигатьтә теплицадагы кебек шартлар урнашты: җылы, дымлы һава. Үләннәр да күзгә күренеп күтәрелә. Үлән генә түгел, дару инде алар, витаминга иң бай вакытлары.

— “Татарстан” ширкәтендә көтү 30 апрельдә чыкты, — ди район авыл хуҗалыгы һәм азык–төлек идарәсенең терлекчелек бүлеге консультанты Роберт Хәйретдинов. — “Ак барс” агрокомплексы”нда 4–5 майда көтә башладылар. “Ак барс” агрокомплексы”нда көтү чыкканнан соң да ун көн сөт артмады, сыерлар кыш буе организмда кимегән матдәләрне тупладылар, аннан соң гына сөт арта башлады.

Арча шәһәре халкы игътибарына!

Арча шәһәре башкарма комитеты санитария–экология икеайлыгы кысаларында җирлек территориясендә тышкы төзекләндерү, тиешенчә карап тору, җыештыруны оештыру, чисталык һәм тәртипне тәэмин итү кагыйдәләрен бозуларны ачыклау буенча рейдлар башлануы турында хәбәр итә. Чирәм чабылганмы, йорт яннарында төзелеш материаллары юкмы, йортларның алгы ягы, коймалары тиешле хәлдәме – 1 июньнән төп игътибар шуларга юнәлтеләчәк.

Билгеләнгән таләпләрне бозучылар Татарстан Республикасы Административ хокук бозулар кодексының 3.6 маддәсе буенча административ җаваплылыкка тартылачак. 

27 майда көндезге сәгать 11дә “Бердәм Россия” партия- се Арча җирле бүлекчәсенең җәмәгатьчелекне кабул итү бүлмәсендә Татарстан Рес- публикасы Дәүләт Советы депутаты Ринат Зиннур улы Закиров гражданнарны кабул итә. Адресы: Арча шәһәре, Банк урамы, 6а йорт (халыкны социаль яклау бүлеге бинасы). Алдан язылу өчен телефоннар: 3–18–08, 3–28–80.

Быелның көзендә Россия Дәүләт Думасына депутатлар сайлаячакбыз. “Бердәм Россия” партиясе үз кандидатларын алдан тавыш бирү юлы белән билгеләде. Әлеге тавыш бирүдә һәркем катнаша ала иде. 22 майда халык күңеленә хуш килгән кандидат өчен тавыш бирде. Безнең районда алдан тавыш бирүдә 6768 сайлаучы катнашты.
Бөтен теләгән кеше дә тавыш бирә алмаган — бюллетеньнәр җитмәгән, Татарстан Республикасы Дәүләт Советы Рәисе, “Бердәм Россия” партиясенең төбәк бүлеге сайлау штабы җитәкчесе Фәрит Мөхәммәтшин 22 майда алдан тавыш бирүдә катнашкан сайлаучыларга рәхмәт белдерде. “Кызганыч, бөтен кеше дә тавыш бирә алмады”, — диде ул. Андый очракта аларга үз фикерләрен белдерер өчен анкета тутырырга тәкъдим иткәннәр, тавышлары рәсми исәпләүгә кермәсә дә, алар игътибарга алыначак.

Өч бала дүрт сарык урлаган

Бәйрәмнәр алдыннан булган бу хәл. 16–17 яшьләрдәге ике егет (берсе Арча станциясеннән, икенчесе Кукмарадан) Арча Мәдәният йорты каршындагы 9 яктырткычны вата. Алар кайнар эздән тотыла, беркетмә төзелә.

Бу хакта безгә Россия Эчке эшләр министрлыгының Арча районы буенча бүлегенең балигъ булмаганнар белән эшләү бүлеге өлкән инспекторы Алсу Һидиятуллина хәбәр итте.

– Монда авырлык беренче чиратта әти–әниләренә төшә, – диде ул. – Аларга хәзер матди зыянны гына түгел, Россия Федерациясе Административ хокук бозулар кодексының 5.35нче маддәсе, 1нче бүлеге нигезендә (балаларны тиешенчә тәрбия- ләмәгән өчен), кичке сәгать 10нан соң урамда йөргәнгә (Татарстан Республикасы Административ хокук бозулар кодексының 3.11нче маддәсе, 1 бүлеге), чит милекне юкка чыгарганга һәм алкогольле эчемлек кулланган өчен дә штраф түләргә туры киләчәк. Шуның өстенә әле Арча станциясе егете бер–ике көннән педагогика көллияте тирәсендәге бер урамнан велосипед урлап тотылды. Аның буенча да җинаять эше кузгатылды.

Район ветеринария берләшмәсе җитәкчесе Ринат Фәйзрахманов хәвефле хәбәр җиткерде.

— Иске Кишет авылында бер малайны мәче тешли, — диде ул. — Дүрт көннән мәче үлә. Шуннан соң гына эшнең хәтәрлеген чамалап песине безгә китерделәр. Экспертиза аның котырган булуын күрсәтте.

Тиз арада кисәтү чаралары күрдек, малай дәвалана, авылдагы мәче, эт, кәҗә, сарык, эре хайваннарга вакцина ясадык. Президент Указы белән бу авылда карантин кертелде.

Песи тешләү генә түгел, тырнаса да безгә хәбәр итегез. Иске Кишеттә малларны яздан көзгә кадәр арканда тоталар икән, төнлә дә шунда куналар. Ә бит котыру авыруын төлкеләр тарата.

“Татарстанның чиста урманнары” һәм “Парклар маршы” акцияләре кысаларында “Ашыт” дәүләт тыюлыгы хезмәткәрләре белән берлектә Яңа Кырлай урта мәктәбе укучылары, биология, химия укытучылары табигать һәйкәле “Тукай-Кырлай урманы”нда 10 гектар мәйданда чистарту эшләре алып бардылар. Акциядә 25 кеше катнашты.

Арча районында яшәүче эчке эшләр ветераннары Фатыйх Дәүләтшин белән Равил Галимов Җиңүнең 71 еллыгы уңаеннан ТР Эчке эшләр министрлыгы тарафыннан үткәрелгән чарада катнашкан. Моннан тыш, элек Арча эчке эшләр бүлегендә эшләгән Бөек Ватан сугышы ветераннары каберләренә чәчәкләр салу оештырылган. Аңа туганнары да чакырылган. Шулай ук район буенча эчке эшләр бүлеге җитәкчесе Айдар Баһавиев өч Бөек Ватан сугышы ветераны (Ф.Шәмсетдинов, Ф.Дәүләтшин, Р.Галимов) янына барып, эчке эшләр министры А.Хохориннан котлау открыткалары һәм күчтәнәчләр тутырылган каплар тапшырган.

10 июньдә Татарстан Президенты Рөстәм Миңнеханов “Бизнес һәм хакимият: ачыктан-ачык сөйләшү” дигән проект кысаларында республика эшмәкәрләре белән очраша. Президент һәм эшмәкәрләр бергәләшеп актуаль проблемалар турында үзара фикер алыша, аларны тиз арада хәл итү ысулларын эзләячәк.

Аңарчы, теләге булган һәр эшмәкәр Рөстәм Миңнехановка шәхси соравын юллый ала. Моның өчен бизнес-власть.рф сайтында теркәлү узу яки RT@ombudsmanbiz.ru электрон адресына махсус гариза җибәрү дә җитә. Сораулар 8(843) 203-44-17 телефоны аша да кабул ителә. Гариза һәм сорауларны 27 майга кадәр юлларга кирәк.